Isa 46 | BxrBBL2024 | STEP | Вавилооной Бээл болон Нэбоо гэдэг бурхадай эсэс ерээ! Тэдэ элжэгэнүүд дээрэ ашагдажа, ашаанай эсэһэн амитадта дарамта болоо.

‏ Isaiah 46

Вавилооной бурхадай эсэс ерээ

1 Вавилооной Бээл болон Нэбоо гэдэг бурхадай эсэс ерээ!
Тэдэ элжэгэнүүд дээрэ ашагдажа,
ашаанай эсэһэн амитадта дарамта болоо.
2 Эдэ шүтөөнүүд өөһэдыгөөшье абаржа шаданагүй,
унаа, олзологдоо.

3 «Яковай уг удам, Израилиин үри һадаһадай үлдөөсэ,
Намайе шагнагты!
Түрэһэн сагһаатнай хойшо
Би таанадые гар дээрэ үргэжэ ябааб,
таанад тушаа һанаагаа зобооб.
4 Үһэнэйтнай сайтар Би таанадые абажа ябахаб.
Би таанадые байгуулааб, абажа ябахаб, аршалхаб, дүнгэхэб.

5 Намайе таанад хэнтэй адлидхажа,
хэниие Намтай зэргэсүүлхэбта?
Хэнтэй адли гэжэ һанахабта,
сасуулжа үзэхэбта?»

6 Зарим зон түриибшэһөө алтаа хайра гамгүй үгэжэ, мүнгэ шэгнүүрээр шэгнэн, бурхан хэхыень алташа дарханиие хүлһэлдэг. Тиигээд тэдэ шүтөөнэй урда унажа, мүргэдэг. 7 Тэдэ үнөөхиеэ мүр дээрээ үргэн зөөжэ, байха байрадань заладаг. Тэрэ хэһэн зүйлынь байраһаа хүдэлхэгүй зогсодог. Хэн нэгэнэй тэрээндэ зальбаран мүргөө гээшэ һаань, тэрэ харюусажа шадахагүй, гай тодхорһоо абаржа шадахагүй. 8 «Энээн тушаа һанан байгты, эшэгты,
ухаа орогты, буһалгаатан!
9 Үни эртын, урданай зүйл һанагты.
Минии ори ганса Бурхан байһые баталан дэмжэгты,
Намтай адли хэншье байхагүй.
10 Юун болохыень Би эгээл эхиндэ уридшалан айладхаа бэлэйб.
Болоодүй байгаа юумые үни эртэнһээ мэдүүлээб.
Минии түсэбүүд заабол бэелүүлэгдэдэг,
хэхэеэ һанаһан хэрэгээ Би заатагүй хэдэгби.
11 Зүүн зүгһөө хүниие дуудахадам,
тэрэ мяхаша шубуундал добтолон орохо.
Түсэблэһэнөө Би заабол гүйсэдхэхэб.
Айладхаһанаа заабол дүүргэхэб!
12 Таанад, үсэд зантай зон, Намайе шагнагты!
Үнэн зүб, һайниие хэхэ гээшэ үшөө үды гээд һананат.
13 Би һайн юумэ һаяар хэхэб,
тэрэ саг ойртоо.
Абарал буулгаха сагни удааржа байхагүй.
Би Сиониие абархаб,
Израильда нэрэ хүндэ олгуулхаб».