‏ Jeremiah 17

Иудын хан түрын нүгэл

1Эзэн айладхана:

– Иудын хан түрын зоной нүгэл түмэр эритээр, баллахын аргагүйгөөр бэшэгдэнхэй, ошорой үзүүрээр зүрхэнэйнь хабтаһан дээрэ һиилэгдэнхэй, үргэлэй шэрээгэй углуунууд дээрэ барлагданхай. 2– 3Үхибүүдтээ һанаагаа табидагтал, тэдэ үргэлэй шэрээнүүд, Ашэраа бурханай хүрэгүүд, һаглагар модод, үндэр гүбээнүүд, намжаа талаар ербылдэгшэ хаданууд тухай һанаагаа табидаг. Тиимэһээ таанадай, Иудын хан түрын зоной, мүргэлэй обоонуудай түлөө, өөрынгөө бүхы орон нютагаар хэһэн нүгэлэйтнай түлөө танай эд баялигые болон бүхы эрдэни зэндэмэниие дайсадтатнай үгэхэб. 4Минии үршөөһэн газар нютагые таанад өөрынгөө мууһаа боложо гээхэт. Мэдэхэ-танихагүй нютагтатнай Би таанадые дайсадтатнай богоол болгон үгэхэб. Юуб гэхэдэ, таанад Намайе угаа сухалдуулаат, уур хилэмни гал мэтэ бушаганаа, хэтэ мүнхэдөө тэрэ носохол!

Элдэб айладхалнууд

5Эзэн иигэжэ айладхана:
Намһаа буруу хаража,
зондо найдажа,
хэзээ нэгэтэ үхэхэ юумэндэ
найдан түшэглэгшэд
хараал шэнгээхэ!
6Элһэн сүл губидахи
хадхууртай һөөг мэтэ,
халуун, хуурай хооһон,
бэшэ юунэйшье ургадаггүй
дабһатай газарта байгааша,
хэнэйшье харадаггүй
һөөг мэтэ тэрэ.
Бурханай үршөөдэг һайн һайхан юумэн
тухай тэрэ мэдэнэгүй.
7Намда этигэдэг,
этигэл найдабаряа Намда зорюулдаг
хүниие Би үреэхэб.
8Урасхал уһанай дэргэдэ һуулгаһан,
үндэһөө уһан руу татаһан,
халуунай шатахада айхагүй
модон мэтэ тэрэ болохо.
Набша намаань ногоон,
бороогүй, хуурай байхада тэрэ айхагүй,
үрэ жэмэс тэрэ үгэжэл байдаг.
9Хүнэй зүрхэ сэдьхэл харатай,
заһахын аргагүй.
Тэрэниие хэн ойлгожо шадахаб?
10Бил, Эзэн, зоной һанаа бодол
нэбтэ хаража,
зүрхэ сэдьхэлыень туршадагби!
Ажаһуудаг заяг заршамайнь ёһоор,
үйлэ хэрэгүүдэйнь лэ ёһоор
тэдээндэ хандадагби!

11Хуули бусаар баяжаһан хүн
түрөөгүй үндэгэеэ дарадаг
шубуундал адли.
Наһанайнгаа түлэг дунда
тэрэ баялигаа гээжэ,
эсэсэй эсэстэ тэнэг болоод үлэхэ!
12Манай Эзэнэй үргөө эгээл эхинһээ
Бурханай алдар солын сэнтии,
эгээл нангин газар лэ.
13Эзэн, Та – Израилиин найдабарит.
Танһаа арсан ошогшод нэрээ гутааха,
тооһон дээрэ бэшэһэн бэшэгтэл
үгы болохо.
Юуб гэбэл, тэдэ Таниие, Эзэниие,
сэбэр уһанай булагые, орхибо ха юм.

Ерэмияа туһа эринэ

14Оо, Эзэн, намайе аргалыт,
тиихэдэтнай би эдэгэхэб;
намайе абарыт,
тиихэдэтнай би абарагдахаб.
Та – минии магтаал гээшэт!

