Jer 25 | BxrBBL2024 | STEP | Иудын хаан, Ёшияагай хүбүүн Ёякиимэй дүрбэдэхи жэлээ Иудын хан түрэ зонхилжо байха үедэнь Иудын хан түрын бүхы улад зон тушаа мэдээсэл Эзэнһээ би абаа һэм. Энэ хадаа Вавилооной хан түрые Навуходоносорой түрүүшын жэлээ зонхилжо байха үедэнь һэн.

‏ Jeremiah 25

Хойто зүгэй дайсан

1 Иудын хаан, Ёшияагай хүбүүн Ёякиимэй дүрбэдэхи жэлээ Иудын хан түрэ зонхилжо байха үедэнь Иудын хан түрын бүхы улад зон тушаа мэдээсэл Эзэнһээ би абаа һэм. Энэ хадаа Вавилооной хан түрые Навуходоносорой түрүүшын жэлээ зонхилжо байха үедэнь һэн. 2 Иудын хан түрын болон Иерусалимай улад зондо би иигэжэ айладхал дамжуулан хэлээб:

3 – Хорин гурбан жэлэй туршада Аммооной хүбүүн Ёшияагай арбан гурбадахи жэлээ Иудын хан түрые зонхилжо байхаһаань хойшо, мүнөөшье болотор Эзэн намда айладхал буулгажа байгаа. Би таанадта дахин-дахин хэлэжэл байгааб, теэд таанад анхараагүйт. 4 Эзэнэй лүндэншэд болохо албатанаа таанад руу дахин дахин эльгээгээшье һаань, таанад шагнаагүй, анхаралаа хандуулаагүй бэлэйт. 5 Эзэнэй та бүгэдэндэ болон үбгэ эсэгэнэртэтнай хэтэ мүнхэдөө үгэһэн газар нютагта саашадаашье ажаһуухынтнай тула ажабайдалай муу замһаа, хэдэг бузар муухай үйлэ хэрэгүүдһээ таанадай буруу харан ошохо тухай тэдэ хэлээ һэн. 6 Ондоо бурхадта алба хэхэгүй, мүргэхэгүй, өөһэдын гараар бүтээһэн шүтөөнүүдээр Эзэниие уурлуулхагүй тухай тэдэ таанадта хэлээ. Эзэнэй үгэ дуулаа гээшэ һаатнай, Тэрэ таанадые хэһээхэгүй бэлэйл. 7 Теэд Эзэнэй айладхаһаар, таанад Тэрэнэй үгэ дуулахаһаа арсаат. Өөһэдынгөө бүтээһэн шүтөөнүүдөөр Тэрэнэй уур сухал хүргөөт, өөһэдтөө гай тодхор татаат.

8 Тиимэ ушарһаа Түмэн Сэрэгтэ Эзэн иигэжэ айладхажа байна:

– Таанадай Минии үгэ дуулаагүй һэн тула 9 хойто зүгэй арадуудай болон Өөрынгөө албатан, Вавилооной хаан Навуходоносорой хойноһоо эльгээжэ, танай орон нютагай, улад зонойтнай, хүршэ арадуудайтнай урдаһаа дайлахыень асархамни. Таанадые хүршэнэртэйтнай хамта бүримүһэн усадхажа, хэтэ мүнхын һандарал, аймшагтай, угаа муухай зүйл болгон үлөөхэб. Энэ болбол Би, Эзэн, айладхана мүн! 10 Баярай, хүхилдөөнэй абяа, түрэ найрай жаргалтай абяа дуунуудые Би таанадта таһалдуулхаб. Талха татаха орооһогүй, дэн аһааха тоһогүй болохот. 11 Энэ бүхэли орон нютаг һандаргагдан орхигдожо, аймшагтай юумэн байха, хүршэ арадууд Вавилооной хаанда далан жэлэй туршада алба хэхэ. 12 Удаань гэм зэмэйнь түлөө Вавилооной арад зониие хаантайнь хамта хэһээхэб. Тэрэ орон нютагые хюдажа, хэтэ мүнхын һандарал болгоод орхихоб. 13 Ерэмияагай аша туһаар дамжуулһан бүхы заналтануудаа – энэ ном соо бэшээтэй бүхы гай тодхорнуудые Вавилооной орон нютагта шэглүүлэн бэелүүлхэб. 14 Вавилооной зоной хэһэн юумые өөһэдтэнь хүргэхэб, олон үндэһэ яһатад, агууехэ хаашуул тэдэниие богоол болгохо.

Үндэһэ яһатан тушаа

15 Израилиин Эзэн Бурхан намда иигэжэ айладхаба:

– Энэ аяга Минии уур хилэнгээр дүүрэнхэй. Тэрэниие абаад, Минии таанадые эльгээһэн бүхы арадуудта ошожо, тэрээнһээ уулга. 16 Тэдэ уужа, найгажа эхилхэ, тэдээн руу Минии шэглүүлһэн дайн дажарһаа боложо, ухааниинь муудаха.

