Isa 7 | BxrBBL2024 | STEP | Уззияа гэгшын аша, Ётаамай хүбүүн Ахаазай Иудын хан түрые зонхилжо байһан үедэ дайн дажар болоо һэн. Араамай хаан Рэциин ба Израилиин хаан, Рэмаалияагай хүбүүн Пээкаа Иерусалимда дайлаба, гэбэшье эзэлэн абажа шадабагүй.

‏ Isaiah 7

Ахааз хаанда мэдээсэл

1 Уззияа гэгшын аша, Ётаамай хүбүүн Ахаазай Иудын хан түрые зонхилжо байһан үедэ дайн дажар болоо һэн. Араамай хаан Рэциин ба Израилиин хаан, Рэмаалияагай хүбүүн Пээкаа Иерусалимда дайлаба, гэбэшье эзэлэн абажа шадабагүй.

2 Эпрааимай газар дайдада Араамай сэрэгэй ороод байһан тухай мэдээсэл Давидай гэр бүлэдэ дуулдахадань, Ахааз хаан арад зонтоёо хамта һалхинда найгажа байһан ойн модод мэтэ шэшэрэлдэн айба.

3 Тиихэдэнь Эзэн Исайда иигэжэ айладхаба:

– Ши Шэһаар-Яшууб ^{▼▼ Шэһаар-Яшууб – эхэ еврей хэлэн дээрээ «Үлөөшэнь бусаха» гэһэн удхатай.} хүбүүнтэеэ хамта Ахааз хаанай урдаһаа ошо. Бүд шэрдэдэг газар руу ошогшо харгыда, дээдэ сөөрэмһөө татаатай уһанай татуурай эсэстэ тэрээнтэй ушархат.

4 – Зүрхэеэ хөөрэнгүй, номгон даруу, айнгүй бай, – гэжэ тэрээндэ хэлээрэйгты, – Рэциин хаан араамшуудтайгаа хамта ба Рэмаалияагай хүбүүн – ууяжа-унтаржа байһан хоёр модон гээшэ, уур сухалаар дүрэлзэбэшье, сүйд хэхэ бэшэ. 5 Араамшууд эпрааимуудтай, Рэмаалияагай хүбүүнтэй хамта шинии урдаһаа хорото хэлсээ байгуулаа. Тэдэ иигэжэ хэлэнэ: 6 «Иудын хан түрэ руу шэлжэн орожо, арад зониие айлган һүрдүүлжэ, газар дайдыень өөһэдөө хубаан абаад, тэндэ Табээлэй хүбүүе хаанаар табия».

7 Харин Би, Эзэн Бурхан,
иимэ юумэн болохогүй, бүтэхэгүй гэжэ соносхоноб.
8 Араамые Дамааск зонхилно,
Дамааскые – Рэциин.
Жаран табан жэл үнгэрхэ – Эпрааимай арад үгы болохо.
9 Эпрааимые Самари зонхилно,
Самариие – Рэмаалияагай хүбүүн.
Танай этигэл бата бэшэ һаа,
таанад бата бэхи зогсоногүй гээшэт!

Эзэнэй дүлгэ тэмдэг – Эммануил

10 Удаань Эзэн Ахаазта дамжуулха үшөө нэгэ иимэ мэдээсэл айладхаба:

11 – Ямар нэгэ дүлгэ тэмдэг үгэхыемни Намайе, өөрынгөө Эзэн Бурханиие, гуйгты. Гүн доро гү, али үндэртэ нэгэ юумэнэй болохые гуйгты.

12 Харин Ахааз иигэжэ харюусаба:

– Би гуйхагүйб. Эзэниие туршажа байхагүйб.

13 Тиихэдэнь Исай иигэжэ хэлэбэ:

– Давид хаанай үри һадаһад, одоо шагныта! Зоной тэсэбэри туршажа байхатнай таанадта багадаад, Бурханайшье тэсэбэри туршажа-шалгажа байхаяа һанаба гүт?! 14 Зай, тиигээ хадатнай Эзэн Өөрөө таанадта дүлгэ тэмдэг үгэхэ.

Анхарагты! Басаган ^{▼▼ Хуушан еврей хэлэн дээрэ «алма» – «залуу басаган, залуу эхэнэр».} хээлитэй болоод, хүбүү түрэхэ, тэрээниие Эммануил ^{▼▼ Эммануил – еврей хэлэнһээ оршуулхада, «Бурхан бидэнтэй хамта» гэһэн удхатай.} гэжэ нэрлэхэ. 15 Һайе мууһаа илгаруулжа шададаг Тэрэнэй болоходо, зөөхэй, зүгын бала эдеэ хоолынь болохо. 16 Һайе мууһаа илгаруулжа шададаг Тэрэнэй болоодүй байтар таанадай айдаг тэрэ хоёр хаашуулай орон нютагууд хооһорхо.

17 Гэбэшье Иудын хан түрэһөө Эпрааимай таһарһан сагһаа хойшо үзэгдөө-харагдаагүй гай гасаланта үдэрнүүдые Эзэн таанадта, улад зондотнай, гэр бүлэдэтнай тохон тохёолдуулхань. Тэрэ юун бэ гэхэдэ, Ассириин хааниие Тэрэ асархань.

18 Тэрэ сагай тохёолдоходо,
Нилэй эгээл холо углуу тохойһоо
аляаһад мэтэ ниидэн ерэхыень Египедэй сэрэгтэ,
зүгы мэтэ бөөгнэрэн ерэхыень Ассириин сэрэгтэ
Эзэн эшхэрэн, дохёо тэмдэг үгэхэ.
19 Дайсад ерэжэ, эзэгүй хооһон хүндыгөөр,
хабсагайн хабшуу газараар, үүргэнын һөөгүүдөөр болон
бүхы уһатай газарнуудаар буудаллан буужа эзэлхэ.

20 Ассириин гараар Эзэн Иудын хан түрые хэһээхэ.
Тэрэ Ассириин хааниие үһэ заһагша мэтээр хэрэглэжэ,
дороһоо дээшэнь бултыень –
хүлэйтнай, толгойнтнай үһэ зүһэ,
һахал һамбай хюһан абаха.

21 Тэрэ сагта гэр бүлэ оройдоол нэгэ гунжан үнеэ,
хоёр ямаа баридаг болоошье хадаа,
22 элбэг-дэлбэг һүтэй байха, зөөхэйгөөр ядархагүй!
Энэ орон нютагта үлөөшэ зон
зөөхэйгөөр, зүгын балаар таһалдахагүй! ^{▼▼ Газар элдүүрилжэ амидардаг арадта энэ хадаа ехэ таагүй байдал тохёолдохо гэһэн удхатай.}

23 Нэгэ эшэнь мянган мүнгэн шээкэл үнэ сэнтэй,
дүн хамта мянган эшэ үзэмэй жэмэс ургадаг байһан энэ талмай
тэрэ сагта халаахайгаар, үүргэнын эшээр урган дүүрэшэхэ.
24 Энэ газар элдүүрилэгдэдэггүй,
гансал агнууриин газар болохо ^{▼▼ Газар хаясаанай боложо, зэрлиг амитад үдэхэ, агнуури дэлгэрхэ, энэ хадаа газар элдүүрилдэг арадта муу байдал тохёолдохо гэһэн удхатай.}.
25 Урдань ургаса ургадаг байһан толгойнууд
хадхуур халаахайгаар дүүрэжэ, хэншье тиишээ ябахагүй.
Гансал үхэрэй, хонидой бэлшээри тэрэ болохо.