‏ Isaiah 48

Ерээдүй саг тушаа

1Яковай үринэр, Израилиин нэрээр ябагшад,
Иудын үриһээ гарагшад, энээниие соносыта!
Эзэнэй нэрээр тангаригладагшье һаа,
Израилиин Бурханай нэрэ дуудадагшье һаа,
досоогоо Тэрээндэ үнэн сэхэ бэшэт, зүб шударга бэшэт.
2Таанад өөһэдыгөө нангин хотын ажаһуугшад
гээшэбди гэжэ нэрлэнэт,
Түмэн Сэрэгтэ Эзэн гэжэ нэрэтэй
Израилиин Бурханда түшэглэнэбди гэлдэнэт.
3Эзэн иигэжэ Израильда айладхана:
Эртэ урда сагһаа хойшо Би юун болохоб гэжэ тунхагладаг байгааб,
тиигээд гэнтэ тэрэниие үйлэдэхэдэм,
тэрэ бэелүүлэгдэдэг бэлэйл.
4Танай үсэдые,
хоолойтнай түмэр, сохотнай гуулин мэтэ гэжэ би ойлгодог һэм.
5Тиимэһээ Би бүри эртэнһээ,
ямар нэгэ ушарай болохоһоо урид
энээн тушаа таанадта мэдээсэдэг һэм.
«Шүтөөнүүднай, шудхаһан хүрэгүүднай
эдэ бүгэдые бүтээгээ» гэжэ таанадай хэлэхэгүйн тула иигээ һэм.
6Минии уридшалан соносхоһон бүхы зүйл бүтээ!
Энээниие таанад мэдэрхэ ёһотойт.

Мүнөө Би таанадта болохоёо байгаа шэнэ юумэн тушаа,
таанадай мэдээгүй нюуса зүйл тушаа айладхааб.
7Мүнөөл энэ юумэн болоо,
урда тээнь иимэ юумэн байгаагүй.
Тэрэнэй тохёолдоһон һаань,
таанад энээн тушаа мэдээ һэмди гэжэ хэлэхэ байгаат.
8Таанадта этигэхын аргагүй гэжэ Би мэдэжэ байгааб.
Урбахаар зон гээд таанад тушаа хэлсэдэг һэн.
Тиимэһээл энээн тушаа таанадта Би дуулуулаагүйб,
шэхэндэтнай энээн тушаа ямаршье үгэ дуулдаагүй һэн.

9Минии нэрэ магтан зоной дуулахын тула
Би уур хилэнгээ баряад, нюугаад байнаб,
таанадые хюдахаһаа тэбшээд байнаб.
10Харыт, Би таанадые хайлуулааб,
харин мүнгэ хайлуулдагтал адляар бэшэ,
Би таанадые зоболонгой зууха соо шалгааб.
11Өөрынгөө аша туһада Би эдэ бүгэдые хэнэб,
Өөрынгөө нэрэ бузарлуулхагүйб!
Өөрынгөө алдар солые хэнтэйшье хубаалдахагүйб,
энэ болбол гансал Минии байха ёһотой!

Киир тушаа

12Эзэн иигэжэ айладана:
«Намайе шагна, Яков, Минии дуудаһан Израиль!
Би болбол бүгэдын эхиндэ байһан, Би эсэстэшье байхаб!
13Минии гарнууд газарай үндэһэ һуури табяа,
огторгойе дэлгээ.
Газар, огторгойе дуудахадам,
тэдэ хамта тэрэ дары бии болодог.

14Таанад бултадаа сугларжа, шагнагты!
Ямаршье шүтөөн гү, али бурхан иимэ юумэ
уридшалан мэдүүлжэ шадахагүй бэлэй:
Минии шэлэһэн хүн Вавилоондо добтолжо,
һанаһан юумыемни бултыень гүйсэдхэхэ.
15Бил тэрэниие дуудажа,
асаржа, амжалта үршөөнэб.
16Нам руу дүтэлэгты,
юу хэлэхыем шагнагты!
Би эхинһээ эхилэн нюуса дуугаржа байгаа бэшэб.
Энээнэй эхинһээ хойшо
Би тэндэ байлсааб».
Мүнөө Эзэн Бурхан Һүлдөө намда шэнгээн,
Намайе эльгээгээл!

Өөрын арад зондо хандалга

17Израилиин Арюун Эзэн Бурхан,
таанадай Абарагша, иигэжэ айладхана:
Би болбол танай Эзэн Бурхан гээшэб.
Би таанадые аша туһатай юумэндэ һурганаб,
ябаха ёһотой замаартнай ударидан байнаб.
18Хэрбээ Минии захяа заабаринуудта
анхаралаа хандуулдаг һаатнай,
үршөөлнүүд гол мүрэн мэтэ таанад руу урдаха байгаа,
далайн долгид мэтээр буян таанадта ерэхэ һэн.
19Үри һадаһадтнай элһэн мэтэ тоо томшогүй,
уг удамтнай орооһон мэтэ тоолошогүй байха байгаал!
Тэдэнэй нэрэ Минии урда үгы болохогүй, хосорхогүй байгаал!

20Вавилоонһоо гарагты, Халдейһээ зугадагты!
Баяртайгаар хашхаран, тунхаглагты,
дэлхэйн хизаар хүрэтэр иимэ мэдээ тараагты:
«Эзэн Өөрынгөө богоол Яковта эрхэ сүлөө үршөөгөө!»

21Эзэн Бурханай Өөрын арад зониие элһэн сүл губяар хүтэлэн ябахада,
тэдэ ангажа зобоогүй.
Бурхан хабсагайһаа тэдээндэ уһа гаргажа,
хадые хахалан, уһа урдахуулаа.

22«Хара һанаатай зондо амар амгалан байдал үзэгдэхэгүй!» –
гэжэ Эзэн айладхана.