‏ Isaiah 5

Үзэм жэмэсэй сэсэрлигэй дуун

1Нүхэр тухайгаа,
үзэмэй жэмэсэй сэсэрлиг тухайнь дуу дуулахамни.
Минии Нүхэр үрэжэлтэй гүбээ дээрэ
үзэмэй модоной сэсэрлигтэй бэлэйл.
2Тэрэнээ тойруулан малтажа,
шулуунуудһаань сэбэрлээ.
Эгээл эрхим үзэмэй жэмэс һуулгаа.
Алим жэмэс хамгаалхаяа
сэсэрлигэй дунда самхаг баряа.
Уһан үзэм шахаха шахуурга малтан зохёогоо.
Тиигээд һайхан үзэмэй жэмэс гараха гэжэ
найдан хүлеэжэ байхадань,
гашуун үзэмэй жэмэс ургаал!

3– Иерусалимда болон Иудын хан түрэдэ ажаһуугша таанад,
үзэмэй жэмэсэй сэсэрлигэйм болон Минии хоорондохи
зарга хэрэгые шүүбэрилыт!
4Үшөө юу тэрээндэ хэхэ ёһотой байгаа гээшэбиб?
Бүхы юумэ хээлби. Теэд юундэ
Минии һайн үзэмэй жэмэс гараха гэжэ хүлеэжэ байхада,
гашуун, муу үзэмэй жэмэс гарааб?
5Мүнөө Би үзэмэй жэмэсэй сэсэрлигтэйгээ
юу хэхэ гэжэ байһанаа таанарта мэдүүлхэм:
хорёо хотыень абахаб, тэрэниие хооһолог лэ;
ханыень һандаргаахаб, тэрэниие гэшхэг лэ.
6Тэрэниие эзэгүйрүүлэн хаяхаб,
мүшэр заһагдан отологдохогүй, газарынь һэндэгдэхэгүй.
Тиихэдэм тэрэ хадхууртай үрмэдүүлдэ баригдаха.
Тэрээн дээрэ бороо бү оруула гэжэ Би үүлэдтэ захирхаб.

7Израилиин арад –
Түмэн Сэрэгтэ Эзэнэй үзэмэй жэмэсэй сэсэрлиг гээшэл;
Иудын хан түрын улад зон –
Тэрэнэй дуратай үзэмэй модоной эшэнүүд.
Үнэн зүбөөр хэрэгүүд эрхилэгдэхэ
гээд Тэрэнэй хүлеэһэниинь
тэдэ алууршад болоо.
Үнэн шударгые хүлеэһэниинь
гомдол, оог бархираан гансал гарана.

Зоной муу муухай хэрэгүүд

8Ямаршье зайгүй болотор байшан дээрээ байшан нэмэжэ,
таряалан дээрээ таряалан худалдан абажа байгааша таанадта
гай тодхор тохёолдохо!
Газар дээрэ гансал таанад ажаһууна юм гүт?!
9Түмэн Сэрэгтэ Эзэн эли тодоор намда:
Гэрнүүд олон, гэбэшье тэдэ хооһорхо.
Мантан, һайхан байшангууд хүнгүй үлэхэ.
10Дүрбэн гектар талмай үзэмэй жэмэсһээ
оройдоол нэгэ баата жэмэсэй шүүһэн гараха.
Тариһан хоомэр таряанһаа оройдоол эфаа, арба дахин бага таряан ургаха, – гэжэ дуулгаал.

11Эртэ үглөөнһөө үдэшэ болотор
үзэмэй дараһан архи уужа үнгэргэгшэдтэ гай ушарха!
12Ятаг, хуур, хэнгэрэг, лимбэ!
Найрлан, тэдэ архидана.
Харин Эзэнэй үйлэ хэрэгүүд тухай һананагүй,
хэжэ байгаашыень анхарнагүй.
13Тиимэһээ ойлгодоггүй хадаа арадни
баряанда туугдан ошохо.
Удамаршадынь туража үхэхэ,
хара зониинь ангажа хосорхо.
14Үхэлэй орон тэдэниие хүлеэжэ, амаа үргэнөөр ангайна.
Тиишээ тайжанар, юрын зоншье,
шууягшад, найрлагшадшье ошохол.
15Зон доромжологдон номгорхо,
бардам зантайшуулшье бултадаа галхаха.

