‏ Jeremiah 36

Баруух хуйламал ном зондо уншаба

1Ёшияагай хүбүүн Ёякиимэй Иудын хан түрые дүрбэдэхи жэлээ зонхилжо байха үедэ Эзэн намда иигэжэ айладхаба:

2– Хуйламал ном абажа, Израиль болон Иудын хан түрэ тухай, бүхы үндэһэ яһатан тухай Минии айладхалай үгэнүүдые тэндэ бэшэ. Ёшияагай хаан байхаһаа нааша мүнөө болотор Минии айладхаашые бэшэ. 3Иудын хан түрын улад зон Минии тэдээндэ татахаяа байһан гай тодхор тухай дуулажа, муу муухай харгы замһаа эрьехэ аалам. Тиигээ һаань, Би тэдэнэй нүгэл шэбэлые арюудхан хүлисэхэб.

4Тиигээд би Нэрияагай хүбүүн Баруух гэгшые дуудажа, Эзэнэй айладхал хэлэхэдэм, Баруух эдэ үгэнүүдые хуйламал номдо бэшэбэ. 5Баруухта би иигэжэ захирбаб:

– Эзэнэй Һүмэ руу намайе табинагүй. 6Тиимэһээ ши зоной масаг бариха үедэ тиишээ ошожо, бүхы зоной, ондоо хотонуудһаа ерэһэн иудей уладай дуулахаар, шангаар хуйламал ном соохи Эзэнэй үгэнүүдые уншан тунхагла. 7Эдэ зон Эзэндэ зальбаржа, муу замһаа эрьежэ магад. Эзэн эдээндэ угаа ехээр уурлан хилгэнтэхэ тухайгаа айладхаа һэм шуу.

8Иигэжэ Нэрияагай хүбүүн Баруух минии хэлэһэнэй ёһоор, Һүмэ соо Эзэнэй үгэнүүдые соносхоо бэлэй.

9Ёшияагай хүбүүн Ёякиимэй Иудын хан түрые табадахи жэлээ, юһэдэхи һараа зонхилжо байха үедэ зон масаг баряа һэн. Энэ масагые Иерусалимай болон ондоо хотонуудһаа ерэһэн бүхы зон сахин-дүүргэн байгаа. 10Бүхы зоной шагнажа байтар Баруух минии хэлэһэн үгэнүүдые хуйламал ном сооһоо уншаба. Тэрэ Шапаанай хүбүүн, бэшээшэн Гэмаариягай ажалай таһалга сооһоо тунхаглаа бэлэй. Һүмын Шэнэ хаалгануудай хажууда, дээдэ хубида тэрэ таһалга оршодог байгаа.

11Шапаанай аша, Гэмаариягай хүбүүн Михайяа Эзэнэй үгэнүүдые Баруухай хуйламал ном сооһоо уншажа байхые шагнаба. 12Тиигээд тэрэ хаанай ордон руу, хаанай бэшээшын таһалга руу ошобо. Тэндэ бүхы түшэмэлнүүд – хаанай бэшээшэ Элишамаа, Шэмаяагай хүбүүн Дэлайяа, Ахбоорой хүбүүн Элнатаан, Шапаанай хүбүүн Гэмаария, Ханаанияагай хүбүүн Цэдэкиия болон бусад тушаалтан байгаа. 13Зондо Баруухай уншаашые Михайяа тэдээндэ хөөрэжэ үгэбэ. 14Тиихэдэнь түшэмэлнүүд Күшиигэй гуша, Шэлээмияагай аша, Нэтаанияагай хүбүүн Иеһудиие Баруух руу ябуулжа, уншажа байгааша хуйламал номоо асархыень захирба. Нэрияагай хүбүүн Баруух тэрэ ном асарба. 15«Һуугаад, бидэндэ тэрэнээ унша» – гээд тэдэ Баруухта хэлэбэ. Тэрээнииень Баруух дүүргэбэ. 16Уншаһанайнь удаа тэдэ бэе бэеэ мэгдэнгеэр харалсаад, «Бидэ энээн тушаа хаанда дуулгаха ёһотойбди» – гэжэ Баруухта хэлээ һэн. 17Тиигээд тэдэ Баруухһаа «Яагаад энээниие бэшээбши? Ерэмияа шамда хэлээ гү?» – гээд асууба ха. 18«Ерэмияагай эдэ үгэнүүдые намда хэлэхэдэнь, би энэ ном руу бэхээр бэшээ һэм» – гээд Баруух харюусаа һэн. 19Тиихэдэнь тэдэ «Ши Ерэмияатай хамта хоргодохо ёһотойш. Хэншье хаана байһыетнай мэдэхэ ёһогүй» – гээд хэлэбэ.

