‏ Jeremiah 4

Ондоо болохо тухай

1Эзэн тунхаглажа байна:

– Израиль, хэрбээ ши бусаха гэбэл, Нам руу бусажа ерэ. Хэрбээ ши шүтөөнүүдые Намһаа зайлуулжа, татагасангүй байгаа һаа, 2үнэнхэ зүрхэнһөө, зүбөөр, шударгыгаар Минии нэрээр тангариглаха эрхэдэ хүртэхэш. Тиихэдэ бүхы үндэһэн арадууд Минии нэрээр бэе бэеэ үреэдэг болохо, Намайе магтажа байха.

3Иудын хан түрын болон Иерусалимай арад зондо Эзэн иигэжэ айладхана:

– Шэнээр газар хахалагты, хадхууртай үрмэдүүлэй дунда бү таригты. 4Минии арад түмэн бологты, зүрхэ сэдьхэлээ хубилгагты. Иудын ба Иерусалимай улад зон, тиигээгүй һаатнай, таанарай үйлэдэһэн муу муухай хэрэгүүдһээ боложо, Минии уур хилэн гал дүлэн мэтэ бушаганаха. Хэншье тэрэниие унтаргаажа шадахагүй.

Иудын хан түрэдэ аюул

5Иудын улад зондо соносхогты,
Иерусалимда дуулгагты,
бүхы нютагуудаар бүреэ үлеэн,
шангаар хашхаран, иигэжэ хэлэгты:
«Сугларагты!
Бүхэлэгдэһэн хотонууд руу
гүйжэ хороёл!»
6Тогтонгүй гүйжэ, амияа абархыень
туг үргэн, Сиондо дохёо тэмдэг үгэгты.
Ушарынь гэбэл,
Эзэн хойто зүгһөө гай гасалан
ба агууехэ сүйд асаржа байна.
7Нюуса газарһаа гаража байһан арсаландал,
үндэһэн арадуудые усадхагша
хүдэлэн гаража эхилээ.
Иудын хан түрые үгы хэхэеэ
тэрэ өөрын газарһаа гараба.
Хотонуудтнай һандаргаагдаха,
тэндэ хэншье ажаһуухагүй.
8Тиимэһээ гашуудалай хубсаһа үмдэжэ,
гашуудан шангаар уйлагты.
Юуб гэбэл, Эзэнэй шэрүүн уур хилэн
таанадһаа эрьен-зайлан байхагүй.

9«Тэрэ үдэр хаан болон ноёд айн һүрдэхэ, санаартад ухаа алдаха, лүндэншэд гайхан гэлыхэ», – гэжэ Эзэн тунхаглаба.

10Тиихэдэнь би: «Оо, Хүсэн Түгэлдэр Эзэн! Та Иерусалимай арад зониие үнэхөөр лэ мэхэлээт! Амар амгалан байхат гэжэ тэдээндэ хэлээ һэнта, теэд хоолойдонь мүнөө эритэ табяатайл», – гэжэ хэлэбэб.

11Элһэн сүл губиин нюсэгэн добо толгойһоо бүгшэм халуун һалхин һалхилжа эхилээ гэжэ Иерусалимай улад зондо хэлэхэ саг тиихэдэ ерэхэ. Энэ хадаа орооһо хальһанһаань сэбэрлэн һэбшээлдэг һулахан һалхин бэшэ, 12энэ хадаа тэрээнһээ бүри хүсэтэй һалхин Эзэнһээ гаран һалхилжа байха. Тиигээд Эзэн Иудын арад зониие шүүбэрилхэ.

Иудын хан түрые дайсад бүһэлбэ

13Харагты, дайсан хара үүлэн мэтэ
дээшээ гаража байна.
Тэрэнэй дайшалхы тэргэнүүд
хуй һалхин мэтэ,
тэрэнэй морид бүргэдһөө үлүү хурдан юм.
Бидэ сүйд гасаланда орообди!
Бидэ һалаабди!
14Иерусалим, абарагдахын тула муу муухайе
зүрхэ сэдьхэлһээ зайсуулагты.
Хэды болотор хорон муу бодолоо бодохо юмта?

