Jer 21 | BxrBBL2024 | STEP | Цэдэкиия хаан нам руу Малхияагай хүбүүн Пашхуурые болон Маашэяагай хүбүүн, санаартан Цэпаанияа гэгшэдые эльгээжэ, иигэжэ хэлүүлбэ:

‏ Jeremiah 21

Иерусалимай диилдэхэ тухай

1 Цэдэкиия хаан нам руу Малхияагай хүбүүн Пашхуурые болон Маашэяагай хүбүүн, санаартан Цэпаанияа гэгшэдые эльгээжэ, иигэжэ хэлүүлбэ: 2 «Манай түлөө Эзэниие гуйгыш. Юуб гэхэдэ, Вавилооной хаан Навуходоносор бидэндэ дайлажа байна. Манай түлөө оролдожо, Эзэн Өөрынгөө гайхамшагта нэгэ үзэгдэл харуулжа магад, тиихэдэнь Навуходоносор бидэнһээ сухарин ошохо аалам».

3 – 4 Эзэн намда айладхал буулгаба. Тиигээд Израилиин Эзэн Бурханай Цэдэкиияда дамжуулаашыень «Цэдэкиия, Вавилооной хаанай болон сэрэгэйнь урдаһаа дайлалдажа байгаа танай сэрэгые заабол диилдүүлхэб. Сэрэгшэдэйтнай зэр зэбсэгые хотын тэгэн дунда суглуулхаб. 5 Таанадта уурлан, хилгэнтэн, угаа ехээр дурагүйдэн, бии хүсэ шадалаараа урдаһаатнай туласалдахаб. 6 Би энэ хотын ажаһуугшадые, хүн болон амитадые, хамаагүй хюдахаб. Тэдэ ехэ зуд тахалһаа боложо үхэхэ. 7 Тэрэнэй удаа Иудын хаан Цэдэкиия, шамайе, түшэмэлнүүдыеш болон дайн дажарай, үлэсхэлэн хооһон байдалай, зуд тахалай һүүлээр үлөөшэ зониие Вавилооной хаан Навуходоносороор, таанадые алахаяа һанаһан дайсадаартнай, баряанда абхуулхаб. Навуходоносор таанадые һэлмээр сабшан алаха. Тэрэ хэнииешье амиды мэндэ үлөөхэгүй, хайрлахагүй, энэрэл үзүүлхэгүй. Энэ болбол Би, Эзэн, айладхана мүн!» гээшые нам руу ерэһэн зондо дамжуулан хэлэбэб.

8 Тиигээд Эзэн улад зондо иигэжэ хэлэхыем захирба:

– Анхарагты! Би, Эзэн, амиды болон үхэл хатал тээшэ хүтэлдэг харгы замуудай нэгыень шэлэхые таанадта дурадханаб. 9 Энэ хотодо үлэһэн зон дайн дажарта алуулха, үгышье һаа, туража гү, али үбшэлжэ үхэхэ. Харин хотые бүһэлжэ байгаа Вавилооной сэрэгэй урдаһаа гаража, бэеэ тушааһан зон алуулхагүй, тэдэ ами наһаяа абарха. 10 Энэ хотые хайрлахагүй, һандаргааха гэжэ Би шиидээб. Вавилооной хаанай мэдэлдэ тэрэ үгтэхэ, тиигээд галдан шатаагдаха. Энэ болбол Би, Эзэн, тунхаглана мүн!

Иудын хаанай үргөө тухай

11 – 12 Иудын хаанай гэр бүлэдэ, Давидай уг удамда энэ мэдээсэл тунхаглахыемни Эзэн намда захирба:

– Минии, Эзэнэй, айладхал соносогты! Үдэр бүри хэрэгүүдые үнэн зүбөөр шүүбэрилэн байгты. Хүн зониие дарлагшадһаань аршалагты. Иигээгүй һаатнай, муу юумэ хээ һаатнай, Минии уур хилэн гал дүлэн мэтэ соробхилжо, хэншье тэрэниие унтаргаажа шадахагүй. 13 Иерусалим хото ^{▼▼ Эхэ еврей хэлэн дээрээ «нюруу газарай ажаһуугша» гээд бэшэгдэнхэй.}, Би урдаһаашни тулахаб. «Хэн маанадта хүрэжэ шадахаб? Хэн манай бэхижүүлгые сохин гаража, манай гэр байрануудта орожо ерэхэ юм?» гэлдэнэт. 14 Теэд Би хэһэн үйлэ хэрэгэйтнай түлөө таанадые хэһээхэб. Ордонгыетнай шатаахаб, тиихэдэм бүхы оршон тойроноорнь гал дүлэн соробхилхо.