Jer 19 | BxrBBL2024 | STEP | Эзэн минии ошожо, шабар амһарта худалдан абахыем захирба. Арад түмэнэй ахамад зоной, мүн ахамад санаартадай заримые абан ошохо тухайм Тэрэ мүн лэ захираа.

‏ Jeremiah 19

Бутарһан домбо

1 Эзэн минии ошожо, шабар амһарта худалдан абахыем захирба. Арад түмэнэй ахамад зоной, мүн ахамад санаартадай заримые абан ошохо тухайм Тэрэ мүн лэ захираа. 2 Потшертэ бартаануудаар гаража, Бэн-Һинноомой хүндыдэ ошожо, Тэрэнэй намда айладхаһан үгэнүүдые би тунхаглаха ёһотой бэлэйб. 3 Эзэн намда иигэжэ хэлэхыем захирба:

– Иудын хаашуул, Иерусалимай ажаһуугшад, Израилиин Бурханай, Түмэн Сэрэгтэ Эзэнэй, айладхал шагнагты! Энэ газар нютагта Би гай тодхор татахамни, тэрээн тушаа дуулаһан хүн бүхэн угаа ехээр бахардаха. 4 Ушарынь гэбэл, зон Намайе орхижо, энэ газар бузарлаа, өөһэдөөшье мэдэхэгүй, үбгэ эсэгэнэрэйньшье мэдэхэгүй, Иудын хаашуулайшье танихагүй ондоо бурхадта санзай эндэ ууюулаа. Гэм зэмэгүй зоной шуһаар энэ газарые дүүргээ. 5 Түгэс шатаалта үргэл болгон үхи хүүгэдээ галда шатаахын тула тэдэ Баалда обоонуудые бариһан юм. Энэнь Минии хэзээшье захираагүй, хэлээгүй, Минии һанаандашье ороогүй зүйл лэ. 6 Тиимэһээ, үзөөрэйгты, энэ газар Тоопэт гү, али Бэн-Һинноомой хүнды гэжэ дахин нэрлэгдэхэеэ болижо, харин Хюдалгын хүнды гэжэ нэрлэгдэхэ саг дүтэлжэ байна. 7 Иудын хан түрын болон Иерусалимай улад зоной бүхы түсэбүүдые энэ газар дээрэ һандаргаажа, дайсадтань тэдэниие диилүүлхэб, байлдаануудта алуулхаб. Тэдэнэй хүүрнүүдые тэнгэриин шубуу шонхорто болон зэрлиг амитадта хүнэһэн болгон үгэхэб. 8 Энэ хотые угаа ехээр һандаргаахаб. Хажуугаарнь гараһан хүн бүхэн сошохо, шархануудыень хаража, сэдьхэлээ доһолхо. 9 Дайсан хотые бүһэлжэ, зониие гай зоболондо оруулха. Бүһэлэлтэдэ байха гээшэ угаа аймшагтай байха: хото соо байгааша зон бэе бэеэ, үхи хүүгэдээшье эдижэ эхилхэ.

10 Намтай ябаһан зоной хараһаар байтар шабар амһарта тэһэлхыемни Эзэн намда захирба. 11 Түмэн Сэрэгтэ Эзэн иигэжэ айладхана гээд хэлэхыемни Тэрэ намда захираа: «Дахин бүтэн болгожо шадахагүйгөөр шабар амһарта хахалһантай адляар Би эдэ зониие болон энэ хотые һандаргаахаб! Хүдөөлүүлхэ газарай үгы болоһон ушарһаа зониие Тоопэдтэшье хүдөөлүүлдэг болохо. 12 Энэ хотые болон ажаһуугшадынь Тоопэдтэл адли болгохоб! 13 Гэрэй хушалтанууд дээрэ огторгойн мүшэдтэ уталга ууюулһан, ондоо бурхадта сэржэм үргэһэн – бүхы иимэ Иерусалимай гэр байранууд, Иудын хаашуулай гэрнүүд Тоопэт газартал бузарлагдаха».

14 Айладхалынь дуулгахаяа Эзэнэй намайе эльгээһэн Тоопэдһээ би тиигээд гаража ошоо һэм. Эзэнэй Һүмын хорёо соо зогсоод, бүхы улад зондо 15 Израилиин Бурхан, Түмэн Сэрэгтэ Эзэн иигэжэ айладана: «Үзөөрэйгты, Минии үгэ дуулахагүй гэжэ үсэрхэһэнэйтнай түлөө Би тунхаглаһан бүхы гай тодхороо энэ хотодо болон оршон тойронхи һууринуудтань шэглүүлхэмни», – гээшые дуулгаа һэм.