Jer 22 | BxrBBL2024 | STEP

‏ Jeremiah 22

Иудын хаанай гэр бүлэдэ соносхол

1 – 2 Давидай үри һадаһан болохо Иудын хаанай ордон руу минии ошожо, хаанда, түшэмэлнүүдтэнь, Иерусалимай улад зондо иимэ айладхал дуулгахыем Эзэн захирба:

3 – Би, Эзэн, үнэн зүбөөр хэрэгүүдые шиидхэхыетнай захирнаб. Хүн зониие дарлагшадһаань аршалагты. Ерүүл хүндэ, үншэн хэнзэдэ, мүн бэлбэһэн эхэнэртэ муугаар бү хандагты, бү харшалагты. Энэ нангин газарта гэм зэмэгүй зониие алажа бү байгты. 4 Энээниие сахин, бэелүүлэн байбалтнай, Давидай уг удам хаан шэрээгээ эзэлэн һууха. Тэдэ болон түшэмэлнүүдынь, арад зониинь энэ ордоной бартаануудаар тэргэ морёор, мори унан үнгэржэл, орон ерэжэл байха. 5 Харин эдэ үгэнүүдые дуулаагүй һаатнай, энэ ордон һандаран һалаха гэжэ Өөрөөрөө тангаригланаб. Энэ болбол Би, Эзэн, айладханаб!

6 Иудын хаанай ордон хадаа Намда Галаадай газартал, Ливаанай орьёлдол гоё һайхан юм. Теэд Би тэрэниие хооһон, ханха зайдан, хэнэйшье ажаһуухагүй газар болгохоб. 7 Тус тустаа өөрын зэр зэбсэгтэй һүйдхэгшэдые Би тэрээн руу табихаб. Тэдэ Ливаанай эрхим хуша модоор дархалһан баханануудыень тайража, гал руу хаяха.

8 Олон үндэһэ яһатан энэ хотын хажуугаар үнгэрхэдөө, юундэ Минии, Эзэнэй, энэ агууехэ хотодо иимээр хандаһые бэе бэеһээ һурагшалан ябаха. 9 Тиихэдэнь Намтай, өөрынгөө Бурхантай, баталһан хэлсээнһээ таанадай арсаһанай, ондоо бурхадта мүргэн, алба хэһэнэйтнай түлөө гэһэн харюу дуулдаха юм.

Иохааз тушаа

10 Иудын хан түрын зон,
үхэһэн хүнэй хойноһоо бү уйлагты,
бү гашуудагты.
Баряанда туугдан ошоһон
хүнэй хойноһоо сурхирса уйлыт.
Тэрэ хэзээшье һөөргөө эрьен ерэхэгүйл,
түрэл нютагаа хэзээдэшье харахагүйл.

11 Энэ газарһаа ошоһон, өөрын эсэгэ Ёшияагай һүүлээр Иудын хаан болоһон Шаллуум ^{▼▼ Шаллуум – нүгөөдэ нэрэнь Иохааз, энэ бадаг 10-дахи бадагые тайлбарилна гээд ойлгохоор: «үхэһэн хүн» гээшэнь Ёшияа хаан, «баряанда туугдан ошоһон хүн» – Иохааз.} тухай Эзэн иигэжэ айладхажа байна: «Тэрэ хэзээшье һөөргөө бусахагүй. 12 Баряанда абаашаһан газарта тэрэ наһа бараха, энэ орон нютагаа дахин харахагүй».

