‏ Jeremiah 31

Израилиин зоной гэртээ бусалга

1Эзэн ииигэжэ айладхана:

– Минии Израилиин бүхы обогуудта Бурхан болохо, мүн тэдэнэй Минии арад түмэн болохо саг дүтэлжэ байна. 2Үхэл хаталһаа зайсаһан зондо элһэн сүл губида Би нигүүлэсхыгээр хандаа һэм. Израилиин улад зоной амаралта тухай угаа гуйхада, 3Би тэдээндэ холоһоо үзэгдөө бэлэйб. Израилиин арад зон, Би таанадта хэтэ мүнхэдөө дурланхайб, тиимэһээл хайра энэрэлээ та бүгэдэндэ үзүүлнэб. 4Дахин таанадые һуурижан байгуулхаб, дахин таанад хэнгэрэгүүдээ барин, баяртайгаар бүжэглэн-хатаран байхат. 5Самариин гүбээнүүд дээрэ үзэмэй модоной сэсэрлигүүдые дахин һуулгахат. Тэдэниие һуулгагша таанад өөһэдөө үрэ жэмэсыень эдидэг байхат! 6Зүб даа, Эпрааимай гүбээнүүд дээрэ харуулшадай «Бодогты, Сион өөдэ Эзэн руу, өөһэдынгөө Бурхан руу, ошоё» гээд дуудаха саг дүтэлөө.

7Эзэн иигэжэ тунхаглана: Яковта баяртай шангаар дуу дуулагты,
үндэһэ яһатадай эгээл ехыень угтагты.
Тунхаглан, иимэ магтаал үргэгты:
«Эзэн Өөрынгөө арад түмэниие абараа,
үлэһэн бүхы зоноо абараа!»
8Үзөөрэйгты, Би тэдэниие хойто зүгтэхи нютагһаа суглуулхаб.
Һохор ба дохолон зон, хээлитэй ба үхибүү түрэхэ гэжэ
үбдэжэ байһан эхэнэрнүүд тэдэнэй дунда байха.
Үй түмэн зон һөөргөө бусаха.
9Тэдэ уйлалдан ошоо һэн,
Би хадаа тэдэниие аргадан, сэдьхэлыень заһан бусаахаб.
Би тэдэниие урасхал уһан руу
бүдэрхэгүй тэгшэхэн замаар хүтэлэн асархаб.
Юуб гэбэл, Би Израильда Эсэгэнь болонхойб,
Эпрааим болбол Минии ууган хүбүүн юм.
10Эзэн тунхаглана:
Үндэһэ яһатад, Намайе шагнагты,
алас холын эрьенүүдээр үгыем соносхогты.
Би Израилиин арад түмэниие тараагаа һэм,
теэд Бил тэдэниие суглуулхаб.
Хонишоной хонин һүрэгөө хамгаалдаг мэтэ
Би тэдэниие хамгаалхаб.
11Би Яковые сүлөөлөөб.
Өөрһөөнь хүсэтэй арадһаа абарааб.
12Израилиин арад зон бусажа,
Сионой хада ууланууд дээрэ баярлан шууялдаха,
Минии үршөөһэн хэшэг болохо
орооһо таряанда, шэнэ үзэмэй дараһан архида, оливын тоһондо, мал һүрэгэй түлдэ баярлаха.
Сэсэглэжэ байгаа саадтал адли тэдэ боложо,
дахин хэзээдэшье доройтохогүй.
13Тиигээд залуу басагад, залуу хүбүүд ба хүгшэн зон
хамта бүжэглэн баясаха.
Тэдэнэй сэдьхэл заһажа,
гашуудалыень баяраар һэлгэхэб,
зоболонгыень мүн лэ баяраар һэлгэхэб.
14Санаартадай сэдьхэлые элбэг-дэлбэгээр дүүргэжэ,
арад түмэнэйнгөө бүхы эрилтэнүүдые хангахаб.
Энэ болбол Би, Эзэн, айладхана мүн!