15Даанай хотонуудһаа болон Эпрааимай уулархаг нютагуудһаа элшэнэр муу мэдээнүүдые асаржа ерэбэл. 16Алас холын оронуудһаа дайсад ерэжэ ябана, шангаар хашхаралдан, Иудын хотонуудые бүһэлхэеэ байна гэжэ арад зониие һэргылхын, Иерусалимда дуулгахын тула тэдэ хүрэжэ ерээл. 17Талын харуул мэтэ тэдэ Иерусалимые тойрон бүһэлжэ байна, юундэб гэхэдэ, Иерусалимай арад зон Эзэнэй урдаһаа тэршэлэн бодоо. Иигэжэ Эзэн айладханал.

18Иудын улад зон, буруу ябадалайтнай болон буруу үйлэ хэрэгүүдэйтнай түлөө эдэ бүхы юумэн таанадтай тохёолдобо. Нүгэлтнай таанадта зоболон ушаруулба. Энэнь зүрхэ сэдьхэлыетнай хүндэн дайраба.

Арад зон тухайгаа сэдьхэлээ үбдэлгэ

19Сэдьхэлни, сэдьхэлни! Би зобожо байнаб.
Зүрхэмни! Зүрхэмни аргагүй сохилно.
Би миин байжа шаданагүйб!
Дайнда дуудаһан бүреэгэй абяа дууланаб.
20Гай тодхор дээрэ үшөө гай тохёолдоно,
бүхы орон нютаг һандаргагдан хооһороо.
Гэнтэ манай майхангууд эбдэгдээ,
агшам зуур соо хүшэгэнүүднай ударагдаа.
21Эзэн Бурхамни,
хэды болотор дайнай тугуудые хараха,
бүреэгэй дууе шагнаха ёһотой гээшэбиб?
22Эзэн иигэжэ хэлэнэ:
«Арад зомни мунхаг.
Тэдэ Намайе мэдэдэггүй.
Тэдэ тэнэг үхибүүдтэл адли,
юумэ ойлгодоггүй.
Муу юумэ үйлэдэхэдөө һүрхэй,
харин һайн юумэ хэхэеэ шададаггүй».

Гай тодхорые уридшалан харалга

23Газар дэлхэйе харахадам,
хэбэр дүрсэгүй, эзэгүй хооһон байба.
Огторгой руу харахадам,
ямаршье гэрэлгүй байба.
24Хада уула руу харахадам,
доһолжо-шэшэржэ байба.
Мүн бүхы добо толгойнууд
урагша-хойшоо хүдэлжэ байба.
25Обёорходом, тэндэ нэгэшье хүн үгы,
тэнгэриин бүхы жэгүүртэн ниидэжэ ошолой.
26Обёорходом, үрэжэлтэ-жэмэстэ газар
элһэн сүл губи болошоод байгаа.
Бүхы хотонуудынь һандаргагданхай.
Эзэнэй уур хилэн
энээнэй шалтагаан болоно.
27Эзэн иигэжэ тунхаглана:
Бүхэли газар нютаг һандаргагдан хооһорхо,
гэбэшье Би бүримүһэн усадхахагүйб.
28Хосорһон зонойнгоо хойноһоо
улад гашуудан уйлаха,
огторгой гүн харанхы болохо.
Би айладхааб, Би шиидээб,
хожом тэрээн тушаа гэмшэхэгүйб,
һөөргөө эрьежэ байхагүйб!
29Мориндо мордоһон зоной
ба харбаашадай дуу шууяанһаа
хотын зон бултадаа тэрьедэхэ.
Зариман ой шугы руу гүйхэ,
нүгөөдүүл хада руу абирха.
Хото бүхэн орхигдожо,
тэндэ нэгэшье хүн үлэхэгүй.
30Һандаргагдаһан Иуда, ши яахабши?
Юундэ шад улаанаар хубсалнабши?
Юундэ алта шэмэглэлээр бэеэ гоёожо,
нюдөө будажа байнабши?
Ши дэмыл өөрыгөө гоёонош:
амарагуудшни шамайе хаяжа,
алахаяа бэлдэжэ байна.
31Би түрэхэ гэжэ үбдэжэ байһан
эхэнэрэй оог хашхараанда адли дууе,
түрүүшын үхибүүгээ түрэжэ байһан
эхэнэрэй ёолоходол абяае,
гараа һунгаад: «Аа, би гасаланда орооб!
Намайе алахаяа тэдэ ерэнэ!» – гэжэ
амияа абажа ядажа байһан
Сионой үхинэй абяае соносооб.