‏ Isaiah 9

Ерээдүйн хаан

1Энэ харанхын урьха зангада ороошод мултаржа шадахагүй.
Урдын сагта Зэбүлүүн болон Напталиигай газар дайда
суугүй, үргэн зондо мэдээжэ бэшэ бэлэй.
Харин ерээдүй сагта энэ газар дайда –
Дундада далайһаа зүүлжээ,
Иордан мүрэнэй нүгөө бэеэр газар,
мүн хариин зоной ажаһуудаг Галилей гэдэг газар дайдашье –
суута болохо.
 2Харанхы мунхагта алхалжа ябаһан зон
тон ехэ гэрэл туяа үзэбэ!
Үхэлэй ороной һүүдэртэ һуугаашадта
гэрэл туяа сасарба.
 3Бурхан, Та үндэһэ яһатаниие олошоруулаат,
ехэ баяр тэдээндэ түхөөгөөт.
Зон олзо хубааха үедэ баярладаг мэтэ,
Танай урда ургаса хуряан баярлана.
 4Тэдэниие даража байһан хөөмэгшэ,
сохижо байһан ташуурые Та эбдээт.
Хэзээ нэгэтэ Мидианай сэрэг һамна бута сохиһондол,
Өөрынтнай зониие дарлажа-мүлжэжэ байһан арадые
Та бута сохёот.
 5Тулалдаанда сэрэгшын үмдэдэг сабхи,
шуһанда зуураһан хубсаһаниинь
галда шатаагдаха.
 6Бидэндэ үхибүүн түрэбэ!
Бидэндэ хүбүүн үгтэжэ байна.
Тэрэ манай удамарша болохо.
Тэрэ Гайхамшагта үзэгдэл Түсэблэгшэ,
Хүсэтэ Бурхан,
Хэтэ мүнхэ Эсэгэ,
амгалан байдалай Ударидагша гээд нэрлэгдэхэ.
 7Тэрэнэй засаглалга, түлөөлгэ бүри ехэ боложол байха.
Хан түрэнь хододоо амгалан тайбан байха.
Тэрэ Давид хаанай үри һадаһан.
Энэ сагһаа эхилжэ хэтэ мүнхэдөө Тэрэ
үнэн шударга, үнэн зүбые
баримталан хүтэлбэрилхэ.
Түмэн Сэрэгтэ Эзэн энээниие бэелүүлхэ ехэ һанаатай.

Эзэн Израилиие хэһээхэ

8Израилиин хан түрэ, Яковай уг удам тушаа Эзэн айладхаһан байна. 9Эпрааимай бүхы зон, ниислэл хото Самарида ажаһуугша хүн бүхэн, Тэрэнэй эдэ бүгэдые эрхилһэн тухай мэдэхэ болоно. Мүнөө тэдэ бардам, ехэрхүү зантай. Тэдэ иигэжэ хэлэнэ: 10«Хирпиисээр баригдаһан байшангуудай хэмхэрэн унаашье һаань, шулуугаар тэдэниие барин бодхоохобди. Шикма мододой отологдоошье хадань үнэтэ хуша модоор тэдэниие һэлгэхэбди».

11Тэдээндэ добтолон орохыень Эзэн дайсадыень, Рэцииниие, дуудан зэбсэгжүүлээ. 12Зүүн зүгһөө Араам, баруун зүгһөө Пилишт гүрэнүүд Израилиие залгиха гэжэ амаа ангайлгаба. Энээнэй удаашье Эзэнэй уур хилэн бууранагүй. Тэрэ хэһээхэ гэжэ гараа һунгаһан зандаа байна.

13Израилиин арад түмэн һанаа ороногүй, Түмэн Сэрэгтэ Эзэнэй хэһээгээшье хадань тэдэ һөөргөө бусанагүй. 14Нэгэ үдэр Эзэн Израилиин толгой ба һүүл таһа сабшаа, пальма, хулһые сабшаа. 15Толгойнь хадаа үндэр наһатайшуул ба ноёдынь, һүүлынь хадаа худал хуурмаг лүндэншэд болоно. 16Удамаршадынь зоноо төөрюулхэ, гээгдэхүүлхэ. 17Тиимэ ушарһаа Эзэн өөрын арад түмэнэй залуу зон тушаашье һанаагаа табихагүй, үншэн хүүгэдые, бэлбэһэн эхэнэрнүүдыешье хайрлахагүй. Юуб гэбэл, тэдэ бултадаа Бурхангүй ба муу хэрэг үйлэдэгшэд, муу юумэ амалжал байгшад. Энээнэй удаашье Эзэнэй уур хилэн буурахагүй, зониие хэһээхэ гэжэ гарынь һунгаатай зандаал байха.

18Зоной муу муухай ябадал гал мэтэ соробхилжо, үүргэнэ болон хадхуурта һөөгүүдые шатаана. Энэ хадаа ойн шэрэнгэ хүрэтэр носожо, дээшээ утаан бахана мэтэ хөөрэнэ. 19Түмэн Сэрэгтэ Эзэнэй уур хилэн газар дэлхэйгээр хаа-хаанагүй бушаганаха, зониие шатаан һалгааха, хэншье хэнииешье хайрлахагүй. 20Зон орон дотороо бүхы юумэ эдихэ, гэбэшье садахагүй. Тэдэ өөһэдынгөө гарыешье мэрэхэл! 21Мэнашшээ обогой зон Эпрааимай обогто добтолхо, хамтаран, тэдэ Иудын хан түрэдэ добтолхо. Энээнэйшье удаа Эзэнэй уур хилэн буурахагүй, хэһээхэ гэжэ гарынь һунгаатай зандаа байхал.
Copyright information for BxrBBL2024