‏ Isaiah 38

Хэзэкияа хаанай үбдэхэ ба эдэгэхэ ушар

1Энэ үедэ Хэзэкияа хаан ехээр үбдэжэ, наһа бараха туйлдаа хүрөөд байба. Амооцой хүбүүн, лүндэншэ Исай тэрээниие эрьежэ ошоходоо, иигэжэ хэлэбэ:

– Үхэжэ байна, һайн болохогүй гээд шам тушаа Эзэн айладхана, тиимэһээ гэрээд үгэнүүдээ хэлэг лэ гэжэ Тэрэ захирна.

2Тиихэдэнь Хэзэкияа хана руу хараад, Эзэндэ зальбарба:

3– Эзэмни! Танай урда үнэн сэхээр, ямаршье гэм зэмэ хэнгүй ажаһууһыемни, Танда таарамжатай үйлэ хэрэгүүдые бүтээдэг байһыемни һаныт даа, – гээд, һугшаран уйлашаба.

4Эзэн Исайда захиржа, 5Хэзэкияада бусаад, иигэжэ хэлэ:

– Би, Эзэн, шинии үбгэ эсэгэ Давидай Бурхан, гуйлтыешни соносооб, нулимсыеш харааб. Тиигээд шинии наһые Би арбан табан жэлээр утадханаб. 6Шамайе болон энэ Иерусалим хото Ассириин хаанһаа абархаб, энэ хотые Би хамгаалхаб!

7Исай үшөө иигэжэ хэлэбэ:

– Эзэн үгэеэ заабол бэелүүлхэ гэһэнэй дүлгэ тэмдэг хадаа иимэ байха: 8Ахааз хаанай үедэ баригдаһан гэшхүүр дээрэ Эзэн һүүдэрые арбан алхамаар һөөргөө бусахыень баадхаха.

Наран һөөргөө сухариба, гэшхүүр дээгүүр үнгэрһэн һүүдэр арбан алхамаар һөөргөө бусаба.

9Иудын хаан Хэзэкияагай элүүр энхэ болоходоо бэшэһэн магтаал дуун гэбэл, иимэ:

10Ажабайдалайнгаа түлэг дунда
үхэлэй орон руу ошохо заяатай байгааб,
наһаяа дүүрэн эдлэхэгүйб гэжэ һанажа байгааша хүн гэбэл, би гээшэб!
11Энэ дэлхэй дээрэ Эзэниие,
амиды мэндэ хүниие бэшэ харахагүйб
гэжэ һанажа байгааб.
12Байраһаа задалан хуряагдажа байһан
нүүдэлшэнэй майхандал адли,
бүд нэхэгшын түхеэрэлгэһээ таһалагдаһан утаһандал адли
минии ами наһан дүүрэжэ байгаа.
Бурхан намайе мэнэ-мэнэ Өөртөө дуудахань гэжэ хүлеэгөөб.
13Бүхэли һүниндөө арсаланай минии бүхы яһые химэлһэндэл,
ехэ үбдэжэ, үглөө болотор тэсэжэ байгааб.
Наһамни одоол мүнөө дүүрэхэнь гэжэ хүлеэгөөб.
14Хоолоймни арай-шамай гаража,
гулабхаадал адли абяа гарган ёолооб.
Эзэмни, энэ гайһаа намайе абарыт гэжэ
огторгой шэртэһээр нюдэдни эсээ.

15Юун гэжэ хэлэхэбиб?
Эзэн айладхалаа бэелүүлээ.
Сэдьхэлэйнгээ гашуудалда дарагдаад,
аалин даруу наһаа эдлэхэб.
16Эзэмни, гансал Тандаа шүтэн ажаһуухалби,
намайе эдэгээгыт, ами наһа үршөөгыт!
17Би өөрын жаргалай түлөө ехэ зоболон амасааб.
Та намайе бүхы аюулһаа абарнат,
нүгэлыем хүлисэнэт.
18Үхэлэй орон дотор хэншье Таниие магтахагүй,
үхэһэн зон Танда найдан-этигэн байха бэшэ.
19Намдал адли амиды зон Таниие магтан байха,
эсэгэнэр хүүгэдтээ Танай найдамтай үнэн зүбые тунхаглахал.

20Эзэмни, иигэжэ одоо намайгаа абарбат, эдэгээбэт!
Ятага дээрэ хүгжэмлэн,
Танда магтаал дуу үргэн байхабди,
амиды мэндэ байгаа сагтаа
Танай нангин үргөө соо магтаал дуунуудые дуулахабди!

Хэзэкияа хаанда Исайн үгэһэн зүбшэл

21Исай иигэжэ захирба:

– Инжир модоной хатаһан үрэ жэмэс асарагты! Тэрэниие хабдажа эдеэрдэһэн газартань табигты, тиигэбэл Хэзэкияа хаан эдэгэхэ.

22Эдэгэжэ, Эзэнэй Һүмэдэ ошохымни дүлгэ тэмдэг ямар байхаб гэжэ Хэзэкияа асууба.