‏ Isaiah 40

Найдалай ошон бадарна

1«Минии арад түмэниие һаатуулагты, – гэжэ
манай Бурхан айладхана. – Һаатуулан байгты!
2Иерусалимай зонтой эелдэр зөөлэнөөр хөөрэлдэгты.
Тэдэнэй зобохо-тулиха саг дүүрээ,
нүгэл хилэнсэгынь арюудхагдаа гэжэ хэлэгты.
Бүхы нүгэлэйнь түлөө тэдэниие
Би хоёр дахин ехээр хэһээгээб».
3Нэгэ хүн хашхарна:
«Зэлүүд хооһон талада Эзэнэй ябаха зам бэлдэгты!
Манай Бурханда элһэн сүл губида сэхэ зам гаргагты!
4Жалга бүхэн жэгдэрхэ,
хада гүбээ бүхэн набтар болохо зэргэтэй,
ялхитай болдогтой зүргэ тэгшэ болог лэ,
нэгэ адли бэшэ газар мэлигэр гоё болог лэ.
5Тиихэдэ Эзэнэй алдар солонь эли болон тодорхо,
бүхы зон тэрэниие хараха.
Юуб гэхэдэ, Өөрөө Эзэн иимэ юумэн болохо гээд найдуулаа бшуу».

6Хэншьеб хашхарба: «Мэдээсэл тунхаглагты!»
Би асуубаб: «Ямар мэдээсэл тунхаглахабиб?»
«Бүхы зон үбһэ ногоон мэтэ,
гоё һайханиинь хээрын сэсэг мэтэ удахагүй.
7Эзэнэй һалхи эльгээхэдэ,
үбһэ ногоон хатажа, сэсэг хагдардаг.
Зон гээшэ үнэхөөр үбһэ ногоондо адли.
8Зүб даа, үбһэ ногоон хатана, сэсэг хагдарна,
харин манай Бурханай үгэ хэтэ мүнхэдөө оршон байха!»

9Иерусалим, үндэр хада уула өөдэ гаража,
һайн мэдээ соносхо!
Сион, хоолойгоо шангадхан,
һайн мэдээ дуулга!
Соносхогты, бү айгты!
Иудын хан түрын хотонуудта
Бурханайнь заларан ерэжэ байһые дуулгагты!
10Харагты, Эзэн Бурхан хүсэ шадалаа,
засаг эрхэеэ зангидан залархань.
Зондо шагнал Тэрэ асарна.
11Тэрэ хонишон мэтэ һүрэгөө харюулжа,
хурьгадаа суглуулжа, гар дээрээ үргэн, сээжэдээ тэбэреэд,
хурьгалһан хонидые дүмүүхэнээр адуулха.

Израилиин Түгэс Хүсэтэ Бурхан

12Хэн тэнгис далайн уһые гарайнгаа альгаар хэмжэжэ,
һөөмөөр тэнгэриие хэмжүүрлэжэ шадахаб?
Хэн газарай шоройе амһартаар хэмжүүрлэн тооложо,
уула, гүбээнүүдые шэгнүүрээр шэгнэхэ аргатайб?
13Эзэнэй Һүлдые хэн мэдэрээб?
Хэн Тэрээндэ заабарилжа, зүбшэл үгэжэ байгааб?
14Хэнтэй Тэрэ зүбшэжэ,
хэн Тэрээндэ ухаа заанаб?
Хэн Тэрэниие ёһо гуримда һургажа,
сэсэн мэргэн ухаа ойлгуулнаб?
15Эзэндэ үндэһэ яһатад болбол уһанай дуһал мэтэ,
олтирогууд тооһон мэтэ.
16Үргэлэй гал носооходо, Ливаанай ой соо модон дуталдаха,
тэрэ ой соо ан арьяатаншье
Эзэн Бурханда түгэс шатаалта үргэл үргэхэдэ хүрэхэгүй.
17Бүхы үндэһэ яһатан Тэрэнэй урда юуншье бэшэ.
18Таанад Бурханиие хэнтэй адлидхахабта?
Ямар дүрсэтэй гээд яагаад зураглахабта?

19Дарханай шудхаһан, алташа дарханай алтаар шэрдэһэн, мүнгэшэ дарханай мүнгэн гэнжэ хэһэн шүтөөндэ адли бэшэл Бурхан!

20Иимэ үргэл хэхэ аргагүй хүн үмхирхэгүй модо шэлэжэ абаад, унахагүйгөөр шүтөө дархалжа шадаха уран дарханиие олодог.

21Таанад мэдэхэгүй юм гүт?
Таанадта үнинэй хэлэгдээгүй юм гү?
Дэлхэйн яажа бии болоһон тухай
таанад дуулаагүй юм гүт?
22Таршаа шумуул мэтэ улад зонтой
дэлхэйн тойрог дээрэ заларагшань Тэрэ бэлэй.
Тэрэ огторгойе хүшэгэ мэтэ татажа,
майхан мэтэ дэлгээ.
23Тэрэ удамаршадые хэншье бэшэ болгоно,
дэлхэйн ноёдые хооһон газар болгоно.
24Һая таригдаһан, мэнэ һая газарта үндэһэлһэн
ургамалдал адли тэдэ удамаршад.
Эзэнэй тэдээн руу һалхи эльгээхэдэ,
хатажа, һолоомо мэтээр һалхинда тэдэ хиидэнэ.

25Нангин Арюун Бурханиие хэнтэй адлидхахаар бэ?
Хэнтэй тэнсүүлхээр бэ?
26Огторгой руу харагты!
Хэн одо мүшэдые байгуулааб?
Сэрэгтэл адляар тэдэниие захиран гаргагша Бурхан
тэдэниие тоо тоогоорнь, нэрээрнь мэдэдэг.
Тэрэнэй хүсэ шадал агууехэ,
ямаршье юумэн Тэрээндэ дутуу байхагүй!

27Эзэн гай гасалангыем мэдэнэгүй,
хэрэгни буруу шиидхэгдээ гэжэ
юундэ гомдол баринабши, Яков,
юундэ иигэжэ хэлэнэбши, Израиль?
28Мэдэхэгүй юм гүш?
Дуулаагүй юм гүш?
Эзэн – хэтэ мүнхэдөө оршодог Бурхан,
Тэрэ бүхы дэлхэй байгуулаа.
Тэрэ эсэдэггүй, тулидаггүй.
Хэншье ухаан бодолыень мэдэхэгүй.
29Тэрэ ядарһанда тэнхээ үгэжэ,
шадал дутаһанда хүсэ нэмээдэг.
30Залуушье хүн ядаран һуларжа,
эдир хүбүүдшье бүдэрэн унадаг.
31Харин Эзэндэ найдагшад
шэнэ хүсэтэй болодог.
Тэдэ бүргэд мэтэ жэгүүр дээрээ элин халиха,
гүйхэдөө эсэхэгүй,
алхалан ябахадаа сусахагүй.