Jeremiah 23
Ерээдүй тухай
1Эзэнэй арад зониие хюдажа, тараажа байгааша удамаршадтай гай гасалан ушарха гээд Эзэн тунхаглана. 2Тиимэһээ арад түмэнииень харууһалжа байгаа удамаршад тушаа Израилиин Эзэн Бурхан иигэжэ айладхана: – Таанад Минии арад зон тушаа һанаагаа табяагүйт. Тэдэниие тараагаат, бутаруулаат. Мүнөө Би таанадые муу муухай үйлэ хэрэгүүдэйтнай түлөө хэһээхэб. 3Өөрынгөө эльгээн тарааһан орон нютагуудһаа арад зонойнгоо үлдөөсые суглуулжа, түрэл нютагтань бусаахаб. Тэдэ үнэржэн олошорхо. 4Тэдээн тушаа һанаагаа табиха удамаршадые табихаб. Минии арад түмэн бэшэ айхагүй, һүрдэхэгүй, бэшэ тэдэниие хэһээхэгүйб. Энэ болбол Би, Эзэн, тунхаглана мүн! 5Эзэн иигэжэ айладхана: – Давидай уг удамһаа үнэн сэхэ нэгые хаан болгон табиха сагни дүтэлжэ байна. Тэрэ хаан мэргэн ухаатайгаар ударидажа, энэ газар нютагта хэрэгүүдые шүүбэрилжэ, үнэн сэхээр шиидхэн байха. 6Тэрэнэй зонхилхо сагта Иудын хан түрын улад зон абарагдаха, Израилиин зон ажана амгалан амидарха. Тэрэниие «Эзэн – Манай Үнэн Зүб» гээд нэрлэхэ. 7Эзэн тунхаглана: – Израилиин улад зониие Египедэй орон нютагһаа гаргаһан Эзэнэй амиды мэндэ байһантайл адли баталгаатай гэжэ зон хэлэхэеэ болихо, 8харин Израилиин арад зониие хойто зүгэй орон нютагһаа болон тараагша бүхы оронуудһаа асарһан Эзэнэй амиды мэндэ байһантайл адли баталгаатай гэжэ хэлэжэ байха саг дүтэлөө. Тиигээд тэдэ өөрынгөө газар дээрэ ажаһууха.Худал хуурмаг лүндэншэд тухай
9Лүндэншэд тухай. Зүрхэмни хүмэринэ,бүхы бэем һалганана.
Эзэнһээ
ба Тэрэнэй нангин үгэнүүдһээ боложо,
би һогтуу хүн мэтэ,
үзэмэй дараһан архида
диилдэһэн хүн мэтэ болооб.
10Эзэндэ үнэн сэхэ бэшэ зоноор
энэ газар дүүрэшоо.
Тэдэнэй зорилгонь –
муу муухай үйлэ хэрэгүүд,
худал хуурмагаар тэдэ
засаг түлөөлгэнүүдые абана.
11Эзэн айладхана:
Худал хуурмаг лүндэншэд,
санаартад һүзэггүй.
Өөрын үргөөдэшье Би тэдэнэй
хорон муу үйлэ хэрэгүүдые харааб.
12Тэдэнэй харгы замынь
халтирхай, харанхы болохо.
Тэдэниие түлхихэдэнь, унашаха.
Тэдээндэ гай тодхор ушаруулхаб,
хэһээлтын сагынь дүтэлөө.
Энэ болбол Би, Эзэн, айладхана мүн!
13Энээнһээ гадна, Самариин
худал хуурмаг лүндэншэдэй
галзуутан, нүгэл хэхые хараа һэм.
Тэдэ Баалай нэрэһээ абарал буулгажа байгаа.
Тиигээд Минии арад түмэн болохо Израилиие зүб харгыһаань хадууруулаа.
14Харин Иерусалимай худал лүндэншэд
бүри муухай юумэ үйлэдэнэ:
тэдэ һальхай забхай ябадалтай,
худалаар хэлэнэ,
муу юумэ хэгшэдые дэмжэнэ.
Тиимэһээнь хэншье муу хэрэгээ орхиногүй.
Тэдэ бүгэдэ Намда жэгшүүритэй,
Содом болон Гоморрын зон шэнги.
15Тиимэһээ Би, Түмэн Сэрэгтэ Эзэн,
Иерусалимай худал лүндэншэдтэ
хоротой эдеэ эдюулхэб,
хоротой уһа уулгахаб.
Юуб гэбэл, тэдэ бүхы газар нютагаар
Бурханда һүзэггүй байлгые дэлгэрүүлээ.
