Isa 8 | BxrBBL2024 | STEP | Эзэн намда иигэжэ айладхаба: – Томо хабтаһа абаад, зоной уншахаар, ойлгохоор дээрэнь томо үзэгөөр «Һаяар дээрмэдэлгэ, түргөөр тонолго» гээд бэшэ.

‏ Isaiah 8

Эзэнэй дүлгэ тэмдэг – Исайн хүбүүн

1 Эзэн намда иигэжэ айладхаба:

– Томо хабтаһа абаад, зоной уншахаар, ойлгохоор дээрэнь томо үзэгөөр «Һаяар дээрмэдэлгэ, түргөөр тонолго» гээд бэшэ. 2 Би найдамтай гэршэнэрые – Урияа санаартаниие ба Ебэрээхия гэгшын хүбүүн Захарияае дуудахаб.

3 Тиигээд би һамгантаяа унтажа, һамгамни хээлитэй болоод, хүбүү түрөө бэлэй. Эзэн намда айладхаба:

– Хүбүүгээ «Һаяар дээрмэдэлгэ, түргөөр тонолго» гээд нэрлэгты. 4 Юуб гэхэдэ, энэ үхибүүнэй «аба, эжы» гэжэ хэлэжэ һуратар Дамааскын бүхы эд баялиг болон Самариин бүхы олзо Ассириин хаанай болохо.

Ассириин хаан ерэхэ

5 Эзэн намтай дахин хөөрэлдэбэ.
6 Тэрэ иигэжэ айладхаа:
«Эдэ зоной Шилоах горхоной
аалин намдуу урасхал уһые шамарлажа,
Рэциин ба Рэмаалияагай хүбүүндэ баясажа байһандань
7 Би, Эзэн Бурхан, тэдээндэ
бүхы сэрэгээрээ добтолхыень
Ассириин хааниие асархаб.
Эрьеһээ халин үерлэгшэ Евфрат мүрэнэй
ехэ урасхал уһандал адли тэрэнэй сэрэг нэбтэрэн-халин ерэхэл.
8 Тэдэ Иудын хан түрын газараар үер мэтэ дэлгэржэ,
хүзүү хоолойдонь хүрэтэрөө, шэнгээхэ болотороо тулаха,
бүхы газарыень эзэлхэ.
Далинуудынь шинии бүхы газар дээгүүр далбаатай байха, Эммануил ^{▼▼ Эммануил – эхэ еврей хэлэн дээрээ «Бурхан бидэнтэй хамта!» гэһэн удхатай.}!»

9 Арадууд, мэдэгты! Шэшэрэлдэгты!
Алас холын бүхы орон нютагууд, шагнагты!
Дайнда бэлдэгты, шэшэрэлдэгты!
Дайнда бэлдэгты, шэшэрэлдэгты!
10 Байлдаа яажа ябуулхаяа түсэблэгты!
Гэбэшье тэдэ түсэбүүдтнай бүтэхэгүй.
Захиралта үгэнүүдые сэрэгтэ хэлэгты!
Гэбэшье эдэ бүгэдэ ямаршье туһагүй,
юуб гэхэдэ, Бурхан бидэнтэй хамта!

Эзэн лүндэншые һэргылнэ

11 Бүхы эдэ зондол адляар юумэ хэжэ байхагүй тухайм Эзэн намайе агууехэ шадал хүсөөрөө һэргылбэ. Тэрэ иигэжэ айладхаа:

12 – Энэ арадай нюуса хэлсээн гэжэ тооложо байгаашые
бүгэдыень нюуса хэлсээн гэжэ бү тооло.
Тэдэнэй айжа байгаа юумэнһээ бү ай, бү һүрдэ.
13 Намайе, Түмэн Сэрэгтэ Эзэниие, нангинаар хүндэлжэ,
Намһаа айжа-түбэгшөөжэ байха ёһотойт.
14 Би зониие арюудханаб,
Иудын, Израилиин хан түрэнүүдтэ
бүдэрдэг шулуун, торожо унадаг шулуун мэтэ байхаб.
Иерусалимай улад зониие бариха урьха занга мэтэб.
15 Олохон зон бүдэржэ унаха, тэһэ бута унаха.
Тэдэ урьха зангада орожо баригдаха.

Үхэһэн зонтой зүбшэжэ болохогүй!

16 Таанад, минии шабинар, Бурханай намда дамжуулһан айладхал
сахиха, хадагалха ёһотойт.
17 Эзэн Өөрынгөө арад түмэнһөө хоргодоо-хороо,
гэбэшье би Тэрээндэ этигэнэб, Тэрээндэл найданаб.
18 Эзэнэй намда даалгаһан үхибүүдтэй би мүнөө эндэ байнаб.
Бидэ Израилиин улад зондо дүлгэ тэмдэг, амиды гэршэлэлгэнүүд болонобди.
Бидэ Сион уула дээрэ заларан оршогшо
Түмэн Сэрэгтэ Эзэнээр эльгээгдэнхэйбди.

19 Таанадые зарим зон иигэжэ гуйжа болохо:

– Һүнэһэ дуудагшадтай болон шэбшэдэг шэдитэнтэй зүбшыт.

Теэд таанад иигэжэ тэдээндэ харюусаарайгты:

– Арад түмэн өөрынгөө Бурханһаа туһа эрихэ ёһотой. Эльбэ жэльбэтэйшүүлые хэрэглэн, юундэ амиды зон тухай үхэһэн зонһоо асууха болонобибди?

20 Эзэнэй һургаал болон гэршэлэлгэдэ хандагты. Тэдэниие сахин дүүргээгүй һаа, худал хуурмаг үгэнүүдтэ хүрмэгдэхэт. Теэд тэдэ үгэнүүд хооһон, аша туһагүйл.

Хэсүү үе

21 Эльбэ жэльбэтэйшүүлые шагнагша зон зоболондо дарлагданхай,
үлэсхэлэн хооһон газар дэлхэйгээр тэнэжэ ябаха.
Гэдэһээ үлдэжэ ябахадаа тэдэ сухалдажа,
хаанаа болон Бурханаа харааха.
Тэдэ өөдөө огторгой руу гү,
22 али доошоо хүрьһэтэ газар руушье шэртэхэдээ,
гансал зоболон ба харанхые, шэг харанхые хараха.
Тиигээд тэрэ харанхыда өөһэдөө абташаха.