‏ Jeremiah 38

Ерэмияа нүхэн руу хаягдаба

1Маттаанай хүбүүн Шэпаатияа, Пашхуурай хүбүүн Гэдаалияа, Шэлээмияагай хүбүүн Юкаал болон Малхияагай хүбүүн Пашхуур арад түмэндэ минии хэлэжэ байгаашые шагнаа һэн. Би Эзэнэй айладхал дамжуулан, иигэжэ хэлээб: 2«Хэн хото соо үлэнэб, тэрэ байлдаанда, үлэсхэлэн хооһон байдалһаа, мүн үбшэ хабшанһаа боложо үхэхэ. Харин Вавилооной сэрэгтэ бэеэ тушааһан хүн амиды мэндэ үлэхэ». 3Эзэнэй иигэжэ айладхаашые тэдээндэ би мүн лэ дамжуулбаб: «Энэ хотые Вавилооной сэрэгтэ тушаахамни. Тэдэ хотые эзэмдэхэ».

4Тиихэдэм түшэмэлнүүд хаанда ошожо, «Энэ хүн саазалуулагдаха ёһотой. Элдэб юумэ хэлэжэ, тэрэ сэрэгшэдэй зориг мохооно, һүр һүлдыень дарана. Хотын бүхы зондошье тэрэ иимэ юумэ хэлэнэл. Арад зондо туһа бэшэ, тушаа хэнэ гээшэ», – гэжэ дуулгаба.

5Цэдэкиия хаан тэдээндэ: «Энэ урдатнай тэрэ байнал даа. Һанаһаараа тэрээнтэй юумэ хэгты, би таанадай урдаһаа юушье хэлэхэгүйб», – гэбэ.

6Тэдэ намайе абажа, тайжа хүбүүн Маалхияагай газар дорохи нүхэн руу хаяба. Тэндэ ямаршье уһан үгы, гансал шабар һэн. Би тэрэ шабар руу хаюулагдаа һэм.

7Харин тайган болохо эфиоп хүн Эбэдмээлэх (тэрэ хаанай ордон соо хүдэлдэг бэлэй) намайе нүхэн руу хаяһан тухай дуулаад, Бэньямиинэй Хаалгануудай дэргэдэ элдэб хэрэгүүдые шүүбэрилжэ байгааша хаанда дүтэлэн, 8хаанда иигэжэ хэлэбэ:

9– Үндэр түрэлтэ хаан! Эдэ зон буруу юумэ хээ. Тэдэ Ерэмияа лүндэншые нүхэ руу хаяа, тэрэ тэндэ туража үхэхэл, юуб гэбэл, хото соо эдеэ хоол дууһаа.

10Тиихэдэнь хаан күшиит Эбэдмээлэхэй гурбан хүниие абажа ошоод, нүхэн сооһоо намайе гаргахые захирба. 11Эбэдмээлэх зонтой хамта ордоной абдар таһаг руу ошожо, хуушан хубсаһа тэндэһээ абаад, аргамжа тэдээнээр хэжэ, нам руу доошонь һанжуулба. 12Бэеыемни үрэхэгүйн тула һанги набта болоһон хубсаһа һуга доогуураа хэхыемни Эбэдмээлэх хэлээ. Би тиибэб. 13Иигэжэ тэдэ олһоор намайе татан гаргажа, би досоо хашаа соо харууһан доро байдаг болоо һэм.

Цэдэкиия Ерэмияатай зүбшэнэ

14Нэгэтэ Цэдэкиия хаан минии хойноһоо хүниие эльгээжэ, нангин үргөөгэй гурбадахи үүдэнэй хажууда асаруулба. Тиигээд хаан иигэжэ хэлэбэ:

– Би шамда асуудал табихаб. Үнэн зүбөөр харюуса.

15Би Цэдэкиияда хэлээ һэм:

– Минии үнэн зүбые хэлэхэдэ, та намайе саазалхат. Зүбшэл заабари хэлээ һам, та намайе хайхархагүйт.

16Тиихэдэм Цэдэкиия хаан нюусаар намда тангариглажа, «Бидэндэ ами наһа бэлэглэһэн Бурханаар тангаригланаб, би шамайе саазалхагүйб, алахаяа һанаашадташье үгэхэгүйб», – гэбэ.

17Тиихэдэнь би Түмэн Сэрэгтэ Израилиин Бурханай иимэ айладхал Цэдэкиияда дуулгабаб:

– Вавилооной сэрэгтэ бэеэ тушаагаа һаа, амиды мэндэ үлэхэт. Энэ хотошье галдагдахагүй. Таанад өөһэдөө, гэр бүлэнүүдтнайшье амиды үлэхэт. 18Харин бэеэ тушаагаагүй һаатнай, энэ хото Вавилооной сэрэгтэ үгтэхэ, тэдэ хотые дууһан галдаха, таанадшье тэндэһээ тэрьедэжэ шадахагүйт.

19Цэдэкиия хаан намда иигэжэ хэлэбэ:

– Вавилооной тала барин ошоһон манай зонһоо айдаһам хүрэнэ. Би тэдэнэй гарта ороо һаа, үхэтэрөө зобоолгохолби.

20Би тэрээндэ:

– Та тэдэнэй гарта орохогүйт. Эзэнэй айладхал дуулахыетнай гуйнаб. Тиихэдэ бүхы юумэн танда таатай, аятай болохо, амиды мэндэ үлэхэт. 21Харин бэеэ тушаахаяа арсаа һаатнай, юун болохо байһые Эзэн намда харуулаа. 22Тэрэ үзэгдэл соогоо би Иудын хаанай ордон соо орхигдоһон эхэнэрнүүдые хараа һэм. Тэдэ эхэнэрнүүд Вавилооной сэрэгэй ахамадуудта абаашагдаха. Тэдэ эхэнэрнүүд хаанай нүхэд өөрыень мэхэлбэ, тэдэ хааниие буруушаана. Хүлэйнь шабар шабхада ороходо, нүхэдынь 23бүхы эхэнэрнүүдтнай болон үхи хүүгэдтнай Вавилооной зоной мэдэлдэ орохо, та өөрөө Вавилооной хаанай баряанда орохот. Энэ хото дууһан галдагдаха.

24Цэдэкиия иигэжэ намда хэлээ һэн:

– Хэндэшье энэ хөөрэлдөөн тухай бү хэлээрэй. Тиигэбэл, амиды мэндэ байхаш. 25Тушаалтадай минии шамтай хөөрэлдэһэн тухай дуулаад, шамда ерэжэ, юун тухай хөөрэлдэһэн тушаамнай асуугаа һаань, «алахагүйбди шамайе» гэжэ хэлээ хадань, 26намайе һөөргэнь Ёнатаанай шорон болоһон гэртэ бү эльгээгыт гэжэ гуйһан тухаймни дуулгаарай.

27Тушаалта зоной намда ерэжэ, намайе һурагшалхадань, би тэдээндэ хаанай хэлэхыемни зааһан үгэнүүдые хэлэбэб. Тэдэ нюусаар хөөрэлдөөемнай шагнажа шадаагүй һэн тула юушье хэлэнгүй, абяагүй гаража ошоо һэн.

28Иигэжэ Иерусалимай эзэлэгдэн абтатар би хаанай ордоной досоо хашаанууд соо баригдан байгаа бэлэйб.