Isaiah 44
Эзэн – ори ганса Бурхан
1Эзэн иигэжэ айладхана:Минии богоол Яков,
Минии шэлэн абаһан Израиль,
мүнөө одоо Намайе шагнагты.
2Таанадые байгуулһан Эзэнтнай гээшэб,
хэбэл соо таанадые бүтээһэн Би,
таанадта туһалдаг Би иигэжэ айладанаб:
Минии богоол Яков, Минии шэлэн абаһан Ешүрүүн ▼
▼ Ешүрүүн – Израилиин арадай үшөө нэгэ нэрэ, «һайн», «сэхэ» гэһэн удхатай.
, бү айгты!3Ангаһан-хатаһан газарта Би уһа адхахаб,
хуурай газар дээгүүр гол горхо урдахуулхаб.
Би таанадай үри ашанар дээрэ Өөрын Һүлдэ адхажа,
уг удамдатнай Өөрын юрөөл хүртөөхэб.
4Тэдэ уһанай урасхалай хажуудахи бургааһад мэтэ
һайнаар ажамидархал.
5Нэгэнь «Би Эзэнэйб» гэжэ хэлэхэ,
нүгөөдэнь Яков нэрэтэй болохо.
Зарим хүн гар дээрээ «Эзэнэй» гэжэ бэшэхэ,
Израиль гэжэ нэрэ абаха.
6Израилиин Хаан, Абарагшань,
Түмэн Сэрэгтэ Эзэн иигэжэ айладхана:
Би болбол эхин, тиихэдэ нэгэн доро эсэс гээшэб.
Намһаа ондоо Бурхан байхагүй.
7Намдал адли хэн бииб?!
Харюу үгэг!
Урданай арадые байгуулһанайм хойшо
юун болоһые Намда эхинһээ эсэс хүрэтэр хөөрэг!
Ерээдүй тухай, юун болохо байһые бидэндэ мэдүүлэг!
8Бү айгты, бү һүрдэгты!
Эртэ урда сагһаа мүнөө болотор юун болохыень
Би таанадта уридшалан
айладажа мэдүүлээ һэм.
Таанад гэршэнэрнит.
Намһаа ондоо Бурхан бии юм гү?!
Ондоо Хабсагай байхагүй!
Би мэдэхэгүйб!
Шүтөөнүүд тушаа
9Һиилэмэл хүрэгүүдые хэгшэд бултадаа юуншье бэшэ. Тэдэнэй зальбардаг шүтөөнүүд ямаршье ашаггүй. Иимэ юумэндэ мүргэдэг зон һохор, мунхаг, тиимэһээ тэдэ доромжолгодо орохо. 10Бурханда мэтээр зальбархаяа ямаршье ашаг туһагүй хүрэгүүдые хэн хээб? 11Хараарайгты, тэдээндэ һүгэдэдэг хүн бүхэн эшхэбтэр аягүй байдалда орохо. Шүтөөнүүдые урлан дархалагшад өөһэдөө миин лэ зон ха юм. Тэдэ зарга шүүхэдэ бэеэрээ ерэг лэ. Тиихэдээ тэдэ ехэ айха, эшэхэ. 12Түмэршэ дархан багажа зэбсэгээ абаад, нүүрһэн дээрэ гал үлеэн хүдэлдэг. Тэрэ шүтөөниие алхаар дабтажа, гарайнгаа хүсэ хэрэглэн хүдэлдэг. Ажал хэхэдээ, тэрэ гэдэһээ үлдэжэ ядардаг, ангадаг, эсэдэг. 13Модошо дархан модон дээрэ шугам татажа, хурса хушуутай шохойгоор хүреэлэн зураад, удаань тэрэнээ зүһэн мүлижэ, һайхан бэетэй хүнэй дүрсэ хээд, мүргэлэй гэртээ табидаг. 14Тэрэ хуша модо отолхо, үгышье һаа, нарһа, сарса модо ой соо шэлэжэ отолхо аргатай. Тиихэдэ нарһа тарибалнь, бороо орожо, тэрэнииень өөдэнь ургуулна шуу. 15Тиигээд тэрэнь хүнэй түлишэ болодог. Хүн энэ модоной нүгөө хуби абажа, шүтөөн бүтээдэг. Нэгэ хубяарнь тэрэ гал түлижэ, хилээмэ барина. Нүгөө хубяарнь шүтөөн бүтээжэ, урдань унан мүргэнэ. 