‏ Jeremiah 24

Хоёр түрсүүг инжир

1Эзэнэй намда үзэгдэл үзүүлхэдэнь, Эзэнэй үргөөгэй урда табяатай хоёр түрсүүг инжир харабаб. (Энэ хадаа Вавилооной хаан Навуходоносорой Иудын хаан, Ёякиимэй хүбүүн Ехонияа гэгшые, Иудын түшэмэлнүүдые урашуул болон дархашуултай хамта Иерусалимһаа олзолон абажа, Вавилоон руу абаашаһанай удаа болоо бэлэй.) 2Нэгэ түрсүүг соонь эртэ эдеэшэһэн, угаа һайн инжир байба, нүгөө түрсүүгтэнь гутаһан, эдихын аргагүй муу инжир байгаа.

3Тиигээд Эзэнэй намда:

– Ерэмияа, юу харанабши? – гэхэдэнь, би:

– Инжир. Һайниинь угаа һайн, мууниинь угаа муу, эдихын аргагүй, – гэбэб.

4Тиихэдэм Эзэн намда:

5– Би, Израилиин Эзэн Бурхан, Вавилоон руу Иудаһаа туужа абаашагдаһан улад зон энэ һайн инжиртэл адли гээд тоолоноб. Би тэдээндэ һайнаар хандахаб. 6Тэдэнэй хойноһоо адаглажа, энэ газар нютаг руу һөөргэнь асархаб. Би тэдэниие һуурижуулхаб, унагаахагүйб, тарин һуулгахаб, зулгаан татахагүйб! 7Би тэдээндэ Намайе мэдэдэг болохо хүсэл үгэхэб. Тиихэдэм тэдэ Минии арад зон, Би тэдэнэй Бурхан болохоб. Тэдэ Нам руу бүхы зүрхэ сэдьхэлээрээ таталдан бусаха.

8Иудын хаан Цэдэкиия гэгшые, тэрэнэй түшэмэлнүүдые болон энэ орон нютагта үлэгшэ Иерусалимай бүхы зонтой, Египедтэ ажаһуудаг зонтой муудаһанайнь тула эдижэ болохогүй инжиртэл адляар хандахаб. 9Газар дэлхэйн бүхы хаан түрэнүүдэй һүрдэмөөр гай тодхор тэдээндэ тохохоб. Минии тэдэниие тарааһан бүхы газарнуудаар зон тэдэниие энеэдэ наада бариха, доромжолхо, шоодборилхо ба хараал шэрээл табиха. 10Би тэдэндэ болон үбгэ эсэгэнэртэнь үгэһэн газар нютагһаа тэдэниие үгы болготороо тэдээндэ дайн дажар, үлэсхэлэн байдал, үбшэ хабша эльгээжэл байхаб, – гэжэ айладхаба.
Copyright information for BxrBBL2024