17 Тиигээд би Эзэнһээ тэрэ аяга абажа, Тэрэнэй намайе эльгээһэн бүхы арадуудта баадхан уулгабаб. 18 Иерусалимай, Иудын хан түрын бүхы хотонуудай зондо газарыень хооһон элһэн сүл губи, үзэмжэгүй муухай, зоной хараал болгохын тула хаашуул, ноёдтойнь хамта энэ аягаһаа уулгабаб. Газарынь тон тиимэ болоол даа. 19 Хэдтэ энэ аягаһаа үшөө уулгаабиб гэхэдэ, Египедэй фараондо, тушаалтадтань, түшэмэлнүүдтэнь, бүхы арад зондонь; 20 Египет соо байһан ерүүл хариин зондо, Ууц орон нютагай бүхы хаашуулда, пилиштүүдэй орон нютагай хаашуулда – Ашхэлооной, Гаазай, Экрооной, Ашдоодой үлэгдэл зоной хаашуулда; 21 Эдоомой, Моһаабай, Аммооной улад зондо; 22 Тиирэй, Сидооной, далайн саадахи олтирогуудай хаашуулда; 23 Дэдаан, Тэмаа, Бүүз хотонуудай ажаһуугшадта – үһэеэ һаншагтаа хюһадаг бүхы улад зондо; 24 Аравиин бүхы хаашуулда – элһэн сүл губяар ажаһуугша арадуудай хаашуулда; 25 Зимриигэй, Элаамай, Мидиин бүхы хаашуулда; 26 хоорондоо бага, ехэшье зайтай ажаһуудаг хойто зүгэй хаашуулда. Юрэдөө, дэлхэй дээрэ байгааша бүхы хан түрэнүүдэй улад зондо уулгабаб. Харин Шэшаахай ^{▼▼ Иигэжэ эндэ Вавилоон нэрлэгдэнхэй.} хаан бултанай һүүлдэ ууха.

27 Тиигээд Эзэн намда иигэжэ айладхаба:

– Улад зондо Минии, Түмэн Сэрэгтэ Эзэнэй, Израилиин Бурханай, захиралта дуулга. Уугты, һогтогты, бөөлжэн унагты гэжэ захирнаб. Танай урдаһаа дайн дажар эльгээхэдэм, бодожо шадахагүйт. 28 Хэрбээ тэдэнэй шинии гарһаа аяга абажа уухаяа арсаа һаань, ши тэдээндэ заабол ууха ёһотойт гэжэ Түмэн Сэрэгтэ Эзэн айладхана гээд хэлээрэй. 29 Өөрын хото соо гай тодхор үйлэдэжэ эхилхэдэмни тэдэ хэһээлтэ амасангүй үлэхэ гэжэ гү? Үгы. Тэдэ хэһээгдэхэ, юуб гэхэдэ, дэлхэйн бүхы улад зоной урдаһаа Би дайн дажар эльгээхэм. Энэ болбол Би, Түмэн Сэрэгтэ Эзэн, айладхана мүн!

30 Ерэмияа, ши Минии айладхал бултыень тэдэ зондо дуулга. Тэдээндэ иигэжэ хэлэ: Эзэн огторгойһоо архиржа,
нангин үргөөһөө аянгатаха,
Өөрын зоной урдаһаа хэрхирхэ.
Үзэмэй жэмэс дэбһэжэ байһан хүндэл адли
Тэрэ дэлхэйн бүхы улад зоной урдаһаа хашхарха.
31 Дэлхэйн заха хүрэтэр абяаниинь сууряатаха.
Эзэн үндэһэтэдэй урдаһаа тулгаха,
бүхы зониие шүүбэрилхэ,
хорото муу зониие дайнда һалгааха.
Энээниие Эзэн айладхаа!

32 Израилиин Бурхан, Түмэн Сэрэгтэ Эзэн иигэжэ айладана: Гай тодхор нэгэ үндэһэ яһатанһаа нүгөөдэ үндэһэ яһатан хүрэтэр дамжан ябана, газар дэлхэйн аласһаа агууехэ шуурган хүдэлжэ эхилээ. 33 Тэрэ үдэр Эзэндэ хюдагдаһан зоной бэенүүд дэлхэйн нэгэ захаһаа нүгөө хүрэтэр таранхай хэбтэхэ. Хэншье тэдэнэй хойноһоо гашуудахагүй, тэдэниие суглуулхагүй, хүдөөлүүлхэгүй. Газарай хүрьһэн дээрэ үтэгжүүл мэтэ тэдэ хэбтэхэ.

34 Һугшаран уйлыт, удамаршад, арад зоноймни һүрэгэй эзэд, шангаар бархирыт! Юуб гэбэл, таанадай хюдагдаха болон таран бутарха үе саг хүрэжэ ерээ. Таанад үнэтэ амһарта мэтээр бута сохигдохот. 35 Тэрьедэхэ, абарагдаха газар таанадта үгы байха. 36 – 37 Арадыетнай Эзэнэй уур хилэн дундаа усадхаһанда, амар амгалан нютагыетнай һандарал болгоод орхиһондо таанадай ёолохо, уйлаха абяан дуулдана. 38 Өөрынгөө эшээн орхижо ошоһон арсаландал адли Эзэн Өөрын арад зонһоо арсан ошобо. Орон нютагынь дайн дажарһаа, Тэрэнэй шэрүүн уур хилэнһээ боложо хооһон элһэн сүл губи болоол!