‏ Jeremiah 13

Маалинга бүһэ

1Эзэн намда:

– Ерэмияа, ши ошожо, маалинга бүһэ худалдан абаад, бэлхүүһээрээ бүһэлэ, гэбэшье тэрэниие уһанда бү оруулаарай, – гэжэ айладхаба.

2Тиимэһээ би Эзэнэй захирһанай ёһоор, бүһэ худалдан абажа, бэлхүүһээрээ бүһэлбэб. 3Удаань Эзэн дахин намда хандан:

4– Үнөөхи худалдан абааша, үмдөөд байһан бүһэеэ абажа, бэеэ зэһээд, Евфрат руу ябажа, тэрэниие тэндэ хадын забһарта нюу, – гэжэ айладхаба. 5Эзэнэй намда захирһанай ёһоор, би ошожо, тэрэниие Евфрадай хажуугаар нюубаб.

6Олон үдэрэй үнгэрһэнэй удаа Эзэн намда:

– Евфрат руу ошожо, тэндэ захирһанайм ёһоор нюугааша бүһэеэ абаад ерэ, – гэжэ айладхаба. 7Тиигээд би Евфрат руу ошожо, малтажа, нюуһан газарһаа бүһэ абабаб. Харахада, үнөөхи бүһэ үмхиржэ, хэрэгсээхээр бэшэ болоһон байба.

8Эзэн дахин намда хандан иигэжэ айладхаба:

9– Энээндэл адляар Би Иудын хан түрын бардам зангые болон Иерусалимай угаа ехээр бардамлалгые һалгаахаб! 10Энэ муу арад зон Минии үгэ дууланагүй. Тэдэ үсэд зантай, ондоо бурхадта шүтэн мүргэнэ, ондоо бурхадые хүндэлнэ, урдань һүгэдэн унана. Тиимэһээ тэдэ болбол энэ ямаршье хэрэггүй бүһэдэл адли болохо. 11Хүнэй бэлхүүһэндэ бүһын няалдадаг шэнгеэр, Би Израилиин болон Иудын хан түрын улад зониие Өөртөө дүтэ няалдуулан байлгахаа һанаа һэм. Минии нэрые хүндэлхэ, магтаал, алдар соло түхөөхэ арад болгохоо һанаа һэм. Теэд тэдэ Минии үгэ дуулаагүй.

Үзэмэй дараһан архитай домбо

12Эзэн Бурхан намда:

– Ерэмияа, «домбо бүхэн дараһан архяар дүүргэгдэхэ ёһотой» гэжэ Израилиин улад зондо соносхо. Тэдэнэй шамда «домбо бүхэниие дараһан архяар дүүргэдэг юм гэжэ бидэ һайн мэдэхэгүй юм гүбди?» гэхэдэнь, 13ши тэдээндэ Минии, Эзэнэй, энэ орон нютагай бүхы ажаһуугшадые – хан шэрээдэ һуугша Давидай уг удамыень, санаартадые, лүндэншэдые, Иерусалимай бүхы улад зониие – һогтоторнь архяар дүүргэхэеэ байһан тухай дуулга. 14Домбо нүгөө домбоор домбодон сохижо байһандал, Би тэдэниие хүгшэн, залуугүй бэе бэедэнь хамталан бута сохихоб. Хайра үршөөл үзүүлхэгүйб, хайрлахагүйб, энэрилхэгүйб, хюдахаб! – гэбэ.

Бардам зан тухай

15Израилиин улад зон, Эзэниие соносогты!
Бү бардамлагты, үгыень анхарагты.
16Харанхы болгохынь урда тээ,
бүрэнхы хада ууланууд дээгүүр
хүлэйнгөө торохын урда тээ үрдижэ,
найдаһан гэгээн гэрэлыетнай
Тэрэнэй гүн харанхы,
үнэгэнэй төөримэ шэб харанхы болгохынь урда тээ үрдижэ,
Эзэндэ, өөрынгөө Бурханда, магтаал соло дуудагты!
17Харин энээниие анхараагүй һаатнай,
танай бардам занһаа боложо,
минии зүрхэ сэдьхэл бүтүү уйлахал.
Эзэнэй арад зоной һүрэг мэтээр
баряанда туугдаһанһаа боложо,
нюдэдэйнгөө шэргэтэр
би сурхирса уйлахаб.

18Эзэн намда:

– Хаанда болон хатан эхэдэнь хаан шэрээһээ бууха тухай хэлэ. Юуб гэхэдэ, тэдэнэй гоё һайхан титим толгойһоонь унаа.

19Урда хан түрын хотонууд сэрэгээр бүһэлэгдэнхэй, хэншье тэдэниие абаржа шадахагүй. Иудын хан түрын бүхы зон баряанда туугдаа, бултадаа туугдан ошоо, – гэбэ.

20Иерусалим, харыш! Хойто зүгһөө дайсад ерэжэ байна. Шамда даалгагдаһан улад зоншни, омогорходог хүнүүдшни хаанаб? 21Өөрэйншни һургаһан зониие шамда захирхыень дээрэшни Тэрэнэй табибал, ши юун гэхэбши? Түрэжэ байһан эхэнэр шэнги үбшэндэ баригдахалши. 22Хормойшни шуугдаа, хүсөөр эдлэгдээш – эдэ бүгэдэ яагаад шамтай тохёолдоо гээшэб гэжэ асуубалшни, нүгэл шэбэлэйшни угаа олон байһанда энэ болоо гэһэн харюу үгтэхэ. 23Эфиоп хүн арһаа, ирбэс толбонуудаа һэлгэжэ шадаха гү? Мууе үйлэдэжэ һураһан таанадшье тэдээндэл адли һайниие хэжэ шадахагүйт. 24Тиимэһээ Эзэн таанадые хооһон талын һалхинда үлеэгдэдэг мэхиинэ шэнгеэр тарааха. 25Энэ болбол танай үйлэ, Эзэнэй таанадта хэмжэжэ үгэһэн хуби заяан юм. Юуб гэбэл, таанад Тэрэниие мартажа, бодото үнэн бэшэ бурхадта найдан, шүтэн мүргэдэг болоот. 26Шинии эшхэбтэр зүйл харагдуулхын тула Эзэн Өөрөө хормойешни нюур дээрэш һэхэхэ. 27Үзэн ядадаг юумыень хэжэ байхыетнай Эзэн хараа бэлэй. Хүршынгөө һамга эдлэхые хүсэдэг хүндэл гү, али гүүнэй хойноһоо инсагаалһан азаргадал адли таанадай хээрэ талын добонууд дээрэ шүтөөнүүдтэ мүргэжэ байхые Тэрэ хараа һэн. Иерусалимай улад зон, таанад заатагүй хосорхот! Хэды болотор бузартай байхабта?!