Jer 34 | BxrBBL2024 | STEP | Вавилооной хаан Навуходоносорой мэдэлдэ ороһон бүхы хан түрэнүүдэй, үндэһэ яһатадай хүсэ хэрэглэн, Навуходоносорой Иерусалим болон тэрээндэ дүтэ хотонуудта добтолхо үедэ Эзэн намтай хөөрэлдөө бэлэй.

‏ Jeremiah 34

Цэдэкиияда мэдээсэл

1 Вавилооной хаан Навуходоносорой мэдэлдэ ороһон бүхы хан түрэнүүдэй, үндэһэ яһатадай хүсэ хэрэглэн, Навуходоносорой Иерусалим болон тэрээндэ дүтэ хотонуудта добтолхо үедэ Эзэн намтай хөөрэлдөө бэлэй. 2 Иудын хаан Цэдэкиия гэгшэдэ минии ошожо, иигэжэ хэлхые Эзэн захираа:

– Энэ хотые Вавилооной хаанай мэдэлдэ үгэхэм, тиигээд тэрэ дууһан шатаагдаха. 3 Таанад тэрьедэжэ шадахагүйт, баригдахат, тиигээд тэрээндэ дамжуулагдахат. Улаан нюураараа тэрээнтэй уулзажа, хэлэхыень шагнахат. Тиигээд таанад Вавилоон руу туугдан ошохот. 4 Иудын хаан Цэдэкиия, шам тухай Минии айладхал шагна. Ши дайн дажарта алагдахагүйш. 5 Ши ондоо юумэнһээ наһа барахаш. Шинии урда тээ хаашуул байһан элинсэг хулинсагыешни хүдөөлүүлхэдөө шатаан, ая ууюулдагтал, тэдэ шамайе хүдөөлүүлэн шатааха, ая ууюулха, «Оо, Эзэн!» гэлдэн гашуудан уйлалдаха. Энэ болбол Би, Эзэн, айладхана мүн!

6 Тиигээд би эдэ бүхы үгэнүүдые Иудын хаан Цэдэкиия гэгшэдэ Иерусалимда дамжуулан хэлээ һэм. 7 Энэ үедэ Вавилооной сэрэг хото руу добтолон орожо байгаа. Иудын хан түрэдэ бүхэлэгдэһэн хотонууд гэжэ гансал Лахииш болон Азэкаа үлэһэн байгаа. Дайсанай сэрэг мүн лэ тэдээн руу добтолон орожо байгаа һэн.

Нёлбоһон нёлбоһоо һөөргэнь залгиба

8 Цэдэкиия хаан болон Иерусалимай улад зон эрхэ сүлөө олгуулха тухай хэлсээ баталба. 9 Өөрын еврей яһанай богоолнуудаа – эрэ, эмэгтэйшье богоолые – сүлөөдэ табиха тухай, иудей хүниие богоол болгон барихагүй тухай тэдэ хэлсээ баталба. 10 Бүхы арад зон болон удамаршадынь тэрэ хэлсээ дэмжэн, богоолнуудаа сүлөөдэ табихаяа зүбшөөбэ. Тиигээд тэдэниие сүлөө болгон табижа эхилээ һэн. 11 Харин һүүлдэнь тиихээ болижо, һөөргэнь бусаажа, богоол болгоо бэлэй.

12 Тиихэдэнь Эзэн, 13 Израилиин Бурхан, иигэжэ улад зондо минии айладхахые захираа:

– Египедһээ, богоол байдалһаань сүлөөлэн гаргажа байхадаа, Би танай үбгэ эсэгэнэртэй хэлсээ баталжа, 14 зургаан жэл соо алба хэһэн аха дүүгээ, еврей яһанай богоолоо долоодохи жэл бүхэндэ сүлөөдэ табиха тухай тэдээндэ захираа һэм. Теэд тэдэ Минии үгэнүүдые анхарбагүй шагнабагүй. 15 Харин мүнөөл таанад гэмшэжэ, Минии урда үнэн шударга байбат: дүтынгөө зониие сүлөөдэ табибат. Минии нэрээр дуудагдадаг Һүмэ соо Минии урда хэлсээгээ баталбат. 16 Теэд дахин таанад ондоо болон, Намайе доромжолбот. Һанаһан тээшэнь табиһан богоолнуудаа таанад дахин һөөргэнь бусаабат, дахин богоолнууд болгобот. 17 Мүнөө энэ Би, Эзэн, айладхал буулганаб. Таанад Минии үгэ дуулабагүйт, иудей зониие сүлөөдэ табибагүйт. Тиигээ хадатнай, дайн дажарта, үбшэ хабшанһаа болон үлэсхэлэн хооһон байдалһаа үхэхэ эрхэ сүлөө та бүгэдэндэ шэлэн абахыетнай дурадханаб. Айлган-һүрдөөн, дэлхэйн бүхы үндэһэ яһатанда Би таанадые үгэхэб. 18 – 19 Иудын хан түрын болон Иерусалимай тушаалтад түшэмэлнүүдтэй, санаартадтай, удамаршадтай хамта бурууе хоёр хуби болгон, сабшаад, хоёр хубиин хоорондуур гаран, Намтай хэлсээ баталаа бэлэй. Теэд эдэнэр энэ хэлсээ эбдэбэ. Тиимэһээ Би тэдээндэ тэрэ буруунда хандаһандань адляар хандахаб. 20 Алахаяа һанаһан дайсадайнь һабарта тэдэниие дамжуулхаб. Һэенүүдынь шубуу шонхорой, зэрлиг амитадай хүнэһэн болохо. 21 Иудын хаан Цэдэкиия гэгшые, тушаалтадыень дайсадайнь һабарта үгэхэб. Урдаһаатнай добтолгоёо саг зуура тогтооһон Вавилооной сэрэгтэ тэдэниие дамжуулхаб. 22 Минии захирхада, дайсадай сэрэг һөөргөө энэ хото руу бусаха. Тэдэ добтолон орожо, хотые эзэмдээд, дууһан шатааха. Иудын хан түрын хотонуудые зэлүүд хооһон, нэгэшье амитанай ажаһуудаггүй хото болгохоб. Энэ болбол Би, Эзэн, тунхаглана мүн!