‏ Jeremiah 18

Ерэмияа амһарта бүтээгшын гэртэ

1Эзэн намда иигэжэ айладхаба:

2– Шабар амһарта бүтээгшын гэртэ уруудан ошо. Тэндэ Би шамда үгэеэ айладхахаб.

3Шабар амһарта бүтээгшын гэртэ ошоходом, тэрэ эрьелдэдэг түхэреэн эрьюулгэ дээрээ нэгэ зүйл хэжэ байба. 4Шабараар хэжэ байһан амһартынь бүтэхэгүйдэ тэрэ өөрынгөө һанагшаар ондоо амһарта тэрээгээр бүтээжэ байгаа бэлэй.

5Тиихэдэнь Эзэн намда иигэжэ айладхаба:

6– Израилиин улад зон, энэ шабар амһарта бүтээгшэдэл адли, Би таанадтай иимэ юумэ хэжэ шадахагүй гэжэ гү? Амһарта бүтээгшын гарта байһан шабартал адли таанад Минии гарта байнат. 7Алишье сагта Би ямар нэгэ үндэһэтэниие, үгышье һаа, хан түрые үндэһөөрнь татан һалгааха, бута сохихо, усадхаха тухай айладхал буулгажа болохоб. 8Теэд тэрэ хэлээшэ арадаймни өөрын муу муухай хэрэгүүдһээ эрьен холодоо һаань, Би тэдээн дээрэ буулгахаар түсэблэжэ байгаа гай тодхороо болюулхаб. 9Алишье сагта ямар нэгэ үндэһэтэниие, үгышье һаа, хан түрые байгуулха, үндэһэлэн һуурижуулха тухай айладхал буулгажа болохоб. 10Теэд тэрэнэй үгыем дуулангүй, муу юумэ хэжэ байбалнь, тэрэниие юрөөхөөр амаа алдаһан һайн һайханаа болюулхаб. 11Тиимэһээ одоо Иудын хан түрын, тэрэ тоодо Иерусалим хотын, улад зондо Минии тэдэнэй урдаһаа түсэблэн байгаа гай тодхор тухай, мүн тэдэниие хэһээхэеэ бэлдэжэ байһан тухайм дуулга. Хүн бүхэн нүгэлһөө зайлажа, һанаа бодол, хэрэгүүдээ хубилгаха ёһотой. 12Теэд тэдэ: «Үгы даа! Бидэ һанаһаараа юумэ үйлэдэхэбди, үсэд, муу байһаараал байхабди», – гэжэ хэлэхэл.

Зон Эзэнһээ хадуурба

13Эзэн иигэжэ айладхана:
Иимэ юумэн
урдань болодог байгаа юм аал гэжэ
үндэһэн арад бүхэнһөө асуугты.
Израилиин улад зон
угаа жэгшүүритэй зүйл үйлэдэнэ.
14Ливаанай хабсагайта үндэрнүүд
хэзээ нэгэтэ саһагүй болодог юм гү?
Хадын хүйтэн урасхалнуудынь
шэргэдэг юм аал?
15Харин Минии арад зон
Нам тухай мартаа.
Тэдэ шүтөөнүүдтэ санзай ууюулна,
харгы замаа төөрижэ,
урданай һайн замуудаа –
Моисейн Хуули
орхибо.
Тэдэ зүргэ мэтэ муу харгыгаар ябана.
16Тэдэ өөрын нютагаа жэгшүүрилтэ зүйл,
баһан наадалха зүйл болгоо!
Тэрэнэй хажуугаар үнгэрһэн хүн бүхэн
угаа гайхажа, толгойгоо һэжэрхэл.
17Зүүн зүгэй һалхинай
тооһо шорой хүдэлгэдэгтэл,
өөрын арад зониие
дайсадайнь урда тараахаб.
Нюргаа тэдээндэ харуулжа,
гай тодхоройнь үедэ туһалхагүйб!

Ерэмияагай урдаһаа хэлсээн

18Байһаар улад зон иигэжэ хэлсэбэ: «Ерэмияагай урдаһаа хамтарая! Маанадта хуули ёһо зааха санаартад, зүбшэл үгэхэ сэсэн мэргэшүүл, лүндэншэд хододоо байхал. Тэрэниие улаан хэлээрээ даража, хардая, хэлээшыень анхархаяа болие!» 19Би:
– Эзэмни, намайе шагнажа,
дайсадаймни юу хэлэжэ байгаашые соносыт!
20Һайн юумэ муугаар харюулдаг юм гү?
Минии унахын тула тэдэ нүхэ малтаа.
Уур хилэнгыетнай тэдэнһээ
зайлуулхын тула Таниие гуйжа байһыем һаныт!
21Теэд мүнөө
үхи хүүгэдыень туража үхүүлыт,
дайн дажарта усадхыт,
эхэнэрнүүдынь бэлбэһэн болог,
үри хүүгэдээ гээг,
эрэшүүлынь үхэл хаталда дайрагдаг,
залуушуулынь байлдаанда алуулаг лэ!
22Гэр байрыень дээрмэдүүлхэеэ
гэнтэ зониие эльгээгыт,
һүрдэн, оог хашхараан тэдэ болог лэ.
Минии унахын тула
тэдэ нүхэ малтаа,
хүлыем тушахын тула
урьха табин нюугаа.
23Теэд Та, Эзэн,
намайе алахаяа
һанаһыень мэдэнэт.
Гэм бурууень бү хүлисыт,
нүгэлыень бү мартыт.
Тэдэ Танай урда хүмэрин
унаха болтогой.
Уурлан хилэнтэһэн сагтаа
тэдээнтэй юушье хэхэ – Танай дуран.