‏ Jeremiah 27

Навуходоносорой мэдэл доро орогты!

1Ёшияагай хүбүүн Цэдэкиия гэгшын Иудын хан түрые зонхилжо эхилээд байхада, Эзэн Ерэмияада үгэ айладхаба. 2Хөөмэгшэ болон уялаануудые өөртөө хэжэ, хүзүүндээ үмдэхыемни Эзэн намда захирба. 3Тиигээд Иудын хаан Цэдэкиияда Иерусалим ерэдэг элшэнэрээр дамжуулан, Эдоомой, Моһаабай, Аммооной, Тиирэй, Сидооной хаашуулда мэдээсэл эльгээхыемни Тэрэ намда захираа. 4Түмэн Сэрэгтэ Эзэн, Израилиин Бурхан, иимэ айладхал хаашуулдаа тэдэнэй дуулгаха тухай минии хэлэхые захирба:

5– Би Өөрын агууехэ шадалаар болон хүсөөр газар дэлхэйе, тэрээн дээрэ ажаһуудаг зониие, ан амитадые бүтээгээб. Энээниие Би дуратай нэгэндээ үгэхэб. 6Иигэжэ Би эдэ бүхы үндэһэ яһатадые Өөрынгөө албатанай, Вавилооной хаан Навуходоносорой мэдэлдэ үгэнэб. Зэрлиг амитадыешье Тэрээндэ алба хэдэг болгооб. 7Орон нютагайнь болон өөрынь Навуходоносорой доройтохо сагай ерэтэр бүхы үндэһэ яһатан тэрээндэ, хүбүүндэнь болон ашадань алба хэн байха. Доройтоһонойнь удаа өөрынь арад зон олон зонтой яһатанда болон томо хаашуулда алба хэдэг болохо.

8Харин Вавилооной хаан Навуходоносорто алба хэдэггүй, мэдэл доронь ородоггүй үндэһэ яһатан гү, али хаан түрэ олдоо һаань, Би тиимэ үндэһэ яһатаниие Навуходоносорой гараар усадхатараа дайн дажараар, үлэсхэлэн хооһон байдалаар болон тахал үбшөөр зобоон-хэһээн байхаб. 9«Таанад Вавилооной хаанай мэдэлдэ бү орогты» гэжэ хэлэдэг лүндэншэдөө, үзэлшэдөө, зүүдэ тайлбарилагшадаа, эди шэдитэнээ, эльбэтэйшүүлээ бү дуулагты. 10Тэдэ таанадые мэхэлнэ, орон нютагһаа танай холодуулагдахые хүсэнэ. Би та бүгэдые үлдэн гаргахаб, тиигээд таанад үхэхэт. 11Харин Вавилооной хаанай мэдэлдэ ороһон, тэрээндэ алба хэдэг болоһон үндэһэ яһатанда Би орон нютагтаа үлэхыень, газараа элдүүрилжэ, тэндээ амидархыень зүбшөөхэб. Энэ болбол Би, Эзэн, айладхана мүн!

12Би иимэл үгэнүүдые Иудын хаан Цэдэкиия гэгшэдэ хэлээб:

– Вавилооной хаанай мэдэл доро орожо, тэрээндэ болон арад түмэндэнь алба хэгты, тиигээд амиды мэндэ үлэхэт. 13Вавилооной хаанда алба хэдэггүй үндэһэ яһатан тухай Эзэнэй айладхаһанай ёһоор юундэ ши болон арад түмэншни дайн дажарһаа, үлэсхэлэн хооһон байдалһаа болон тахал үбшэнһөө үхэхэ ёһотой юм? 14Вавилооной хаанай мэдэл доро орохогүй тухай хэлэдэг лүндэншэдые бү дуулагты. Тэдэ таанарые мэхэлнэ. 15Тэдэниие эльгээгээгүй тухайгаа Өөрөө Эзэн тунхаглаа бэлэйл. Эзэнэй таанадые үлдэн гаргахын, таанадай үхэхын тула тэдэ зорюута Эзэнэй нэрэһээ худал үгэнүүдые соносхоно. Тиигэжэ таанад болон энэ худал үгэнүүдые хэлэгшэ лүндэншэд алуулхат.

16Би санаартадта болон бүхы зондо хандан, Эзэнэй иигэжэ айладхаһые дуулгабаб:

– Нангин үргөөгэй үнэтэ баялигууд удахагүй Вавилоонһоо бусаагдаха гэжэ хэлэдэг лүндэншэдые бү шагнагты. Тэдэ таанадые мэхэлнэ. 17Бү шагнагты тэдэниие! Вавилооной хаанай мэдэл доро орогты, тиигээд амиды мэндэ үлэхэт. Энэ хото юундэ һандаргагдаха юм? 18Харин тэдэ үнэхөөр лүндэншэд байжа, Минии үгэ мэдэдэг юм һаа, Һүмэ соо, мүн Иудын хаанай ордон соо, Иерусалимда үлөөшэ үнэтэ баялигуудые Вавилоон руу эльгээхэгүй тухай Намайе, Түмэн Сэрэгтэ Эзэниие, одоо гуйг лэ.

19– 20(Вавилооной хаан Навуходоносор Иудын хаан, Ёякиимэй хүбүүн Ехонияа гэгшые, мүн Иудын хан түрын, Иерусалимай бүхы ноёд түшэмэлнүүдые Вавилоон руу сүлэлгэдэ абаашахадаа, баханануудые, уһанай гуулин ехэ амһарта, табюурнуудые болон Һүмын бусад баялигуудые Иерусалимда үлөөһэн байгаа.)

21Түмэн Сэрэгтэ Эзэн, Израилиин Бурхан, Һүмэ соо болон Иудын хаанай ордон соо, Иерусалимда үлөөшэ үнэтэ баялигууд тушаа иигэжэ айладхана: 22«Тэдэ Вавилоон руу абаашагдаха, Минии анхартар тэндээл байха. Удаань Би тэдэниие бусаажа, энэ газартань һөөргэнь асархаб. Энэ болбол Би, Эзэн, тунхаглана мүн!»
Copyright information for BxrBBL2024