Jer 37 | BxrBBL2024 | STEP | Ёякиимэй хүбүүн Ехонияагай орондо Вавилооной хаан Навуходоносор Ёшияагай хүбүүн Цэдэкиия гэгшые Иудын хаан болгобо.

‏ Jeremiah 37

Цэдэкиия Ерэмияае гуйна

1 Ёякиимэй хүбүүн Ехонияагай орондо Вавилооной хаан Навуходоносор Ёшияагай хүбүүн Цэдэкиия гэгшые Иудын хаан болгобо. 2 Цэдэкиия, түшэмэлнүүдынь, арад зоншье Эзэнэй намаар дамжуулһан үгэнүүдые анхараагүй һэн.

3 Цэдэкиия хаан Шэлээмияагай хүбүүн Еһүкаалые болон Маашэяагай хүбүүн санаартан Цэпаанияа гэгшэдые нам руу эльгээжэ, «Эзэн Бурхандаа арад зон тухайгаа зальбархыем гуйгаа» бэлэй. 4 Тиихэдэ би түрмэдэ үшөө һуулгагдаагүй, зоной дундуур сүлөөтэйгөөр ябадаг байгааб. 5 Вавилооной сэрэг Иерусалимые бүһэлөөд байһан аад, Египедһээ фараоной сэрэгэй ерэжэ ябаһан тухай дуулахадаа, һөөргөө хотирбо.

6 Тиихэдэ Израилиин Эзэн Бурхан:

7 – Иудын хаан Цэдэкиияда: Фараоной сэрэг таанадта туһалхаяа ерэжэ ябаһан аад, һөөргөө Египет руугаа бусаха. 8 Вавилооной сэрэг дахин ерэжэ хото руу добтолжо, эзэмдэхэ, дууһан шатааха. 9 Би, Эзэн, таанадые һэргылнэб: «Вавилооной сэрэг һөөргэлхэгүй гэжэ өөһэдыгөө мэхэлжэ бү байгты, тэдэ заабол бусаха. 10 Вавилооной бүхы сэрэг һамна бута сохёошье һаатнай, шархатаһан сэрэгшэдынь майхангууд сооһоо хэбтэжэ байһанаа гаража, энэ хотые дууһан шатаахал» – гэжэ хэлэхыемни захирба.

Ерэмияа түрмэ шорондо оробо

11 Фараоной сэрэгэй дүтэлжэ байхада, Вавилооной сэрэг Иерусалимһаа һалан ошожо байгаа. 12 Би Иерусалимые орхижо, Бэньямиинэй газар нютагта хубиин зөөриеэ эдлэхэеэ ошоо һэм. 13 Бэньямиинэй Хаалгануудта хүрэхэдэм, Ханаанияагай аша, Шэлээмияагай хүбүүн Ирияа гэгшэ харуулай ахамад тэндэ байһанаа, намайе тогтоожо, «Вавилооной зондо ошожо байнаш!» гэжэ бариба.

14 Би хэлэбэб: «Тиимэ бэшэ. Би тиишээ ошоно бэшэб». Теэд Ирияа намайе дуулабагүй, баряад, тушаалта нюурнуудта асараа һэн. 15 Тэдэ намда уурлажа, намайе сохёод, бэшээшэ Ёнатаанай шорон болоһон гэртэ хааба. 16 Би тэндэ газарта малтаһан нүхэн соо удаан сагта байгааб.

17 Цэдэкиия хаан минии хойноһоо эльгээжэ, ордон руугаа асаруулаад, «Эзэнһээ мэдээсэл бии гү?» – гэжэ асууба. «Бии, – гэжэ хэлээд, – Вавилооной хаанай һабарта орохот», – гэжэ нэмэбэб.

18 Тиигээд Цэдэкиия хаанһаа би асуугаа һэм:

– Ямар гэм зэмэ би танай болон түшэмэлнүүдэйтнай урдаһаа хэһэндээ түрмэ шорондо баригдана гээшэбиб? 19 Вавилооной хаан танда болон орон нютагтамнай добтолхогүй гэжэ хэлэдэг лүндэншэдтнай хаана гээшэб? 20 Үндэр түрэлтэ хаан, мүнөө намайе шагныт. Намайе һөөргэнь Ёнатаанай шорон болоһон гэртэ бү эльгээгыт. Эльгээгээ һаатнай, би тэндэ хосорхолби.

21 Тиигэжэ Цэдэкиия хаан намайе ордоной досоо хашаа соо хаахые захирба. Би тэндэ байжа, үдэр бүри намда нэгэ зүһэм хилээмэ үгэдэг байгаа. Хото соо бүхы эдеэ хоолой дууһатар намда зүһэм хилээмэ үгэжэ байгаа.