Isaiah 64
Маанадые зоболондо нэрбүүлхэтнай гү, Эзэн?
1Оо, огторгойе хаха татан буугаа гээшэ һаатнай!Хада ууланууд урдатнай доһолхо байгаал!
2Бургааһанай гал дүлэндэ абтадагтал,
уһанай гүсэ соо бусалдагтал,
үндэһэ яһатад Танай ерэхэдэ доһолхо, шэшэрхэл!
Өөрынгөө хүсэ шадал дайсадтаа харуулыт!
Үндэһэ яһатадые шэшэрүүлыт!
3Манай хүлеэгөөгүй үйлэ хэрэгүүдые Та хэзээ нэгэтэ хээ бэлэйт.
Уруудан буухадатнай, хада ууланууд энээниие хаража,
айн шэшэрээ һэн.
4Этигэн найдаһан зоной аша туһа харан,
иимэ үйлэ хэрэгүүдые хэдэг Тандал адли Бурхан тушаа
бидэ хэззээшье дуулаагүй бэлэйбди.
5Үнэн зүб хэрэг баяртайгаар үйлэдэгшэ,
Танай һургаалаар ажаһуухые оролдогшо зониие Та энхэрэн угтанат.
Бидэнэй нүгэл хэжэл байхада, Та уурлабат.
Бидэ яажа абарагдахабибди?
6Бидэ бултадаа бузартай зүйлнүүдтэ адли болообди,
бидэнэй һайн хэрэгүүд муухай болоһон хубсаһандал адли.
Набша мэтэ хатажа байнабди,
гэмтэ хэрэгүүднай һалхин мэтэ маанадые тууна.
7Хэншье Танһаа юумэ гуйнагүй, хэншье туһа эринэгүй.
Та манай нүгэлнүүдһээ боложо,
маанадһаа Өөрыгөө нюужа арсабат.
8Гэбэшье, Эзэн, Та манай Эсэгэт.
Бидэ шабар мэтэ, харин Та шабараар амһарта бүтээдэг хүн мэтэт.
Бидэ бултадаа – Танай бүтээлнүүд мүн!
9Эзэмнай, дан ехээр бидэндэ бү уурлыт даа,
нүгэлыемнай ходо бү дурсыт. Бидэ бүгэдэ Танай арад түмэн гээшэлди.
10Танай нангин хотонууд хооһон сүл губи болоо.
Сион сүл губи болоо. Иерусалим эзэгүйрөө.
11Үбгэ эсэгэнэрэймнай Танда магтаал үргэдэг газар –
манай нангин үзэсхэлэнтэ үргөө гал дүлэндэ шатаа.
Манай дуратай газарнууд һандаргагдаа.
12Эзэмнай, энээниие хараад, сэдьхэлтнай үбдэнэгүй гү?
Та саашадаашье абяа дуугүй зандаа,
тэрэл зангаараа маанадые хэһээһээр лэ байха гүт?!
Copyright information for
BxrBBL2024