‏ Isaiah 55

Энэрхы сэдьхэлтэй Эзэн Бурхан

1Эзэн иигэжэ айладхана:
«Ангаһан зон, уһан руу ерэгты!
Мүнгэгүйшье хүн ерэжэ, эдигты!
Ерыт! Үзэмэй дараһан архи, һү мүнгэгүйгөөр абагты!
 2Юуншье бэшэ юумэндэ мүнгэеэ юундэ үрихэбта?
Садхаахагүй юумэндэ салингаа юундэ гаргахабта?
Намайе һайса шагнагты, үгыем дуулагты.
Тиигэбэл, эгээл эрхим эдеэ хоол барихат.
 3Һайса шагнагты, Нам руу ерэгты!
Дуулагты, иигэжэ таанад амиды мэндэ байхат!
Хэтэ мүнхын хэлсээ таанадтай баталхаб,
Давидта найдуулһан үршөөл хайраяа үзүүлхэб.
 4Би тэрэниие арадуудта гэршэ,
арадуудай удамарша ба захирагшаар табяаб.
 5Хариин зониие,
хэзээдэшье мэдээ-таняагүй арадуудые таанадай дуудахада,
тэдэ тан руу шамдан ерэхэ.
Минии, таанадай Эзэн Бурханай,
таанадые алдаршуулһан Израилиин арюун Бурханай
түлөө эдэ бүгэдэ хэгдэхэ».

6Эзэндээ эрьен мүргэгты,
мүнөө Тэрэ таанадай ойрохоно.
 7Муу хүн тэрэ замаа орхиг,
нүгэлтэй хүн һанаа бодолоо хубилгаг,
Эзэн руу эрьег лэ! Тэрэ хүлисэхэ.
Манай Бурхан хүлисэхэ уужам сэдьхэлтэйл.

8Эзэн иигэжэ айладана:
Минии һанаа бодол таанадайхидал адли бэшэ,
Минии харгы зам таанадһаа ондоо.
 9Огторгойн газарһаа үндэртэл,
Минии зам, бодолнууд танайхиһаа үндэр.
 10Бороо, саһан тэнгэриһээ буугаад һөөргөө бусадаггүйдэл,
ургамалай ургаха, тариха болон эдихэ орооһо үршөөхыень
газар ундалуулдагтал,
 11Минии айладаһан үгэ Намдаа һөөргөө бусадаггүй,
һанаһан юумыемни бүтээдэг,
Минии эльгээһэн зорилгонуудые дүүргэдэг.

12Таанад баяртайгаар гаран ошохот,
амар амгалан үдэшүүлхэт.
Уула гүбээнүүд баярлан дуулалдаха,
талын бүхы модод альгаа ташаха.
 13Үргөөһэнэй орондо нарһан,
халаахайн орондо мирт ургаха.
Энэ болбол Минии, Эзэнэй, алдар солын хэрэг болохо,
Минии үйлэ хэрэгүүд тушаа
хэтэ мүнхын гэршэ тэмдэг болохо.
Copyright information for BxrBBL2024