‏ Jeremiah 2

Бурханай харууһан доро

1Эзэн айладхал намда буулгажа, 2Иерусалимай хүн бүхэндэ иимэ зар соносхол дуулгахыемни захирба: Таанадай эдир залуу байхадаа
Намда үнэн сэхэ байһые,
гүлмэр залуухан һамгандал,
Намда дураяа бэлэглэдэгые,
элһэн сүл губяар, талха таряанай
ургадаггүй газар нютагаар
Намайе дахан ябаһыетнай һанажа байнаб.
3Израиль, таанад Минии нангин хуби,
ургасымни дээжэ мэтэ бэлэйт.
Таанадые харшалагша уласуудые бултыень буруутан болгожо,
гай тодхор тэдээндэ буулгаа бэлэйб.
Энэ болбол Би, Эзэн, айладхажа байгаа мүн!

Израилиин уг гарбалай нүгэл

4Яковай үри һадаһад, Израилиин бүхы обогууд, Эзэнэй айладхал соносогты!

5Эзэн иигэжэ айладхажа байна: Таанарай үбгэ эсэгэнэр Намда
ямар буруу юумэ олоһондоо
Намһаа холодон,
өөдэгүй хооһон шүтөөнүүдтэ һүгэдэжэ,
өөһэдөө өөдэгүй юумэд болобоб?
6Тэдэ Нам тухай һанаагаа табяашьегүй.
Харин Би тэдэниие
Египедэй газар нютагһаа
абаран гаргажа,
элһэн сүл губяар,
ханха зайдан,
хонхо-ёнхо газараар,
ган гасуур, аюултай газараар,
хэнэйшье хүндэлэн гаража үзөөгүй,
хэнэйшье оршон амидараагүй газараар
хүтэлэн ябажа гаргааб.
7Би таанадые
үрэжэлтэй һайхан газарта асаржа,
тэрэнэй үрэ жэмэсээр
хоолложо байхыетнай хүсөө һэм.
Гэбэшье таанад
Минии газар нютагые бузарлабат.
Минии хубитые таанад
жэгшүүритэй зүйл болгобот.
8Санаартан «Эзэн хаана байнаб?» гэжэ һурагшалаагүй,
Хуули заадаг багшанар
Намайе мэдэхэгүй байба.
Ударидагшад Минии урдаһаа эсэргүүсэжэ,
Лүндэншэд Баалай нэрэһээ
айладхал буулгажа,
ямаршье туһагүй шүтөөнүүдтэ мүргэн ябаа.

Эзэн Өөрын арадые зэмэлхэ

9Тиимэһээ Би, Эзэн, таанадые дахин гэмнэхэб,
уг удамыетнай Би мүн лэ гэмнэн зэмэлхэб.
10Киттиимэй олтирогууд руу
далай гаталан ошогты,
Кэдаар руу хүниие эльгээжэшье
наринаар ажаглагты,
энээндэл адли зүйлэй
урдань боложо байгаагүйе
таанад лаб харахат.
11Ямаршье арад үндэһэтэн
бурхадаа һэлгэжэ байгаагүй,
бурхадайнь бурхадшье бэшэ байгаа хадань
тиигэжэ байгаагүй.
Харин Минии арад зон Намайе,
нэрэ хүндэ тэдээндэ олгуулһан Бурханиие, орхижо,
аша туһагүй шүтөөнүүдтэ мүргэжэ эхилээ.
12Тэнгэри, сошордон доһоло,
гайхан гэлын, ухаа алдыш!
Энэ болбол Би, Эзэн, захирнаб!
13Ушарынь гэхэдэ, Минии арад зон
хоёр нүгэл үйлэдэһэн байна:
сэбэр уһанай эхин болохо Намайе орхёо,
ямаршье уһа тогтоодоггүй,
нүхэ һүбэтэй хонхо яамые
хабсагайда сабшан хээ.

Израилиин үнэн сэхэ бэшэ байһанай хойшолон

14Израиль – богоол бэшэ.
Тэрэ түрэлхиин зараса байгаагүй.
Теэд юундэ тэрэ бусадай олзо болоо юм?
15Дайсадынь залуу арсалангууд мэтэ
тэрээн руу хэрхиржэ,
газар дайдыень зэлүү хооһон болгоо.
Хотонуудынь һандаргагданхай,
нэгэшье хүн тэндэнь ажаһуунагүй.
16Мүн Ноот болон Тахпанхээсэй зон
нэрыень хухалжа дэбһээ.
17Израиль, энээниие таанад өөһэдөө үүдхээт!
Минии, Эзэн Бурханайтнай,
таанадые дахуулан ябаха үедэ
Намайе орхёот.
18Һанаад үзыт, Иудын зон,
Нил мүрэнэй уһа уухаяа
таанадай Египет руу ошохо түсэбтэ
энэ болбол туһалаа гү?
Евфрат мүрэнэй уһанһаа уухаяа
Ассири руу ошохо түсэбтэтнай
энэ хадаа туһалха гү?
Үгы!
19Таанадай бузар булай ябадал
өөһэдыетнай хэһээхэ,
Намһаа буруу хараһантнай
өөһэдыетнай дайраха.
Намайе, Эзэн Бурханаа, орхихо гээшэ,
Намһаа түбэгшөөхэгүй,
Намайе хүндэлхэгүй гээшэ
таанадта гашуун һургаал болохол!
Энээн тушаа мэдэжэ, ойлгожо байгты.
Энэ болбол Би,
Хүсэн Түгэлдэр Эзэн,
Түмэн Сэрэгтэ Бурхан,
айладхана мүн!