16Түмэн Сэрэгтэ Эзэн Иерусалимай зондо иигэжэ айладхана: – Худал лүндэншэдэй хэлээшые бү шагнагты. Тэдэ таанадые хооһоор, дэмы найдуулна. Минии айладхал бэшэ өөһэдынгөө хүсэһэн, һанаһан юумэ таанадта дуулгана. 17Минии үгэ дуулахаһаа арсадаг зондо тэдэ «Амар амгалан байхат» гэжэ хэдэн дахин хэлэжэл байна. Үсэд, һанаашаараа юумэ хэдэг зондо «гай тодхор таанадтай тохёолдохогүй» гээд хэлэнэ. 18Би хэлэбэб: – Худал лүндэншэ эдэнэрэй хэнииньшье Эзэнэй нюуса бодолнуудые мэдэнэгүй, тэдэ Эзэнэй үгэ соносоогүй, анхараагүй. 19Үзөөрэйгты, Эзэнэй уур хилэнтэй шуурган эбхэрэн дүтэлжэ байна. Тэрэ хорон муу зоной толгой дээрэ эрьелдэн бууха. 20Тэрэнэй һанаһанаа хээгүйдэнь энэ түгэсэхэгүй. Зон һүүлдэнь лэ энээниие ойлгохо. 21Эзэн айладхана: – Би энэ худал лүндэншэдые эльгээгээгүйб, тэдэ өөһэдөө ошоо. Би тэдээндэ ямаршье айладхал буулгаагүйб, тэдэ өөһэдөө Минии нэрэһээ тунхаглал тараана. 22Хэрбээ тэдэ Минии нюуса бодолнуудые мэдэһэн һаа, арад түмэндэмни Минии үгэ тунхаглажа, нүгэлтэй муу байдалһаань болон муу хэрэгүүдһээнь холодуулха һэн. 23Би нэгэ газарта бэшэ, хаа-хаанагүй оршодог Бурхамби. 24Намһаа хэншье хорон хоргодон байжа шадахагүй. Намайе тэнгэри болон газарта – хаа-хаанагүй байна гээд мэдэнэ гүт? 25Минии нэрэһээ худал лүндэншэдэй зүүдэн соонь айладхал буулгаһан тухайм хэлэжэ байһые Би мэдэнэб. 26Хэды болотор эдэ худал лүндэншэд худалаар хэлэжэ, зониие мэхэлжэ байхаб? 27Тэдэнэй үбгэ эсэгэнэрэй Баалда эрьежэ, Намайе мартаһандал, тэдэ бэе бэедээ хөөрэдэг өөһэдынгөө зүүдээрээ Минии арад зондо нэрыемни мартуулхаяа һанана. 28Зүүдэ зүүдэлһэн худал лүндэншэ тэрэнээ зүүдэн гээд хөөрэг лэ. Орооһонһоо һолоомын тад ондоо байһандал адли тэдэнэй зүүдэниинь Минии айладхал бэшэ. Харин Минии үгэ дуулаһан нэгэн Минии үгые үнэн зүбөөр дамжуулха ёһотой. 29Минии айладхал гал дүлэндэл адли, шулуу буталдаг алхатай адли. 30Бэе бэеһээ дуулаһан үгэнүүдээ Минии айладхал гээд тунхагладаг худал лүндэншэдэй урдаһаа эсэргүүсэнэб! 31Өөрынгөө үгэнүүдые Минии үгэнүүд мэтээр соносходог худал лүндэншэдэй урдаһаа эсэргүүсэнэб! 32Минии, Эзэнэй, айладхал шагнагты! Худал зүүдэнүүдээ хөөрэжэ, тэдэ худал хуурмагаараа болон һайрхуу үгэнүүдээрээ арад зонойм толгой эрьюулнэ. Би тэдэниие эльгээгээгүйб, ямаршье захиралта үгөөгүйб. Тэдэ улад зондо ямаршье туһагүй. Энэ болбол Би, Эзэн, айладхана мүн!
Эзэнэй айладхал хүндэ ашаан бэшэ
33Эзэн намда иигэжэ айладхаба: – Ерэмияа, Иудын улад зон гү, али худал лүндэншэ, үгышье һаа, санаартан шамһаа «Эзэнэй айладхаһан зүйл юун бэ?» гэжэ асуужа магад. Ши тэрээндэ: «Таанад Эзэнэй хүндэ ашаан ▼▼ Эхэ еврей хэлэн дээрэ «массаа» гэһэн үгэ хэдэн удхатай: зүгнэлгэ; хүндэ ашаан; тиимэһээ эндэ ба саашадаа үгын удхаар наадажа, Бурханай зарлиг тайлбарилагдана.
гээшэт. Тэрэ таанадые хаяхаяа байна», – гээд хэлээрэй. 34Худал лүндэншэ гү, али санаартан, үгышье һаа, улад зоной нэгэн «Эзэнэй зүгнэһэн зүйл» гээд хэлэжэ магад. Иимэ хүниие, гэр бүлыень Би хэһээхэб. 35Энээнэй орондо таанад нүхэдһөө, түрэл түтимһөө «Юун гэжэ Эзэн харюусааб? Юун гэжэ Эзэн айладханаб?» гэжэ асуудаг байха ёһотойт. 36Иигээд тэдэ «Эзэнэй хүндэ ашаан» гэһэн үгэнүүдые дуугарха ёһогүй. Тиигэжэ дуугараа һаань, Би айладхалаа тэдээндэ үнэхөөр хүндэ ашаан болгожорхихоб. Улад зон Минии, өөһэдынгөө амиды мэндэ Бурханай, Түмэн Сэрэгтэ Бурханай, үгые ондоо болгоо. 37Лүндэншэһөө «Эзэн юун гэжэ харюусааб?» гэжэ гү, али «Эзэн юун гэжэ айладхааб?» гэжэ асуугаарайгты. 38Минии үгэ дуулангүй, «Эзэнэй хүндэ ашаан» гэһэн үгэнүүдые хэлээ һаатнай, 39Би таанадые хүндэ ашаан мэтээр үргэжэ, Өөрһөө холо хаяхаб! Танда, мүн үбгэ эсэгэнэртэтнай үгэһэн Иерусалим хотые мүн лэ хаяхаб! 40Би тэдээн дээрэ хэтэ мүнхэдөө нэрээ гутаалга, хэзээдэшье мартагдахагүй хэтэ мүнхын доромжолго тохохоб.
Copyright information for
BxrBBL2024