‏ Isaiah 56

Бүхы үндэһэ яһатан Эзэнэй арад болохо аргатай

1Эзэн иигэжэ айладхана:
«Шударга ёһо сахин, үнэн зүбые үйлэдэгты.
Һаяар таанадые абархаб.
 2Амаралтын үдэрые хазагайруулангүй сахигша,
муу үйлэ хэхэһээ тэбшэгшэдые юрөөн байхаб».

3Эзэнэй арад түмэнтэй ниилэһэн хариин хүн
«Эзэн намайе Өөрынгөө зонһоо илгана» гэжэ бү хэлэг.
Тайган хүн «Хатаһан модонби» гэжэ бү хэлэг.
 4Эзэн иимэ тайган хүндэ иигэжэ айладхана:
«Амаралтын үдэр сахижа,
Намда таарамжатай юумэ шэлэн, хэлсээгээ сахин,
Намайе хүндэлжэ байгаа һаатнай,
 5таанадай нэрэнүүдые Минии нангин үргөө соо
удаан сагта дурдан байха,
үхи хүүгэдтэй байжа, нэрэеэ нэрлүүлһэнһээ үлүүгээр
таанадые хэтэ мүнхэдөө зон дурдахал».
 6Эзэнэй арад түмэнтэй хамтаржа,
Эзэндэ алба хэжэ, дурлажа,
амаралтын үдэр нангинаар сахин,
хэлсээгээ дүүргэгшэ хариин зон тушаа
Эзэн иигэжэ айладхана:
 7«Би таанадые Өөрын нангин уула руу асархаб,
Намда зальбардаг үргөө соо тэдээндэ баяр үршөөхэб,
үргэлэй шэрээ дээрэ дурадхаһан түгэс шатаалта үргэл болон
бусад үргэлнүүдыетнай дуратайгаар абахаб.
Минии гэр бүхы үндэһэ яһатадай зальбарха
мүргэл зальбаралай гэр гэжэ нэрлэгдэхэ».

8Таран бутарһан Израилиин арад зониие суглуулагша Эзэн Бурхан
үшөө олон зониие асархаб гэжэ найдуулна.

Израилиин удамаршад һохор

9Хариин зоной ерэжэ, Өөрынь арад түмэниие
хээрын ан арьяатандал адли зооглохыень Эзэн захирна.

10Тэрэ иигэжэ айладхана:
Арад зониием һэргылхэ үүргэтэй ударидагшадынь һохор!
Юушье мэдэнэгүй!
Тэдэ бултадаа хусажа шададаггүй, гансал унтадаг,
һанаандаа гоёор зураглан хэбтэдэг нохойнуудта адли!
 11Тэдэ болбол садахаа мэдэхэгүй,
өөрын олзо оршодо шунахайрһан нохойнууд гээшэ.

12«Ерэгты. Үзэмэй дараһан архи абажа, һогтотороо ууя.
Мүнөөдэрэйхидэ орходоо үглөөдэр үшөө ехэ үзэмэй дараһан архи олдохол!» гэжэ
эдэ архинша удамаршадынь хэлэнэ.
Copyright information for BxrBBL2024