‏ Jeremiah 30

Израилиин Бурханай арад түмэндөө найдуулга

1Израилиин Эзэн Бурхан намда иигэжэ айладхаба:

2– Минии үгэнүүдые бултыень номдо бэшэ. 3Юуб гэхэдэ, Өөрынгөө арадые, Израиль болон Иудын хан түрые һэргээн бодхоохо сагни дүтэлжэ байна. Элинсэг хулинсагтань үгэһэн газарта тэдэниие бусаан асархаб, тиихэдэм тэдэ тэрэ газар дайдые дахин эзэмдэн ажаһууха. Энэ болбол Би, Эзэн, тунхаглана мүн! 4Израиль болон Иудын хан түрын зондо Эзэн иигэжэ айладхажа байна:
5Угаа һүрдэһэн дуу Би дууланаб,
амгалан тайбанай бэшэ, айһанай абяа дуу.
6Асуугты, бодоод үзэгты:
эрэ хүн үхибүү түрэжэ шадаха гү?
Теэд үхибүү түрэжэ байһан эхэнэртэл,
эрэ хүн бүхэнэй гараа гэдэһэн дээрээ хээд байхые юундэ Би харанабиб?
Юундэ бултанайнь шарайнууд сухигар бэ?
7Оёо! Тэрэ угаа муу үдэр дүтэлжэ байна.
Тэрээндэ адли үдэр үзэгдөөгүй.
Энэ болбол Минии улад зоной зоболонгой үе саг,
теэд тэдэ амиды мэндэ гарасалдаха.

8Түмэн Сэрэгтэ Эзэн айладхана:
Тэрэ дүтэлжэ байгаа үдэр Би
тэдэнэй хүзүүн дээрэхи хөөмэгшые эбдэхэб,
гэнжыень таһалхаб.
Тиихэдэм тэдэ хариин зоной богоол болохоёо болихо.
9Харин Намда, Өөрынгөө Эзэн Бурханда,
мүн Минии хан шэрээдэ һуулгаһан
Давидай уг удамда тэдэ алба хэжэ эхилхэл.
10Минии зараса Яков, бү ай,
Израилиин зон, бү һүрдэ.
Баряанда байһан холын нютагһаатнай
Би таанадые абархаб.
Таанад гэртээ бусажа, амар амгалан ажаһуухат.
Таанадые хэншье айлгахагүй.
11Би таанадтай байхаб, абархаб.
Таанарые арадуудай хоорондо тараагаа һэм,
тэдэ арадуудые Би усадхахаб.
Гэбэшье таанадые усадхахагүйб.
Харин таанадые хэһээнгүй орхихогүйб,
теэд хэһээхэдээ, үнэн зүбөөр хэһээлтэ амасуулхаб!
Энэ болбол Би, Эзэн, айладхана мүн!
12Эзэн арад зондоо иигэжэ айладхана:
Шархатнай эдэгэшэгүй,
гэмтэһэнтнай угаа хүндэ.
13Таанад тушаа һанаа зобохо хүн үгы,
ярыетнай эмшэлхэ арга үгы,
эдэгэхэ ямаршье найдал байхагүй.
14Бүхы амарагуудтнай таниие мартаа,
бэшэ таанадые хэрэгсээхэеэ болёо.
Дайсанай сохилтоор,
шэрүүн хэһээлтээр таанадые дайрааб,
юуб гэбэл, гэм зэмэтнай угаа ехэ.
Нүгэлтнай тоолошогүй олон.
15Гэмтэһэн тухайгаа бэшэ бү гомдол баригты,
үбшэнтнай эдэгэшэгүй.
Гэм зэмэтнай угаа ехэ,
нүгэлтнай тоолошогүй олон,
тиимэһээл Би таанадые хэһээгээб.
16Теэд мүнөө таанадые залгигша бүхэн
өөрөө залгюулха,
дайсадтнай өөһэдөө баряанда орохо,
таниие тоногшод өөһэдөө тонуулха,
танһаа олзо буляан абагшад өөһэдөө олзолуулагдаха!
17Дайсадтнай таниие
«Сион – хэндэшье хэрэггүй,
хэншье тэрэниие анхархагүй» гээд хэлээ.
Теэд Би танда тэнхээ үгэхэб,
шархыетнай эдэгээхэб.
Энэ болбол Би, Эзэн, айладхана мүн!
18Эзэн айладхана:
Яковай майхангуудые һайн һайханаар һэргээн бодхоохоб,
гэр бүлэ бүхэниие хайрлахаб,
Иерусалим дахин һэргэхэ,
ордон урдынхидал адляар бодохо!
19Тэндэ ажаһуугшад магтаал дуулаха,
баясан-сэнгэн хашхаралдаха.
Минии үршөөхэдэ, тэдэ олошорхо.
Минии дээгүүр үргэхэдэ, тэдэ доромжолуулхаяа болихо.
20Тэдэнэй урданай хүсэ шадал һэргэхэ,
тэдэ Минии урда дахин шанга болохо.
Дарлагшадыень хэһээхэб!
21Ударидагшань – тэдэнэй нэгэн,
захирагшань – өөһэд дундаһаань тодорхо.
Минии тэдэниие урихада, тэдэ дүтэлэн ерэхэ.
Урилгагүйгөөр Нам руу дүтэлхэеэ зүрхэсэхэ хэн байхаб даа?
22Тэдэ Минии арад түмэн.
Би тэдэнэй Бурхан болохоб.
Энэ болбол Би, Эзэн, тунхаглана мүн!
23Үзөөрэйгты, Эзэнэй уур хилэн – шуурган,
аймшагтай бордоһон!
Тэрэ муу зоной толгой дээрэ бууха.
24Тэрэнэй һанаһанаа бэелүүлээгүйдэ
уур хилэнгынь буурахагүй.
Ерээдүй сагта зон эдэ бүгэдые ойлгохо.