Jer 1 | BxrBBL2024 | STEP | Бэньямиин обогой газар нютагта оршогшо Анатоот хотын санаартан Хилкияагай хүбүүн Ерэмияа гэгшын үгэ хүүр, үйлэ хэрэгүүд гэбэл энэ.

‏ Jeremiah 1

1 Бэньямиин обогой газар нютагта оршогшо Анатоот хотын санаартан Хилкияагай хүбүүн Ерэмияа гэгшын үгэ хүүр, үйлэ хэрэгүүд гэбэл энэ. 2 Аммооной хүбүүн Ёшияагай арбан гурбадахи жэлээ Иудын хаан түрые зонхилжо байхадань, Ерэмияада Эзэн айладхал буулгаһан гэхэ. 3 Ёшияагай хүбүүн Ёякиимэй Иудын хаан түрэ зонхилжо байха үедэ Тэрэ Ерэмияада мүн лэ хандаа. Ёшияагай үшөө нэгэ хүбүүн Цэдэкиия гэгшын хаан түрэ барижа, хааншалалгынь арба нэгэдэхи жэлэй эсэс хүрэтэр Эзэн Ерэмияада айладхал буулгажал байгаа. Тэрэ онойнь табадахи һарада Иерусалимай ажаһуугшад баряанда абтан сүлэгдөө бэлэй.

Наһанайнь хэрэгтэ дуудалга

4 Эзэн намда:

5 – Умай соо шамайе бүрилдүүлхынгөө урда тээ Би шамайе түсэблөөб, түрэхыншни урда тээ Би шамайе арюудхан, уласуудта лүндэншөөр Би шамайе табяаб, – гэжэ айладхаба.

6 Тиихэдэнь би:

– Аяа, Эзэн Бурхамни! Юун гэжэ хэлэхэеэ мэдэнэгүйлби, үшөө залуу байнаб, – гэжэ харюусабаб.

7 Теэд Эзэн намда:

– Үшөө залууб гэжэ бү хэлэ. Хайшаашье шамайе эльгээбэлни, ошохош. Захирһан бүхы юумыемни хэлэхэш. 8 Хэнһээшье бү ай, аршалхын тула Би шамтай хамта байнаб. Энэ болбол Би, Эзэн, айладхажа байна мүн! – гэбэ.

9 Тиигээд Эзэн гараа һарбайн, минии уралда хүрэжэ, намда:

– Анхара, хэлэхэ үгэнүүдыешни Би шамда дамжуулбаб. 10 Арад уласуудые, хаан түрэнүүдые үндэһөөрнь үгы хэхын, үрижэ байхын, һандаргаахын, һалгаахын, байгуулан барижа, һуулган үндэһэлхыншни тула мүнөө Би шамда эрхэ түлөөлгэнүүдые үршөөнэб, – гэжэ айладхал буулгаба.

Хоёр үзэгдэл

11 Эзэн намһаа:

– Ерэмияа, ши юу харанабши? – гэжэ асууба.

Би:

– Гүйлсэ модоной мүшэр харанаб, – гэбэб.

12 Эзэн:

– Ши зүб харанаш. Үгэнүүдэйнгэөө бэелдэхые харахын тула Би энэ ажаглажа һэргэг ^{▼▼ Һэргэг – энэ үгэ эхэ еврей хэлэн дээрээ «гүйлсэ модон» гэһэн үгэтэй адлирхуу дуулдадаг.} байна гээшэб, – гэбэ.

13 Эзэн дахин намһаа:

– Юу харанабши? – гэжэ асууба.

Би:

– Бусалжа байһан уһатай тогоо харанаб, хойто зүгһөө тэрэ харагдана, – гэжэ харюусабаб.

14 Тиихэдэ Эзэн намда:

– Энэ нютаг ороной бүхы ажаһуугшадта гай тодхор хойто зүгһөө тохёолдохо. 15 Юуб гэхэдэ, хойто зүгэй хаан түрэнүүдэй бүхы угсаатануудые ерэхыень Би дуудахаб. Тэдэ ерэжэ, хаан шэрээгээ Иерусалимай хаалгануудай хажууда, бүхы ханануудыень тойруулан, мүн Иудын бүхы хотонуудые тойруулан табиха. 16 Намайе орхижо, ондоо бурхадта үргэл үргэжэ, шүтөөнүүдые хэжэ, тэдээндэ һүгэдэн мүргэдэг болоһонойнь, нүгэл үйлэдэһэнэйнь тула Би Өөрын арадта хэһээлтэ амасуулхаб. 17 Ши одоо бэеэ зэһээд, Минии захирһан бүхы юумэ тэдээндэ ошожо дуулга. Тэдээнһээ бү ай, үгы һааш, Би шамайе тэдэнэй урда бүри ехээр айлгахаб! 18 – 19 Харыш, Ерэмияа, Би таанадые мүнөө бүхы газар нютагай урдаһаа бүхэлэлтэтэй хото, түмэр бахана, гуулин хэрэм мэтэ болгон табибаб. Иудын хаашуул, амбан захирагшад, санаартад болон газар нютагай арад түмэн бултадаа таанадай урдаһаа эсэргүүсэхэ, гэбэшье тэдэ таанарые диилэхэгүй. Юуб гэхэдэ, Би таанарые хамгаалхын тула таанадтай хамта байлсахаб. Энээниие Би, Эзэн, тунхаглан айладхажа байна мүн!