‏ Isaiah 58

Яагаад масаг барихаб?

1Эзэн иигэжэ айладхана:
«Шадахысаа шангаар хашхарагты!
Дуу хоолойтнай үхэр бүреэгэй дуундал шанга байг!
Минии арад түмэн, Яковай зондо нүгэл тушаань дуулгагты!

2Тэдэ үнэн зүбые үйлэдэдэг,
Бурханайнгаа хуули мартаагүй үндэһэтэн мэтэ
Намда үдэр бүри мүргэдэг.
Тэдэ Минии хуули ёһо заабарилхыемни тодон абадаг мэтэ,
Намда ехэ дуратайгаар мүргэдэг мэтээр хэлэдэг».
 3Зон иигэжэ асууна:
«Маанадай масаг барихые Эзэн Бурханай харадаггүй һэн тула
юундэ үлэсхэлэн хооһон байха болонобибди?
Даруу номхон байһыемнай Тэрэ мүн лэ анхарнагүйл».
Эзэн тэдээндэ иигэжэ харюусана:
«Масаг бариха үедөө таанад
өөһэдынгөө аша туһа гансал харанат.
Барлагуудтаа хүндэ ажал хүүлэжэ, мүлжэнэт.
 4Масаг барихадаа таанад хүсэтэй боложо,
хэрэлдэжэ, наншалданат.
Иигэжэ масаг баринабди гэжэ байхадатнай
Би таанадай гуйлтануудые дуулаха ааламби?
 5Өөрыгөө зобоожо, толгойгоо гунхуулан, үнэһэн дээрэ хэбтэжэ,
таар үмдэхэдэтнай Би сэдьхэлээ хананги байха аалби?
Энээниие масаг барилга гээд нэрлэмээр гү?

6Яагаад масаг барихаб гэжэ Минии шэлэһэн түхэл янзань:
дарлалтын гэнжэнүүдые, хөөмэгшын ооһор таһалжа,
дарлалтада байһан зониие сүлөөдэ табигты.
 7Үлэсхэлэн хооһонтой эдеэ хоолоо хубаалдан,
орохо гэргүй ядуу зониие гэртээ оруулагты.
Хубсаһагүй зониие харабал, хубсалуулагты,
түрэлхидтөө туһалагты.
 8Тиигэбэлтнай, Минии гэрэл таанад дээрэ
үүрэй толон мэтэ сасаржа,
шархатнай түргөөр эдэгэхэ.
Би хододоо таанадтай байхаб, абархаб,
хаа-хаанагүй таанадые хамгаалжа ябахаб.
 9Намда зальбархадатнай, Би дуулахаб.
Намда хандахадатнай, Би харюу үгэхэб.
Дарлалтые болюулжа, бардам бүдүүрхүү зан гаргахаяа,
муу үгэ хэлэхэеэ болиходотнай,
 10үлэсхэлэн хооһон хүндэ эдеэ хоол үгэжэ,
хэрэгтэй юумээрнь зониие хангахадатнай,
хажуугаартнай байгша харанхы үдын тэнгэй һаруул
гэрэл мэтэ болон хубилхал.
 11Тиихэдэ Би таанадые хододоо ударидажа,
ган гасуурайшье үедэ хэрэгтэй юумээртнай хангажа,
бэеытнай шанга болгожо байхаб.
Таанад уһалһан сэсэрлиг мэтэ,
шэргэшэгүй булаг мэтэ болохот.
 12Танай зон эртэ урдын сагта һандарһан хотонуудые һэргээхэ,
урданай сагай һандарһан гэрнүүдые дахин бодхоохо.
Сүмэрһэн хана заһабарилагша,
ажаһуудалай гудамжануудые һэргээгшэ гээд
тэдэниие нэрлэдэг болохо».

Амаралтын үдэр сахиһанай түлөө шагнал

13Эзэн иигэжэ айладхана:
«Хэрбээ таанад амаралтын үдэрые нангин гэжэ сахин,
өөрынгөө дураар юушье тэрэ үдэр хэхэһээ татагалзабал,
амаралтын үдэрые хүндэлжэ, ажал хэнгүй,
аян замда гарангүй, миин хии дуугаржа байнгүй байбал,
 14таанад Намда мүргэжэ, баярта хүртэхэт.
Би таанадые хада ууланууд өөдэ гаргахаб,
элинсэг эсэгэтнай болохо Яковта
Минии үгэһэн орон нютагаар сэдьхэлээ ханан байхат.
Энэ болбол Би, Эзэн, айладхана мүн!»
Copyright information for BxrBBL2024