Эзэнэй Израильда энэрхы хандаса

15Эзэн айладхана:
Угаа гашуудан уйлаха абяан
Рамаада дуулдана.

Рахээл хюдуулһан үхибүүдээ шаналан уйлана, һанааень заһахын аргагүйл.
16Уйлахаяа тэбшэ,
нулимса бү гарга.
Үхибүүдэйнгээ түлөө ябаһан
оролдолгонуудшни дэмы бэшэ,
хүүгэдшни дайсадай нютагаһаа бусажа ерэхэл.
17Найдалшни – ерээдүй сагта.
Үхибүүдшни өөһэдын нютаг руу
бусажа ерэхэл.
Энэ болбол Би, Эзэн, тунхаглана мүн!
18Эпрааимай гашуудан иигэжэ хэлэхые би соносооб:
«Эзэн, бидэ һургагдаагүй буха шэнги байгаабди.
Та бидэниие хэһээжэ һургаал заагаат.
Эзэн Бурхамнай, бидэниие бусаагыт,
бидэ Тандаа бусаха һанаатайлди.
19Бидэ Танһаа буруу хараабди,
теэд һүүлдэнь гэмшэжэ, бусахаяа һанаа бэлэйбди.
Һургаал абахадаа, хэһэн үйлэ хэрэгүүд тухайгаа
ехэ гэмшээ һэмди.
Залуудажа, нүгэл хэжэ,
һүүлдэнь ехэ эшээ, доромжолуулагдаабди».
20Эпрааим Минии хайрата хүбүүн бэшэ юм гү?
Эгээл дуратай үхибүүмни бэшэ юм гү?
Тэрээн тухай ама гараха бүхэндөө
тэрэниие угаа энхэрэн һанадагби.
Минии зүрхэ сэдьхэл тэрээн руу тэгүүлдэг,
Эпрааимда үршөөл хайраяа үзүүлхэб!
21Өөртөө зорюулан, замай тэмдэгүүдые табижа, дохёо тэмдэгүүдые бүхэлэ.
Өөрын оюун бодолые ябаһан зам руугаа, ехэ зам руу шэглүүлэ.
Эрьен ерыт, Израилиин улад зон, өөрын орхин ошоһон хото руу эрьен ерэгты.
22Найдалгүй улад зон, таанад хэды болотор энэ-тэрээгүүр ябаха юмта?
Юуб гэбэл, Би газар дэлхэй дээрэ нэгэ шэнэ зүйл бүтээгээб,
эмэгтэй хүнэй эрэ хүниие хамгаалжа ▼

▼ Эхэ еврей хэлэн дээрээ «эхэнэр хүн эрэ хүнэй хажууда» гээд бэшээтэй.

байһандал адли тэрэ юумэн юм.

Бурханай арадай ерээдүй жаргалта байдал

23Израилиин Бурхан, Түмэн Сэрэгтэ Эзэн иигэжэ айладхажа байна:

– Минии тэдэниие нютагтань бусаан, һайн һайханаар һэргээхэ үедэ тэдэ Иудын хан түрын газар дайдада болон хотонуудтань дахин эдэ үгэнүүдые хэлэжэ эхилхэ: «Үнэн зүбэй гэр, Иерусалимай нангин хада, Эзэн шамайе юрөөхэнь болтогой!» 24Улад зон – таряашад болон хонин һүрэгтэеэ нүүн ябаашад бултадаа Иудын хан түрэдэ, бүхы хотонуудаарнь амидардаг байха. 25Юуб гэбэл, Би ядаржа эсэһэн зониие хангажа, голхорһон зониие зоригжуулнаб. 26Тиихэдэм зон «унтаад бодоходоо ехэ амараад бодооб, нойр зүүдэмни намда ехэ аятай байгаа» гэлдэхэ.