16Модоной хахадаар тэрэ гал түлижэ, дээрэнь мяха шараад, садатараа эдеэлдэг. Дулаасаад, тэрэ хэлэдэг: «Ямар дулаан, һайн гээшэб! Ямар гоё гал бэ!» 17Харин модонойнгоо үлэгдэлөөр тэрэ шүтөөн өөртөө бүтээжэ, урдань һүгэдэн унажа, мүргэдэг. Тэрэ баһа шүтөөндөө зальбаран, иигэжэ хэлэдэг: «Ши болбол минии бурхан гээшэш. Намайе абарыш!» 18Иимэ зон хэжэ байһан юумэеэ мэдэхэгүй, мунхаг. Үнэн байдал ойлгохогүйн тула тэдэ нюдөө хаадаг, ухаагаа хабхагладаг. 19«Би модоной хахадые галда түлижэ, нүүрһэн дээрэнь хилээмэ баряаб, мяха шаража эдеэб. Тиигээд би үлэһэн модоор шүтөөн бүтээгээб. Тэрэ модоной тайрадаһанай урда мүргэхэ юм гүб?» гэжэ хэлэхэ ухаан, мэдэсэ, ойлгосо тэдээндэ байхагүй. 20Иимэ хүн тооһо намнааша мэтэ, удхагүй юумэндэ толгойгоо тэрэ төөреэ. Тэрэ ами наһаяа абаржа шадахагүй, «баруун гартам гансал худал хуурмаг!» гэжэ мэдэрэн хэлэжэ шадахагүй байна.Эзэн – Байгуулагша ба Абарагша
21Эзэн иигэжэ айладхана:«Яков, энээниие һанан байгаарай,
Израиль, һанан байгаарай,
ши Минии богоол гээшэш.
Өөртөө богоол болгохо гэжэ Би шамайе байгуулааб.
Израиль, Би шамайе мартахагүйб.
22Би шинии хилэнсэгые манан мэтээр,
нүгэлыешни үүлэн мэтээр тунаан һалгаагааб.
Би болбол танай Абарагшаб,
Нам руу эрьегты!»
23Эзэнэй хэрэгүүдые бүтээһэндэ
огторгой, баярлан хашхарыш!
Газарай гүн газарнууд, хашхаралдагты!
Уула хаданууд, ой модон, ойн бүхы модод, баясан хашхарагты!
Эзэн Яковые абараа, Израилиие абаран алдаршаа!
24– Би таниие абарагша Эзэмби.
Би таанадые хэбэл соо байгуулааб.
Би, Эзэн, бүхы юумэ бүтээгээб,
Би гансаараа огторгойе татажа,
дэлхэйе гансаараа дэлгээб.
25Би худал лүндэншэдые илгажа тодоруулдагби,
үзэлшэдэй үгэнүүдэй үнэн бэшые харуулдагби,
сэсэн мэргэшүүлэй үгэнүүдые буруушаадагби,
эрдэм мэдэсэнь удхагүй тэнэг гэжэ элирхэйлдэгби.
26Харин Минии богоолой уридшалан таахада,
түсэбүүдээ мэдүүлхэеэ элшэнэрые эльгээхэдээ,
Би тэдэ түсэбөө дүүргэдэгби,
уридшалан хэлээшыень бэелүүлдэгби.
Иерусалимда зон дахин ажаһуудаг болохо,
Иудын хан түрын хотонууд дахин һэргэн бодохо гэжэ
Би мэдүүлнэб.
27Минии тэнгис далайда захирхада, уһаниинь шэргэжэ хатадаг.
28Кииртэ иигэжэ айладхал буулганаб:
«Ши Минии эльгээһэн ударидагша мүн,
Минии үгэ соо хэрэг ябуулхаш.
Иерусалимда һэргэн бодохыень,
нангин үргөөгэйм һууриин дахин табигдахыень ши захирхаш!»
Copyright information for
BxrBBL2024