‏ Isaiah 59

Зоной нүгэл шэбэл тушаа

1Эзэн таанадые абаржа шадахагүй, дан хүсэгүй гү,
али таанадай туһаламжа эрин дуудаһые дуулахагүй
дүлии гэжэ бү һанагты.
2Нүгэлһөөтнай боложо Тэрэ таанадые дууланагүй,
таанадай гэм зэмэ Бурхантай таанадые хахасуулаа.
3Таанад хүниие алажа, буруу шүүжэ,
худалаар хэлэжэ, нүгэл хээт.

4Хэншье зүб шударга юумэнэй түлөө тэмсэнэгүй,
хооһон, худал юумэ хэлэнэ.
Муу муухай хэрэгүүдые түсэблэжэ, тэрэнээ бэелүүлнэт!
5Таанадай муу муухай түсэбүүд
хорото могойн үндэгэд мэтэ хоротой.
Тэрэ үндэгэ тэһэлээ һаа, досооһоонь могой гарана!
6Теэд таанадай энэ муухай түсэбүүд
абаахайн шүлһөөр нэхэгдэһэн хубсаһандал
ямаршье туһагүй, удхагүй!
7Гүйдэлөөрөө муу муухай хэрэгүүдые хэнэт,
ямаршье зэмэгүй зониие аланат.
Һанаан бодолтнай хилэнсэгтэ,
харгы замтнай – сүйд, эбдэрэл.
8Энхэ тайбан байдал таанад найруулжа шадахагүйт,
зүб шударга хэрэгшье үгы. Харгы замтнай һарюу,
хойноһоотнай ябагшад оройдоошье амар амгалан байгаагүй.

Зон нүгэлтэйгөө мэдэрнэ

9Зон иигэжэ хэлэнэ:
«Тиимэһээл үнэн шударга бидэнһээ холо байна,
үнэн зүб бидэндэ хүрөөгүй.
Бидэ гэрэл хүлеэгөөбди, теэд гансал харанхы хаа-хаанагүй байна.
Толон хүлеэгөөбди, теэд бүрэн соо түгэншэлнэбди.
10Бидэ һохор зон мэтэ хана тэмтэрэн,
нюдэгүй мэтэ гараараа барин ябанабди,
үдын тэн багаар бүрэнхы байдалда байһандал бүдэрнэбди,
элүүр энхэ зоной дунда үхэһэн хүнүүдтэ адлибди.
11Бидэ бултадаа баабгай шэнги бүрхирнэбди,
тагтаа шэнги ёолонобди.
Үнэн шударгые хүлеэгөөбди, харин тэрэ үгы,
абарал хүлеэгөөбди, теэд тэрэ холо.
12Эзэн Бурхамнай, Танай урдаһаа
маанадай хэһэн гэм зэмэ олон,
манай нүгэлнүүд өөһэдыемнай муу болгон гэршэлнэ.
Бидэ тэдэниие һайн мэдэнэбди.
13Бидэ Танай урдаһаа һөөргэдөөбди, Таниие орхёобди,
Танһаа буруу хараабди.
Һанаан бодолнай буруу, үгэнүүднай худал.
14Зүб шударга ёһо хойшоо хаягдан, үнэн зүб холодобо.
Үнэн гудамжа дээрэ бүдэржэ, үнэн сэхэ ябадал
нэбтэрэн эндэ орожо шадахагүй байна.
15Үнэн зүб үгы болоо. Муу муухайһаа холодогшод
өөһэдөө хүнэһэн болоно.
Зарга шүүбэриин үгы болоһые Эзэн хараад, нюдэдынь балартаа».

Өөрын арад зониие абарха

Эзэн энээниие хараад, зүб шударга ёһын үгы болоһондо
сухалаа хүрөөд байна.
16Дарлалта доро байһан хүндэ туһалха хэнэйшье үгы байһые
Эзэн гайхан хараба. Тиимэһээ Тэрэ
Өөрынгөө хүсэ шадал хэрэглэн,
дарлалтада байгшадые абарна.
17Тэрэ үнэн зүбые хуяг мэтэ үмдэжэ,
абаралые дуулга мэтээр толгой дээрээ табиба.
Тэрэ зонһоо үһөөгөө абаха шанга хүсэлдэ нэрбэгдэбэ.
18Тэрэ дайсадаа хэһэн хэмээрнь хэһээхэ,
аяар холын орон нютагуудаар ажаһуугшадыешье
мартангүй хэһээхэл.
19Зүүн зүгһөө баруун зүг хүрэтэр бүхы зон
Тэрээнһээ, асари ехэ һүр һүлдэһөөнь айха.
Голой урасхал, шанга һалхин мэтэ Тэрэ буухал.
20Эзэн иигэжэ айладхана:
«Сионой зондо болон муу муухайһаа зайлагша Яковай үринэртэ
Абарагша заларха.
21Би тэдэнтэй энэ хэлсээ баталхаб.
Шам дээрэ оршогшо Минии Һүлдэ,
амандашни Минии хэгшэ үгэмни хододоо шинии,
үри һадаһадайш, тэдэнэйшье уг удамай аманда
мүнөөнһөө эхилэн хэтэ мүнхэдөө оршог!»