27– Израилиие болон Иудын хан түрые хүнэй үри бэеэр болон амитадай түлөөр дүүргэхэ сагни дүтэлөө, – гэжэ Би, Эзэн тунхагланаб. 28– Зулгаажа, эбдэжэ, хүмэрюулжэ, һүйд хэжэ, мүн гай гасалан асаржа Би амар заяа үзүүлдэггүй һэм, мүнөө тарин ургуулжа, байгуулжа амар заяагүй байлгахаб.

29Тэдэ үдэрнүүдтэ «Эсэгэнэрынь гашуун уһан үзэм эдеэ һэн, тиигээд үхибүүдэйнь шүдэн мохоо болоо» гэжэ хэлэхэеэ болихо.

30Харин хүн бүхэн өөрын гэм зэмэй түлөө үхэхэ, гашуун уһан үзэм эдидэг хүнэй өөрынь шүдэн мохоо болохо.

31Эзэн иигэжэ тунхаглажа байна:

– Үзэгты, Израилиин болон Иудын үри һадаһадтай Минии шэнэ хэлсээ баталха үдэрнүүд дүтэлжэ байна. 32Энэ хэлсээн тэдэнэрэй үбгэ эсэгэнэрые гарһаань хүтэлэн Египедһээ гаргаха гэһэн үдэр тэдэнтэй баталһан хэлсээндэл адли бэшэ байха. Минии тэдээндэ нүхэр байһан байгаашье һаам, тэдэ хэлсээ эбдээ һэн. 33Тэдэ үдэрнүүдэй һүүлдэ Израилиин арадтай баталха хэлсээн иимэ: Өөрын хуулиие тэдэнэй һанал бодолдо хадуулгахаб, зүрхэ сэдьхэлдэнь бэшэхэб. Би тэдэнэй Бурхан, тэдэ Минии арад түмэн болохо. 34Тэдэнэй хэнииньшье Эзэниие мэдэ гэжэ нүхэдөө гү, али аха дүүнэрээ һургахагүй, юундэб гэхэдэ, тэдэ багаһаа томо хүрэтэрөө бултадаа Намайе мэдэжэ байха. Би тэдэнэй гэм зэмые хүлисэжэ, нүгэл тухайнь дахин дурдахагүйб. Энэ хадаа Би, Эзэн, айладхана мүн!

35Үдэрэй гэрэлтэ нарые,
һүниин һара болон одо мүшэдые
Эзэн үршөөгөө,
долгидойнь шааятар далайе доһолгоогоо.
Тэрэнэй нэрэ болбол Түмэн Сэрэгтэ Эзэн мүн.
36«Хэрбээ энэ тогтоогдоһон зарлигай болюулагдабал,
Израилиин уг удам Минии урда
үндэһэ яһатан байхаяа болихо»
гэжэ Эзэн тунхаглажа байна.
37Хэрбээ дээдэ тэнгэриин хэмжэгдэдэг юм һаань,
доодо газарай һууринуудай шэнжэлэгдэдэг һаань,
Израилиин арад зоншье хэһэн бүхы юумэнэйнгээ түлөө Эзэндэ тоогдохоёо болихо бэлэйл.
Энэ хадаа Эзэн айладхаа мүн!

38«Үзөөрэйгты, Намда зорюулжа, Хананээлэй самхагһаа Булангай Бартаанууд хүрэтэр хотын дахин баригдаха саг дүтэлжэ байна. 39Шугамынь саашалан, Гарээб толгой хүрэтэр зурыха. Удаань тэрэ тойрон, Гоһаа руу эрьехэ. 40Үхэһэн зоной хүүрэй ба бог шоройн хаягдаһан хүнды болон Кидрооной хүнды хүрэтэрхи бүхы талмай, зүүн зүг руу Морин Хаалгын булан хүрэтэр Минии нангин арюун газар болохо. Дахин хэзээдэшье энэ хото һандаргагдахагүй, һалахагүй» гэжэ Эзэн тунхаглана.