‏ Isaiah 43

Өөрын арад түмэниие абарха тушаа Бурхан найдуулна

1Яков, шамайе байгуулагша,
Израиль, шамайе бүтээгшэ Эзэн иигэжэ айладхана:
«Бү ай, Би шамайе абархаб.
Би шамайе нэрээршни нэрлээб, ши Минии болоош.
2Уһа гаталхадаш Би шамтай байхаб.
Гол мүрэнөөр гарахадаа шэнгэхэгүйш.
Гал дундуур ябаашье һаа, шатахагүйш.
Элдэб гай гасалангууд шамайе дайрахагүй.
3Ушарынь гэбэл, Би танай Эзэн Бурхан,
таанадые абарагша Израилиин арюун Бурхан мүн!
Таанадые абархын тула Египет,
Эфиопи болон Сэбаа үгэжэ, таанадые сүлөөлөөб.
4Ши Намда ехэ үнэтэй-сэнтэйш, угаа хайратайш,
тиимэһээ шамайе абархын тула Би ондоо үндэһэ яһатаниие
хамаагүй шинии түлөө үгэхэб, тэдэнээр һэлгэхэб.
5Бү ай, Би шамтай хамтаб!
Би шинии уг удамые зүүн болон
баруун зүгүүдһээ суглуулан, гэртэнь асархаб.
6Хойто зүгтэ хандан, Минии арад түмэниие табихыень,
урда зүгтэ хандан, зониием барижа байхагүй тухай захирхаб.
Минии арад түмэнэй алас холоһоо, үлгэн дэлхэйн элдэб буланһаа
ерэхэдэнь бү һаад хэгты гэхэб.
7Тэдэ Минии Өөрын зон,
Өөрын алдар солын тула Би тэдэниие бүтээгээ бэлэйб».

Израилиие шүүбэрилгэ

8Эзэн иигэжэ айладхал буулгана:
«Нюдэтэйшье һаа, һохор,
шэхэтэйшье һаа, дүлии
Минии арад түмэниие шүүбэрилхыем асарагты!

9Зарга шүүлгын урда бүхы арадууд суглараг лэ!
Хэнэйнь бурхад ерээдүйе уридшалан тунхаглажа шадахаб?
Зүгнэлгэнүүдыень дуулаһан гэршэнэрээ тэдэ асараг лэ.
Тэдэниие шагнажа, зүб, бурууень тодорхойлхоб.

10Харин Минии гэршэнэр гэбэл, Израилиин арад түмэн.
Таанад болбол Минии зарасанар.
Таанад мэдэжэ, Намда этигэжэ,
Намайе ори ганса Бурхан гэжэ ойлгохын тула таанадые шэлээб.
Намһаа бэшэ ондоо Бурхан байхагүй,
хэзээдэшье байгаагүй, байхашьегүй!
11Би гансаараа Эзэн гээшэб!
Намһаа ондоо абарагша танда байхагүй.
12Юун болохоб гэжэ уридшалан айладхааб,
тиигээд таанадые абарааб.
Хариин ямаршье бурхан иимэ юумэ хэжэ шадахагүй.
Таанад Минии гэршэнэр гээшэт.
13Би болбол Бурхан гээшэб, хэзээдэшье Бурхан зандаа байхаб.
Хэншье Намһаа зугадажа шадахагүй,
хэншье Минии үйлэ хэрэгүүдые болюулжа шадахагүй».

Абарал буулгаха

14Израилиин арюун Бурхан,
таанадые Абарагша Эзэн иигэжэ айладхал буулгана:
«Таанадые абархын тула Би Вавилооной урдаһаа сэрэг эльгээгээб,
баяртай бардамаар хашхардаг халдейшүүдэй
уһанай онгосоор тэрьедэхэдэнь, хюдахаб!
15Би болбол танай Арюун Эзэн Бурхантнай гээшэб.
Израиль, таанадые бүтээгээб, хаантнай Би мүн!»

16Тэнгис дундуур зам,
урдажа байһан уһан дундуур харгы гаргагша Эзэн иигэжэ айладхаба.
17Тэрэ хүсэ ехэтэ сэрэг – дайшалхы тэргэтэй, моридтой –
хосороохо тээшэнь залаа.
Тэдэ бултадаа унажа, дахин бодоогүй,
зула мэтэ унтаржа замхаа.
18Гэбэшье Эзэн иигэжэ айладхал буулгана:
«Урданай юумэ бү дурдагты,
үнгэрһэн юумэн тушаа һанаата бү бологты.
19Харагты, Би шэнэ зүйл хэхэм.
Тэрэ мүнөө бэелүүлэгдэжэ эхилээ, харахадатнай болохо.
Мүн Би хээрэ талада зам гаргажа,
элһэн сүл губида уһа урдахуулхаб.
20Өөрынгөө шэлэһэн арад зониие ундалуулхын тула
хооһон тала газарта уһа үгэжэ,
элһэн сүл губида гол урдахуулхадам,
хээрын ан арьяатаншье Намайе хүндэлхэ,
сүүбэн шоно, тэмээн хяруулшье Намайе магтахал.
21Өөртөө гэжэ энэ арад түмэниие байгуулааб,
тэдэ Намда магтаал татахал!»

Израилиин нүгэл

22Эзэн иигэжэ айладхана:
Харин ши, Яков, намайе дуудаагүйш,
Израиль, Намда хандаагүйш,
Намда мүргөөгүйш.
23Түгэс шатаалта үргэлэй хонидые Намда асараагүйш.
Үргэл хэжэ Намайе хүндэлөөгүйш.
Би шамайе үргэл Намда үргэ гэжэ баадхаа бэшэб,
уталга Намда ууюула гэжэ захираа бэшэб.
24Ши Намда зорюулан аятай юумэ мүнгөөр худалдан абаагүйш,
үргэлэйнгөө өөхөөр Намайе садхаагаа бэшэш.
Харин ши нүгэл шэбэлээрээ Намайе хашараажа,
хуули буса үйлэ хэрэгүүдээрээ Намайе ядараагааш.
25Гэбэшье Би, Бурхан, шинии хилэнсэг арюудхан,
нүгэлыеш хүлисэнэб.

26Зарга шүүлгэдэ ошоё!
Зүб байһанаа баталхын тула ши ушар шалтагаанаа хэлэ!
27Элинсэг эсэгэшни нүгэл хэжэ,
удамаршадшни Намда һөөргэдэбэ.
28Тиимэ ушарһаа Би санаарта ударидагшадые нангин үүргэһээнь болюулааб,
Яковые хосоролдо үгөөб,
Израилиие доромжолгодо оруулбаб.