‏ Isaiah 54

Эзэн Бурханай энхэргэн дуран

1Иерусалим, ши үхибүү түрөөгүй, үри хүүгэдгүй эхэнэр, хүхин баясыш!
Үхибүү түрэхын зоболон мэдэрээгүй эхэнэр, хүхииш, баярлыш!
Юуб гэхэдэ, хадамда гараагүй эхэнэр хадамтай эхэнэртэ орходоо
тоогүй олон үхибүүтэй байха.
Иигэжэ Эзэн айладхаа.
2Майхангаа үргэдхэгты! Һарабша татагты!
Аргамжануудаа утадхажа, гадаһыень бүхэлэгты!
3Таанад хилэнүүдээ алишье талаһаань үргэдхэхэт.
Ондоо үндэһэ яһатанай газар дайдые уг удамтнай эзэлхэ,
хаягдаһан хотонуудта һуурижаха.
4Бү айгты, эшхэбтэр байдалда дахин орохогүйт.
Бү эшэ, нэрээ бэшэ гутаахагүйш.
Залуу наһандаа нүгэл хэһэнээ мартахаш,
бэлбэһэн эхэнэр боложо, доромжолгодо ороһоноо бэшэ дурсахагүйш.
5Шамайе Бүтээгшэ бол үбгэншни мүн,
нэрэнь – Түмэн Сэрэгтэ Эзэн.
Израилиин арюун Бурхан шинии Абарагша мүн,
бүхы дэлхэйн Бурхан гэжэ нэрлэгдэдэг.
6Израиль, ши үбгэндөө орхигдоһон,
уйдажа байһан залуу һамгандал адлиш.
Гэбэшье Эзэн шамайе дахин һөөргэнь дуудажа, иигэжэ айладхана:
7«Би шамайе агшам зуура орхибошье,
агууехэ хайра үзүүлэн, һөөргэнь абахаб.
8Уурлаһан сагтаа агшам зуур Би шамайе орхёо һэм,
гэбэшье хэтэ мүнхын энэрэл хайраяа шамда үзүүлхэб».
Шамайе Абарагша Эзэн иигэжэ айладана.

9«Нойн үе сагай уһан галаб мэтэ энэ.
Хэзээдэшье бэшэ тэрэ ехэ уһан газар дэлхэйе бүрхөөхэгүй
гэжэ Би тангариглаа бэлэйб,
тэрээндэл адли, шамда уурлахагүй, шамайе зэмэлхэгүйб гэжэ
Би тангаригланаб.
10Хада ууланууд хүдэлжэ, гүбээнүүд доһолжо болохо.
Харин Минии энэрэл хайра шамһаа һалахагүй,
энхэ тайбан тушаа хэлсээгээ хододоо сахин байхаб», –
иигэжэ шамайе энэрэгшэ Эзэн айладажа байна.

Ерээдүй сагай Иерусалим

11Эзэн иигэжэ айладана:
«Иерусалим, ши зобоһон нэгэнши даа!
Һалхи шуурганда сохигдоһон хотош!
Хараарай, Би шамайе оюун шулуугаар барижа,
һуурииешни биндарьяагаар табихаб.
12Сонхонуудыеш улаан болороор,
бартаануудыеш субад эрдэни шулуугаар,
ханыешни үнэтэ шулуугаар бүхэлхэб.
13Улад зониишни һургажа,
урагшатай бэрхэнүүд болгохоб.
14Зүб шударга, эрхэ сүлөө мандажа, шамайе хүсэтэй болгохо.
Дарлалта харшалалгаһаа айхагүйш,
Аюултай һүртэй юумэн шамда ойртохогүй.
15Хэрбээ хэн нэгэн шам руу добтолбол,
Минии зүбшөөлгүйгөөр эдэ бүгэдые эрхилнэ юм.
Урдаһаашни хэншье добтолон ороо һаа, өөрөө унахал!
16Гал хөөргөөр аһаагша, зэр зэбсэг хэгшэ
түмэршэ дарханиие Би бүтээжэ байнаб.
Хюдахын тула Би усадхагшые бүтээнэб.
17Харин ямаршье зэр зэбсэг шамайе шархатаахагүй,
шамайе зэмэлжэ хэлэһэн хүн бүхэндэ харюутайл байхаш.
Би Өөрын зарасанарые аршалхаб,
илалта туйлуулхаб!»
Иигэжэ Эзэн айладана юм.