Хаан номые шатааба

20Түшэмэлнүүд хаанай бэшээшэ Элишамаагай таһалга соо тэрэ хуйламал ном хадагалаад, хаанда ордон руунь ошожо дуулгаба. 21Хуйламал ном асархыень хаан Иеһудии гэгшые эльгээбэ. Иеһудии тэрэ ном Элишамаагай таһалга сооһоо абажа, асараад, хаанда болон хажуудань тойроод байһан бүхы түшэмэлнүүдтэнь уншажа үгэбэ. 22Энэ үйлэ хэрэг үбэл болоо һэн. Хаан үбэлэйнгөө ордон соо галай хажууда һуужа байгаа. 23Иеһудиигэй гурба-дүрбэн бадаг уншаад байхада, хаан тэрэнииень багахан хутагаар отолоод, гал руу хаяжа байба. Иигэжэ бүхы хуйламал ном шатаагдан, үгы хэгдээ бэлэй. 24Эдэ бүгэдые дуулаһан хаан, мүн түшэмэлнүүдэйнь хэншье айбагүй, гашуудабагүй. 25Элнатаан, Дэлайяа болон Гэмаария хуйламал номые шатаахагүй тухай хааниие гуйба, теэд тэрэ гуйлтыень анхарбагүй. 26Тайжа хүбүүн Ерахмээлдэ, Азриһээлэй хүбүүн Сэраяада болон Абдэһээлэй хүбүүн Шэлээмияада хаан хандажа, намайе болон минии бэшээшэ Баруух гэгшые тушаан барихые захирба. Теэд Эзэн маанадые хоргодуулаа бэлэйл.

Ерэмияа үшөө нэгэ ном бэшэбэ

27Баруухта минии хэлэһэн үгэнүүдтэй хуйламал номые Ёякиим хаанай шатааһанай удаа Эзэн намда 28ондоо хуйламал ном абажа, Иудын Ёякиим хаанай шатааһан түрүүшын ном соо байһан бүхы үгэнүүдые бэшэхыемни захирба. 29Тэрэ Иудын Ёякиим хаанда иигэжэ хэлэхыемни захираа: «Та хуйламал ном шатаагаат. Вавилооной хаанай ерэжэ, энэ орон нютагые һандаргааха, улад зониие, ан амитадые хюдаха тухай юундэ бэшэһыень Ерэмияаһаа асуугаат. 30Би, Эзэн, шамда, Иудын Ёякиим хаанда, иигэжэ айладхал буулганаб: Давидай хаан шэрээ эзэлхэ хүбүүгүй байхаш. Үхэһэн бэетнай газаа хаяатай, үдэрэй халуунда, һүниин хүйтэндэ хэбтэхэ. 31Таанадые, уг удамыетнай, түшэмэлнүүдыетнай нүгэл шэбэлһээтнай боложо хэһээхэб. Ши өөрөө, Иерусалимай болон Иудын хан түрын улад зон минии һэргылэлтэнүүдые анхараагүй. Тиимэһээ Би гай тодхор таанадта татахам».

32Тиигээд Ерэмияа ондоо хуйламал ном абажа, бэшээшэ Нэрияагай хүбүүн Баруухта үгэбэ. Тэрэ Ерэмияагай хэлэһые тэндэ бултыень бэшэбэ. Иудын Ёякиим хаанай галда хаяжа шатааһаан түрүүшын хуйламал ном соо байгааша бүхы үгэнүүдые болон Ерэмияагай хэлэһэн үшөөшье ондоо үгэнүүдые тэрээн соо бэшээ бэлэй.