‏ Isaiah 57

Шүтөөнүүдтэ мүргэхэ гээшэ жэгшүүритэй

1Зүб шударга хүнэй наһа барахада,
хэншье энэ ушар ехэ тоожо байдаггүй.
Үршөөл хайратай зон наһа барана,
юундэ энэ болоноб гэжэ хэншье мэдэнэгүй.
Зүб шударга хүн муу юумэнһээ зайлана.
2Һайнаар наһаа үнгэргэһэн зон нүгшэхэдөө
амар амгалан боложо амардаг.
3Харин таанад, нүгэл хэгшэ зон,
наашаа дүтэлэгтылши!
Таанад эльбэ жэльбэшэнһээ, һальхай ябадалтайшуулһаа,
янхан эхэнэрнүүдһээ дээрэ бэшэт!
4Хэниие таанад шоо үзэнэбта?
Хэнэй урдаһаа амаа ехээр ангайн дуугарнабта?
Таанад гэмтэнэй, худалшанай үри һадаһад гээшэт.
5Һаглагар модод доро хурисал хэжэ байһандал,
шүтөөнүүдтэ мүргэл хэжэ,
хадын жалгаар, горхоной хажуугаар
үхи хүүгэдээ аладаг бэшэ гүт?

6Мэлигэр шулуунуудые тэндэһээ абажа,
бурхадта мэтээр тэдээндээ мүргэдэгта.
Үзэмэй дараһан архи үргэжэ, талханай үргэл тэдээндэ дурадханат.
Энээниие үзэжэ байхадаа
Би һанаа амар байха аалби?
7Үндэр, мантан хада уула дээрэ ороо зохёожо,
өөдөө гаража, үргэл үргэнэт.
8Үүдэнэйнгээ саада тээ шүтөөнүүдээ табинат.
Тиигээд Намайе орхижо, бэеэ нюсэгэлөөд,
хурисал үзэхэеэ тэдэ шүтөөнүүдтэеэ хэбтэнэт.
9Аятай үнэртэй тоһо түрхеэд, шүтөөндэ зальбархаяа ошонот.
Ямар бурханда мүргэхэеэ бэдэржэ,
элшэнэрые аяар үхэлэй орон хүрэтэр эльгээнэт.
10Удаан сагта бурхадые бэдэржэ, аян замдаа ядарбашье,
бусадаггүй бэлэйт. Хүсэ тэнхээгээ һэргээн, һуларангүй ябаат.

11Эзэн иигэжэ айладхана:
«Намайе сэдьхэлдээ хадагалжа байнгүй,
худал хэлэжэ байхадаа таанад ямар бурхадһаа айдаг болообта?
Удаан сагта абяа шэмээгүй байһандам Намһаа айхаяа болёо гүт?
12Таанад зүб юумэ хэнэбди гэжэ һананат,
харин Би бурууетнай харуулхаб,
тиихэдэм шүтөөнүүдтнай танда туһа хүргэхэгүй.
13Орилжо байхадатнай шүтөөнүүд таанадта туһалаг лэ!
Һалхин тэдэниие бултыень хиидхүүлхэ.
Харин Намда этигэгшэд газар дэлхэйе эзэмдэхэ,
Минии нангин уулые эзэлэн байха юм».
14Эзэн иигэжэ айладхана:
«Минии арад түмэнэй Нам руугаа бусахадань туһалагты.
Харгы зам жэгдэлэгты.
Харгы дээрэ байгша һаалта зүйлнүүдые үгы хэгты.

15Би болбол хэтэ мүнхэдөө оршогшо
үндэр болон арюун Бурхан гээшэб.
Үндэр, нангин газарта оршодогшье һаа,
Би даруу зантай, гэм зэмээ мэдэрдэг зонтой хамта байнаб.
Иигэжэ Би тэдэнэй зориг, этигэл һэргээнэб.
16Би зониие хэтэ гэмнэжэ байхагүйб,
уур хилэмни таһалгаряагүй бэшэ.
Ондоо байгаа бол Минии урда тэдэнэй һүлдэ,
Минии байгуулагша халуун амид хүсэгүй болохо бэлэйл.
17Тэдэнэй хомхой хобдог байһанда, нүгэл хэхэдэнь
Би уурлажа, тэдээнһээ арсаа бэлэйб.
Теэд тэдэ юушье ойлгоогүй, үсэд нэтэрүүгээр
тэрэ нүгэлтэй замаа үргэлжэлүүлээ.
18Тэдэнэй үйлэ хэрэгүүдые Би харанаб,
гэбэшье Би тэдэниие эдэгээхэб.
Тэдэниие хүтэлжэ, туһалхаб,
гашуудан уйлалдагшадай һанаа тэгшэрүүлхэб.
19Холо, ойрын зондо бултандань энхэ тайбан байдал үршөөнэб.
Өөрын арад зониие аргалхаб.

20Харин муу зон бурьялжа байһан далайдал адли –
тэрэ амар заяа мэдэхэгүй, долгидынь шааян,
элдэб хог, шабар шэдэлэн гаргажал байха юм.

21Нүгэл хилэнсэгтэй зондо ямаршье
амар амгалан байхагүй».
Иигэжэ Бурхамнай айладхажа байна.