Израиль Эзэндэ мүргэхэһөө арсана

20Израиль, ши
Минии эрхэ мэдэл дороһоо
үнинэй гарааш.
Минии үгэ дуулахаһаа,
Намда мүргэхэһөө
арсааш.
Үндэр гүбээн бүхэн дээрэ,
һаглагар модон бүхэн доро
шүтөөнүүдтэ мүргэжэ байгааш.
21Би шамайе шэлэгдэн абтаһан,
эгээл эрхим үрэһөө тариһан
үзэмэй модоной эшэ мэтээр
һуулган дүмөө бэлэйб.
Теэд яагаад шимни
гашуун муу үзэм үгэдэг
эгээлэй ондоо эшэ мэтэ болошоо гээшэбши?
22Соодоор, сабангаар бэеэ
хэды угаагаашье һааш,
гэм зэмэйшни толбые
Би харажал байнаб.
23Өөрыгөө бузарлаагүйб,
Баалда мүргөөгүйб гэжэ ши
яагаад хэлэжэ шаданабши?
Хүндыдэ өөрынгөө ябадалые харыш!
Юу хэһэнээ мэдэжэ аба!
Ши хадаа нэгэл замаа дабтан
гүйжэ ябаһан хурдан энги мэтэш!
24Хүсэлөөр жүрөөдэн,
агаар унхидан
сүл губи руу гүйжэ ябаһан
зэрлиг эмэ элжэгые
хэн барижа шадахаб?
Ороондо орохо сагтаа тэрэ
бүхы элжэгэнүүдтэ бэеэ дурадхахал.
Ши тэрээндэл адлиш!
25Израиль, ши шүтөөнүүдэй хойноһоо
ябахаяа боли!
Хоолойнгоо ангатар
тэдэниие хүсэхэшни хүрөө!
Харин ши: «Үгы!
Би һөөргөө бусахагүйб,
хариин бурхадта дуратайб,
тэдэниие дахан ябахаб», – гээ бэлэйш.

Израиль хэһээгдэхэл

26Хулгайшан баригдахадаа нэрээ хухардаг.

Тэрээндэл адли Израилиин арад зон –

хаашуул, удамаршад, санаартад, лүндэншэд

нэрээ гутааба.

27«Модон – манай эсэгэ, хабсагай – манай эхэ» гэжэ хэлэдэг таанад Намһаа буруу хараа бэлэйт. Харин гай тодхорой болоходонь, Минии ерэхые, таанадые абархыемни гуйдагта.

28Өөһэдтөө хэһэн бурхадтнай хаана юм? Гай гасаланай таанадта тохёолдоходо, тэдэ абаржа шадаха юм һаа, ерэжэ абараг лэ. Иуда, хэды олон хотонуудтайбта, тэды олон бурхадтай таанад байнат. 29Юундэ Намтай арсалданабта? Таанад бултадаа Минии урдаһаа нүгэл үйлэдөөт. 30Би таанадта хэһээлтэ амасуулааб, теэд таанад заһараагүйт. Лүндэншэдые таанар һэлмээр таһа сабшаат, арсалан мэтээр тэдэниие хюдабат. 31Энэ үеынхид, айладхалыемни дуулыт. Элһэн сүл губидал, үгышье һаа, гүн харанхы орондол мэтэ Израильда байгаа юм гүб? Юундэ таанад өөрынгөө һанаһаар лэ байха, Намда дахин бусахагүй тухайгаа хэлэнэбта? 32Залуу үхин гоёолто шэмэглэлээ, хадамлуулагдажа байгаа басаган гоёолой хубсаһаяа мартажа байха юм гү? Харин Минии улад зон Намайе тоолохын аргагүй оло дахин мартадаг байгаа. 33Таанад шүтөөнүүдэй дура яагаад буляахаяа һайн мэдэнэт. Муу муухай юумэ хэхэдээ, нээрээшье, дүршэлтэй хат. 34Мүн дэгэлэйтнай хормой дээрэ гэм зэмэгүй, үгытэй ядуу зоной шуһан харагдана. Теэд тэдэ зоной дээрмэдэжэ байхань үзэгдөөгүйл. 35Гэбэшье «Эзэнэй уур хилэн бидэнһээ үнэхөөр зайлаха» гэлдэнэт. Үзэгты даа, нүгэлөө мэлзэжэ байһанайтнай түлөө Би таанадые хэһээхэб. 36Ондоо арад зоной бурхадта мүргэжэ, өөһэдыгөө доромжолбот. Ассириин таанадые наада хараһандал адли Египедшье баһа таниие наада харахал. 37Эшэһэндээ нюураа бүглэн, Египедһээ гарахат. Би, Эзэн, танай найдажа байһан эдэ улас оронуудһаа буруушаан татагалзааб, тэдэ танда туһалхагүй.