16Харин Түмэн Сэрэгтэ Эзэн
үнэн зүбөөр хэрэгүүдые шүүжэ үргэмжэлэгдэхэ,
Арюун Бурхан үнэн шударгаараа
нангин арюунаа харуулха.

17Зон хони малаа хаяад, баряанда туугдан ошохо,
тиихэдэнь хонидынь эзэгүй өөһэдөө тараха,
баяшуулай орхиһон гэрнүүдэй дундуур эшэгэд бэлшэхэ.

18Ай даа, худалай аргамжаар өөрынгөө хойноһоо
мууе татажа ябаашад,
нүгэл шэбэл тэргэдэ хүллөөд,
татажа байгаашад гай тодхорто орохо!
19«Эзэн айладхалаа түргөөр бэелүүлэг лэ,
бидэ тэрэнииень нюдөөрөө харахаяа һананабди.
Израилиин арюун Бурхан түсэбөө бэелүүлэг лэ,
бидэ тэрэнииень лаб мэдэхэеэ хүсэнэбди!» гэжэ тэдэ хэлэнэ.

20Мууе һайн, һайниие муу гэжэ нэрлэгшэ,
харанхые гэрэл, гэрэлые харанхы болгон хубилгагша,
гашууниие амтатай, амтатайе гашуун болгогшо зондо гай ушарха!

21Өөһэдыгөө ехэ сэсэн мэргэн, ухаатайбди гэжэ
һанажа байгаашад гай гасаланда орохо!

22Архиин туулмаг болошонхой,
хатуу архи үзэмэй дараһан архитай худхан уугшад гай гасаланда орохо!
23Эдилгэ абахадаа, гэмтэниие зүб гэһэн шиидхэбэри гаргана,
зүб шударга зониие гэмтэй болгоно!

24Тиимэһээ тэдэнэй үндэһэн һолоомын болон хатаһан үбһэнэй
гал дүлэндэ шатаһандал адли хосорхо,
тэдэнэй сэсэг хатажа, хумхаа тооһон болохо,
юундэб гэхэдэ, тэдэ Түмэн Сэрэгтэ Эзэнэй Хуули буруушаагаа,
Израилиин арюун Бурханай үгэнүүдые тоогоогүй.

25Эзэн Өөрын арад түмэндэ уур сухал боложо,
гараа тэдээн руу һунгажа, сохихо!
Хада ууланууд доһолжо,
үхэһэн зоной хүүрнүүд бог шорой мэтэ үйлсэнүүдээр хэбтэхэ.
Энээнэй удаашье Тэрэнэй уур хилэн унтархагүй,
гарынь һунгаатай зандаа байха!

26Эзэн алас холын үндэһэ яһатаниие урижа, туг үргэхэ,
газар дэлхэйн захаһаа ерэхыень тэдээндэ эшхэрхэ.
Харыт, тиихэдэнь тэдэ шуумар түргэн ерэхэл!
27Тэдэнэй хэншье эсэжэ байхагүй, хэнииньшье бүдэрхэгүй.
Нэгэшье хүниинь дууража-унтажа байхагүй.
Бүһэнүүдынь һуларжа тайлдахагүй,
нэгэшье хүнэйнь гуталай уялаа таһархагүй.
28Тэдэнэй годлинууд хурса, һурша номынь татаатай.
Моридойнь туруунууд сахюур шулуун мэтэ хатуу,
тэргынь мөөрнүүд хуй һалхин мэтэ.
29Дайсанай сэрэгшэд залуу арсалан мэтэ архиржа,
олзоо шүүрэн абахадань, хэншье буляан абажа шадахагүй.
30Тэрэ үдэр тэдэ олзо дээгүүрээ далай мэтэ хүрхирхэ.

Энэ орон нютагые харабал,
Хаб харанхы ба уй гашуудал тэндэ үзэхэш.
Гэрэл унтаржа, шэб харанхы болохо.