Ёякиим тушаа

13 Өөрын гэр байрые үнэн сэхээр бэшэ,
дээдэ таһалгануудаа үнэн зүбөөр бэшэ
баридаг хэн нэгэнтэй,
зондо салин хүлһыень үгэнгүй
ажал хүүлэдэг хэн нэгэнтэй
гай гасалан тохёолдог!
14 «Өөртөө салуу дээдэ таһалгануудтай
үргэн гэр байра барихам»
гэгшэ хүнтэй гай тохёолдог лэ.
Сонхонуудаа үнэтэй хуша модоор тэрэ хэнэ,
шад улаан шэрээр будана.
15 Үнэтэй хуша модоор гэрээ бариһандаа
эрхим хаан болооб гэжэ һанана гүш?
Эсэгэшни эдеэ, уугаашье хадаа
үнэн зүбөөр, залан сэхээр
хэрэгүүдые шиидхэдэг һэн,
тиимэһээл ажал хэрэгынь
урагшатай бэлэй.
16 Зобоһон болон ядуу зоной
хэрэгүүдые үнэн зүбөөр
тэрэ шүүбэрилдэг һэн.
Тиимэһээл урагшатай һайн бэлэй.
Энэл хадаа Эзэниие мэдэхэ гээшэ болоно.
17 Теэд ши гансал өөрынгөө аша туһа харанаш.
Гэм зэмэгүй зониие аланаш,
зониие харшалан, дарлан байнаш.

18 Тиимэһээ Ёшияагай хүбүүн, Иудын хаан Ёякиим тушаа Эзэн иигэжэ айладхажа байна: Тэрэнэй хойноһоо
«Ай даа, ахамни!» гэжэ
хэншье гашуудан уйлахагүй.
Тэрэнэй хойноһоо
«Ай даа, эзэмни! Ай даа, алдарынь!» гэжэ
хэншье гашуудан бархирхагүй.
19 Тэрэ шэрэгдэн,
Иерусалимай бартаануудай саагуур шэдэгдэн,
элжэгэ хүдөөлүүлжэ байһандал хүдөөлүүлэгдэхэ.

Иерусалимай хуби заяан тухай

20 Иерусалимай улад зон,
Ливаан өөдэ үгсэн гаража,
шангаар бархиралдагты,
Башаан руу ошон, уй-хай бологты.
Абариим дээрэһээ уйлалдагты.
Юуб гэбэл, танай тала баримталагша
бүхы нүхэдтнай диилдээ.
21 Амжалтатай, дэбжэн байха үедэтнай
Эзэнэй таанадта хандабашье,
таанад үгыень дуулахаһаа арсаат.
Бүхы наһаараа иигэжэ ябаат,
үгыень дуулаагүйт.
22 Танай бүхы удамаршад
һалхяар туугдан хамагдаха.
Танай тала баримталагша
нүхэдтнай баряанда абтаха.
Бүхы муу муухай хэрэгүүдһээтнай боложо,
хототнай баһуулан, доромжолуулагдаха.
23 Ливаанай үнэтэ хуша модоор
бэеэ хүреэлэн амархан ажаһуугша таанад
түрэжэ байһан эхэнэртэл адли
хүндэ үбшэндэ нэрбүүлхэдээ,
хэды шангаар ёолохо гээшэбта!

Ехонияа тушаа

24 Эзэн Ёякиимэй хүбүүн, Иудын хаан Ехонияа гэгшэдэ иигэжэ айладхаба:

– Би Өөрөөрөө тангаригланаб,

Минии баруун гарта

тамгатай бэһэлигшье байгаа һааш,

Би шамайе һугалжа хаяхаб!

25 Шамайе алахаяа һанаһан зондо, айдаг зондошни Би шамайе үгэхэб, Вавилооной хаан Навуходоносорто болон сэрэгтэнь шамайе тушаахаб. 26 Би шамайе эхэтэйш хамта хариин нютаг руу сүлэхэб. Тэндэ таанад түрөөгүйт, гэбэшье тэндэ үхэхэт! 27 Бусахаяа хэды хүсэбэшье, таанад бусажа шадахагүйт.

28 Би хэлэбэб: «Ехонияа хаан хаясаанай, хэндэшье хэрэггүй бутарһан шабар амһарта мэтэ болоо юм гү? Юундэ тэрэ болон уг удамынь баряанда туужа абаашагдан, өөһэдэйнь мэдэхэ-танихагүй газар нютаг руу зайлуулагдаба гээшэб?» 29 Оо, Иудын газар нютаг!
Эзэнэй айладхал соносыш:
30 Энэ хүн үри хүүгэдгүй,
наһаараа урагшагүй байха.
Давидай хан шэрээдэ һуужа,
Иудын хан түрые зонхилхо
нэгэшье уг удамгүй тэрэ байхал.
Энэ болбол Би, Эзэн, айладхана мүн!