15«Эзэнэй бидэниие занажа хэлэһэниинь хаана гээшэб? Бэелдэг лэ!» – гээд зон намда хэлэнэ.

16Эзэмни, эдээндэ гай тодхор татахыетнай Таниие би гуйжа байгаагүйб, гай зоболоной саг эдээндэ хүсэн байгаагүйб, энээниие Та мэдэнэт. Минии хэлэжэ байгаашые Та Өөрөө мэдэжэ байнат. 17Намайе ухаа алдуулан айлгажа бү байгыт. Гай тодхорой үедэ Та минии аршалалтат. 18Хойноһоом мүрдэгшэдэй нэрыень хухалыт, харин намайе дүмөөрэйт, Эзэмни. Тэдэниие һүрдөөн айлгыт, харин намайе бү һүрдөөгыт. Тэдээндэ гай зоболон асаржа, тэһэ биса сохиит!

Амаралтын үдэр сахиха тухай

19Эзэн намда иигэжэ айладхаба:

– Иудын хаашуулай орожо-гаража байдаг Иерусалимай ниитын бартаануудта ошожо, энэ соносхол дабта. 20Иудын хаашуулда болон улад зондо, Иерусалимда ажаһуудаг, эдэ бартаануудаар орон ерэдэг бүхы зондо Минии айладхал шагнахыень дуулга. 21Ами наһаяа аршалха гээ һаа, амаралтын үдэр ямар нэгэн ашаа үргэхэһөө, Иерусалимай бартаануудаар ямар нэгэн зүйл үргэн гаргахаһаа болгоомжологты гэжэ тэдээндэ дуулга. 22Таанад амаралтын үдэр гэрһээ ямар нэгэн ашаа зөөжэ бү гаргагты, ямаршье ажал бү хэгты. Элинсэг хулинсагуудтатнай захирһанайм ёһоор, амаралтын үдэрые арюун нангин үдэр гэжэ сахин байгты. 23Танай үбгэ эсэгэнэр Минии үгэ дуулаагүй, анхаралаа табяагүй. Дам саашаа Минии захиралта дүүргэхэгүйн, һургаалыем шагнахагүйн тула тэдэ үсэрхөө.

24Хэрбээ амаралтын үдэр энэ хотын бартаануудаар ямаршье ашаа зөөжэ оруулангүй, ямаршье ажал хэнгүй, амаралтын үдэрые нангинаар сахин, Минии үгэнүүдые дуулабалтнай, 25Иерусалимай бартаануудаар хаашуултнай, амбан ноёдтнай орон байха. Тэдэ Давидтал адли ехэ засаг түлөөлгэнүүдтэй байха юм. Иудын хан түрын болон Иерусалимай улад зонтой хамта тэдэ мори тэргээр болон мори унан ябаха, Иерусалим хото хэтэ мүнхэдөө улад зоноор дүүрэн хүүехэл! 26Түгэс шатаалта үргэл, үргэл, эдеэн үргэл болон уталга, мүн баясхалан хүргэһэн үргэлнүүдые Эзэнэй үргөөдэ асаржа, улад зон Иудын хан түрын хотонуудһаа, Иерусалимай оршон тойронхи нютагуудһаа, Бэньямиинэй газар нютагһаа, набтар нюруу газарһаа, хада уулатай газарһаа, урда Иудын хан түрэһөө ерэдэг байхал. 27Харин Минии үгэ дуулангүй, амаралтын үдэр нангинаар сахингүй, ашаа үргэн, амаралтын үдэр Иерусалимай бартаануудаар гаража байбалтнай, Би тэдэ бартаануудые галда шатаахаб! Гал дүлэн Иерусалимай ордонгуудые дууһан залгиха, хэншье тэрэниие унтаргаажа шадахагүй!