‏ Isaiah 65

Үгыень дууладаггүй зониие Тэрэ хэһээхэ

1Эзэн иигэжэ айладхана:
Намайе гуйгаагүй зондо Би Өөрыгөө элирхэйлээб,
Намайе бэдэрээгүйшүүлдэ Өөрыгөө олуулааб.
Нэрыем дуудаагүй арад зондо
«Би эндэ байнаб! Би эндэб!» гэжэ байгааб.
2Муу зам даган, өөрын һанаһаар ажаһуудаг,
хүнэй үгэ дууладаггүй арад руу бүхэлиин үдэрөө гараа һунган байгааб.
3Теэд тэдэ Минии хараһаар байтар Намайе доромжолон,
тахилтай ой модон соо үргэл үргэн,
хирпиисэнүүд дээрэ уталга ууюулан байна.
4Һүниндөө тэдэ нюуса газарнууд, хүүрнүүд руу ошожо,
үхэһэн зонһоо зүбшэл асууна.
Гахайн мяха, бузартай шүлэ тэдэ гаргана.
5Удаань тэдэ иигэжэ бусадта хэлэнэ:
«Зогсогты, маанадта бү дүтэлэгты.
Бидэ таанадта орходоо арюун гээшэбди».
Би тэдэниие тэсэхэгүй байнаб,
уур хилэмни хэзээдэшье унтархагүй түймэр мэтэ.
6Би тэдэниие яажа хэһээхэеэ бэшэжэ абанхайб.
Дуугай байхагүйб, хэһэн хэрэгэйнь түлөө үһөөгөө абахаб.
7Өөһэдэйнь болон үбгэ эсэгэнэрэйнь нүгэлэй түлөө үһөөгөө абахаб.
Тэдэ хада ууланууд дээрэ уталга ууюулжа, Нам тушаа муугаар хэлээ һэн.
Хэһэн хэмээрнь тэдээндэ хэһээлтэ амасуулхаб.

8Эзэн иигэжэ айладхана:
Үзэмэй модоной мүшэр шүүһэтэй байбал,
тэрээн тушаа «бү һалгаагты, тэрэ үреэлтэй» гэдэг.
Бишье Өөрын арад түмэниие бултыень усадхахагүйб,
Намда мүргэдэг зониие абархаб.
9Яковта үри үршөөхэб.
Иудын уг удамынь хадалиг Минии орон нютагые
үеһөө үедэ эзэлэн байха.
Намда мүргэдэг зон тэндэ ажаһууха.
10Минии арад түмэн Намда зальбаран,
Шароон газар руу хонидоо,
Ахоорой нюруу газар руу үхэрөө туужа адуулдаг байхал.

11Харин Намайе тоонгүй, Нангин уулыем мартан,
Гаад болон Мени гэдэг бурхадта зальбарагша таанадта
12һэлмээр сабшагдан үхэхэ үхэл бэлдэнхэйб.
Таанадые үбдэглүүлээд сабшаха!
Минии дуудахада, харюусаагүйт, айладахадамни, дуулаагүйт.
Таанад муу хэрэг үйлэдэн, Намда таарамжагүй юумэ шэлэһэн байнат.

13Тиимэһээ Би, Эзэн Бурхан, таанадта иигэжэ соносхоноб:
Намда һүгэдэн зальбардаг зон эдихэ хоол,
ууха ундаар элбэг-дэлбэг байхадань,
таанад гэдэһээ үлдэжэ, ангажа байхат.
14Тэдэ баясан хүхилдэн байха,
харин таанад сүхэрэн-орилон байхат.
15Минии һунгаһан зон танай нэрэ хараал мэтээр хэлэдэг болохо.
Би, Эзэн Бурхан, таанадые хюдахаб.
Харин Намда һүгэдэн мүргэдэг зондо шэнэ нэрэ үгэхэб.

16Дэлхэй дээрэ байгшадай хэн нэгэн юрөөл тушаа гуйбал,
бодото Бурханһаа юрөөл гуйха.
Шахаа тангариг үргэхэеэ һанаһан хэн нэгэн
үнэнхэ Бурханай урда тангариглаха.
Урданай зоболонгууд мартагдаха.

Шэнээр бүтээхэнь

17Эзэн иигэжэ айладхана:
«Харагты, Би шэнэ огторгой, шэнэ газар бүтээнэб.
Урданай юумэн һанаандашье орохогүй.
18Таанад Минии бүтээжэ байгаа юумэндэ хүхилдэн,
хэтэ мүнхэдөө баясан байхат.
Минии бүтээжэ байгааша Иерусалим
хүхюун зугаагаар билтаржа,
арад зониинь баяраар халин байха.
19Иерусалимда баярлан, арад түмэндөө баясажа байхаб.
Тиигээд тэндэ уйлаха, туһа эрин орилхо абяан
саашадаа бэшэ дуулдахагүй.
20Нарай нялханууд нарайдаа һамшахагүй,
зон бултадаа наһалха наһаяа эдлэхэ.
Зуу наһалаад үхэһэн хүн залуу гэжэ тоологдохо,
харин энэ наһа наһалангүй урид нүгшэһэн хүндэ
Минии хараал хүрөө гэжэ хэлсэгдэдэг байха.
21Зон гэрнүүдые барижа, тэндээ ажаһууха.
Тэдэ мүн лэ үзэмэй модоной сэсэрлиг һуулгажа, үрэ жэмэсынь эдихэ.
22Ондоо хүн тэрэ бариһан гэрнүүдтэнь ажаһуухагүй,
ондоо зон тариһан мододһоонь эдижэ байхагүй.
Мододтол адли, зомни удаан ажаһууха,
ажалайнгаа үрэ шэмэ өөһэдөө эдлэхэ.
23Тэдэ дэмы хооһон ажаллахагүй,
түрэһэн үхи хүүгэдынь зоболонтой ушархагүй.
Би тэдэниие мүн уг удамынь саашанхи үе сагуудта юрөөхэб.
24Тэдэнэй Намда зальбаран,
гуйлтаяа дууһан хэлэжэ үрдеэдүй байтар
Би харюу үгэдэг байхаб.
25Шоно хурьгадтай хамта бэлшэхэ,
арсалан үхэр мэтэ һолоомо эдихэ,
шорой могойн хоол болохо.
Минии нангин уула дээрэ ямаршье муу,
хорото хэрэг ябуулагдахагүй».