‏ Isaiah 42

Эзэнэй үнэн богоол

1Эзэн иигэжэ айладхана:
Минии дэмжэдэг, сэдьхэлдэмни таарама,
Минии шэлэгшэ зараса энэ байна.
Арюун Һүлдэеэ тэрээндэ хайрланаб,
тиихэдэм Тэрэ үндэһэ яһатан бүхэндэ
зүб шударга ёһо гурим нэбтэрүүлхэ.
2Тэрэ хашхархагүй, дуугаа шангадхахагүй,
гудамжануудта шангаар хүрхирхэгүй.
3Тэрэ хухарһан хулһые таһа татахагүй,
залиржа байһан дэн унтараахагүй,
зүб шударга гурим ёһо бүхы зондо асарха.
4Тэрэ зүрхэ алдахагүй, урма зоригоо хухархагүй,
дэлхэй дээрэ зүб шударга гурим тогтоохо.
Холын нютагууд Тэрэнэй хуулиие найдан хүлеэнэ.

5Бурхан огторгойе бүтээжэ татаа,
дэлхэйе үрэ жэмэстэйнь Тэрэ байгуулжа дэлгээ,
Тэрэ улад зондо, амитадта ами наһа, амисхаал бэлэглээ.
Тиигээд мүнөө Эзэн Бурхан Өөрын богоолдо иигэжэ айладхана:
6Би, Эзэн, шамайе дуудажа,
үнэн шударга байдал тогтоохо арга шадал шамда үршөөгөөб.
Шамайе гарһааш барижа, шамайе аршалнаб!
Шинии аргаар арад түмэнтэй хэлсээ баталхаб,
шамаар дамжуулан, үндэһэ яһатадта гэрэл асархаб.
7Тиихэдэм, һохор зоной нюдэн нээгдэхэ,
түрмэдэ һуугшад сүлөөдэ гараха,
харанхыда һуугшад түрмэһөө гараха.
8Би болбол Эзэн гээшэб! Иимэ нэрэтэйб!
Минии алдар соло ондоо ямаршье бурханда хүртэхэ ёһогүй,
Намда үргэһэн магтаалые һиилэмэл хүрэгүүд хубаалдаха эрхэгүй.
9Минии уридшалан айладхаһан зүйлнүүд бүтээ.
Мүнөө Би таанадта шэнэ юумэ
тохёолдохынь урда тээ уридшалан тунхагланаб.

Магтаал дуун

10Эзэндэ шэнэ дуу дуулажа,
бүхы дэлхэйгээр Тэрээндэ магтаал дуулагты!
Далайгаар тамарагшад болон далайн бүхы амитад,
Тэрэниие магтагты!
Олтирогууд болон ажаһуугша зониинь, Эзэндэ магтаал дуулагты!
11Элһэн сүл губи, хотонуудынь Бурханиие магтаг лэ,
Кэдаарай улад зон Тэрэниие магтаг,
Сээлын ажаһуугшад уулын оройһоо
баярлан хашхарха болтогой!
12Холын орон нютагуудаар ажаһуугшад Эзэн Бурханда магтаал, алдар соло үргэг лэ!

13Эзэн сэрэгшэ мэтэ урагшаа гаража,
дай үүдхэхээр бэлэн байхал.
Байлдаанай дуу шангаар хашхаран,
дайсадтаа хүсэ шадалаа элирхэйлхэ.

Өөрын арад түмэндэ туһалха

14Эзэн иигэжэ айладхана:
Удаан сагай туршада абяа аниргүй байжа,
бэеэ баряаб.
Харин мүнөө хэрэг үүдхэхэ саг ерээ,
тиимэһээ Би түрэжэ байгаа эхэнэртэл хашхаран байнаб.
15Уула гүбээнүүдые үгы хэн,
бүхы үбһэ ногоо хатаахаб.
Голой нюрууе элһэн сүл губи болгожо,
сөөрэмүүдые шэргээхэб.
16Би Өөрын һохор зониие
мэдэхэгүй замаарнь хүтэлэн ябахаб,
тэдэнэй урда харанхые гэрэл,
барзагар газарые тэгшэ тала болгохоб.
Энэ болбол Минии хэхэ юумэн.
Би тэдэниие хэнгүй орхихогүйб.

17Шудхамал хүрэгүүдые бурхад гэжэ нэрлээшэд,
шүтөөнүүдтэ этигэгшэд
ехэ эшэжэ, тиихэеэ болихо.

Израиль һурахаяа арсана

18Эзэн айладхана:
Таанад, дүлии зон, шагныта!
Һохор зон, харыта!
19Минии богоолһоо өөрэгүй ехэ һохор хүн хэн бэ?
Минии эльгээһэн элшэдэл адли дүлиинь хэн бэ?
20Минии арад түмэн, таанад олон юумэ үзэһэншье һаа,
юумэ һайн ойлгоогүйт.
Шэхэтэйшье һаа, юумэ дуулаагүйт.

21Үнэн шударгаяа хараада абан,
Эзэн Хуулиие агууехэ,
алдар солотой болгохо һанаатай.
22Харин мүнөө Тэрэнэй арад дээрмэдүүлэгдээ.
Тэдэ бултадаа нүхэн руу хаюулжа,
түрмэ шорондо хаагданхай.
Тэдэ олзо болоо,
хэншье тэдэниие абархагүй.
23Таанадай хэн энээн тушаа шагнахаб?
Хэзээ анхаралтайгаар иимэ юумэ шагнажа эхилхэбта:
24«Хэн Яковые дээрмэшэдтэ дамжуулжа үгөөб?
Хэн Израилиие һүйдхэгшэдтэ үгөөб?
Эзэн бэшэ гү?
Бидэ Тэрэнэй урдаһаа нүгэл үйлэдөө бэлэйлди.
Тэрэнэй үгөөр ажаһуугаагүйбди,
хуулииень сахяагүйбди.
25Тиимэһээ Тэрэ Өөрын уур хилэнгэй шангые,
хатуу дайе маанад дээрэ тохоо.
Израиль дотор хаа-хаанагүй уур хилэнгэйнь
түймэр мэтэ бушаганаашье хадань,
бидэ ойлгоогүйбди, мэдэрээгүйбди».