‏ Isaiah 61

Гай зоболонһоо һалаха тухай

1Эзэн Бурханай Арюун Һүлдэ досоомни оршобо.
Тэрэ намайе шэлэн,
үгытэй зондо һайн мэдээ дэлгэрүүлхын,
зүрхэнэй шархатай зониие эдэгээхын,
баряанда байгшадта эрхэ сүлөө,
түрмэдэ хаагдаатай зондо түрмын үүдэнэй нээгдэхэ тушаа
соносхохыемни томилһон юм.
 2Эзэнэй Өөрынгөө арад түмэниие абарха,
дайсадыень һүнөөхэ таарамжатай сагай ерэһэн тушаа
минии тунхаглахые,
гашуудан уйлагшадые аргадахыемни Тэрэ эльгээгээ.
 3Сион уула дээрэ гашуудан уйлалдагшадта
үнэһэнэй орондо гоёолто,
бархираанай орондо баяр баясхалан,
гай гасаланта шэг шарайн орондо гоёлой хубсаһан
үгтэхэ гэжэ минии хэлэхые Тэрэ эльгээгээ.
Эзэн Бурханай алдар солынгоо тула Өөрөө һуулгаһан модод мэтэ тэдэ болохо,
зүб шударга хэрэгүүдые үйлэдэхэ.
 4Тэдэ зон эртэ урда сагта һандарһан хотонуудые һэргээн бодхоохо.

5Минии угсаатан, шагнагты!
Хариин зон ерэжэ,
мал һүрэгүүдыетнай адуулжа,
таряалан, үзэмэй модоной сэсэрлигүүдтэтнай ажаллан байха.
 6Харин таанад Эзэнэй санаартад,
манай Бурханай зарасанар гэжэ нэрлэгдэн,
бусад арадуудай баялиг эдлэн,
тэдэнэй алдар соло таанадта хүртэхэ.
 7Доромжолуулдаг сагтнай дүүрээ.
Таанад өөһэдынгөө газар дайда дээрэ ажаһуужа,
хоёр дахин ехээр эд баялигтнай нэмэхэ,
хэтэ мүнхэдөө баясан баярлан байхат.

8Эзэн иигэжэ айладхана:
«Би зүб шударга ёһо гуримда дуратайб,
дарлалта, дээрмэдэлгэ үзэн ядадагби.
Хэһэн хэрэгүүдэйнь хэмээр шагнал Өөрын арадта үгэхэб,
хэтэ мүнхын хэлсээ тэдээнтэй баталхаб.
 9Үндэһэ яһатадай дунда тэдэ мэдээжэ болохо.
Тэдэниие хараһан хүн бүхэн
Эзэнэй юрөөһэн арад түмэн гэжэ ойлгохо».

10Эзэнэй үйлэ хэрэгүүдтэ Иерусалим баясана.
Түрэ хуримай хубсаһа үмдэһэн, хадамлагдажа байһан басаганда адлил тэрэ!
Бурхан Иерусалимые абаралай болон зүб шударгын хубсаһаар хубсалуулаа.

11Үрэ хүрэнгэһөө ургаса гарадагтал,
Эзэн Бурхан Өөрын арадые абархаб гэһэн үгэеэ дүүргэхэ,
тиигээд бүхы үндэһэ яһатанда магтуулха.
Copyright information for BxrBBL2024