‏ Jeremiah 42

«Манай түлөө зальбарыт!»

1Тиихэдэ бүхы сэрэгэй ноёд Карээһаагай хүбүүн Ёханаантай, Һошаяагай хүбүүн Езааниятай хамта, бүхы улад зонтоёо 2намда ерэжэ, иигэжэ хэлэбэ:

– Манай гуйһан гуйлтые дүүргыт! Манай түлөө, энэ үлөөшэ зоной түлөө Эзэн Бурхандамнай зальбарыт. Олон байһанаа үсөөн болообди, та өөрөө харана ха юмта даа. 3Эзэн Бурхамнай манай дабшаха харгы зам харуулаг лэ, юу хэхыемнай заажа үгэг лэ.

4Би харюусааб:

– Би ойлгооб. Танай гуйһанай ёһоор, би Эзэн Бурхандаа зальбархаб. Айладхаһан юумыень нюунгүй бултыень таанадта хэлэжэ үгэхэб.

5Тиихэдэм тэдэ намда иигэжэ хэлэбэ:

– Эзэн Бурханайнгаа захиралтые дүүргээгүй һаамнай, Эзэн манай урдаһаа гэршэ болон байг лэ. 6Муу, һайншье бидэндэ байгаа һаань, бидэ Эзэн Бурханайнгаа захиралтануудые сахин дүүргэхэбди. Тэрэнэй үгэ дуулаа һаамнай, бидэндэ һайн байхал.

Эзэнэй харюу

7Арбан үдэрэй үнгэрһэнэй удаа Эзэн намда айладхал буулгаба. 8Тиихэдэнь би Карээһаагай хүбүүн Ёханааниие, тэрээнтэй байгааша сэрэгэй бүхы ноёдые, бүхы зониие дуудабаб. 9Би тэдээндэ иигэжэ хэлэбэб: Израилиин Эзэн Бурханда минии зальбархые таанад гуйгаа бэлэйт. Эзэн Бурхамнай иигэжэ айладхана:

10– Энэ орон нютагта үлөө гээшэ һаатнай, Би таанадые суглуулхаб, һалгаахагүйб. Би таанадые һуурижуулхаб, татан гаргахагүйб. Таанадта ушаруулһан гай тодхор тухайгаа би харамсалнаб. 11Вавилооной хаанһаа бэшэ бү айгты. Би таанадтайб, тэрэнэй мэдэлһээ Би таанадые абархаб. 12Минии таанадта үршөөл хайраяа үзүүлхэдэ, тэрэ таанадые хайрлаха, орон нютаг руутнай бусахыетнай зүбшөөхэ. Энэ болбол Би, Эзэн, айладхана мүн!

13– 14– 15Теэд таанад, Иудын газар нютагта үлөөшэд, Эзэн Бурханайнгаа үгэнүүдтэ һөөргэдэжэ байха ёһогүйт. Таанад «Үгы, бидэ энэ газарта байхаяа һананагүйбди, дайн дажартай ушархагүйн тула, үлэсхэлэн хооһон байхагүйн тула Египедтэ байхабди» гэжэ хэлэхэ ёһогүйт. Иимэ юумэ хэлээ һаатнай, Түмэн Сэрэгтэ Эзэн, Израилиин Бурхан, иигэжэ айлдахаха: «Египет руу ошожо, ажаһуухаяа һанаа һаатнай, 16танай айдаг дайн дажар танда хүрэхэ, айдаг үлэсхэлэн хооһон байдалтнай таанадые дахаха. Тиигээд таанад Египедтэ хосорхот. 17Египет руу ошожо байха һанаатай зон бултадаа дайн дажарта гү, али туража, үгышье һаа, үбдэжэ үхэхэ, нэгэшье хүн амиды мэндэ үлэхэгүй, хэншье Минии татахаяа байгааша гай тодхорһоо зайлахагүй».

18Израилиин Түмэн Сэрэгтэ Эзэн Бурхан иигэжэ айладхана: «Иерусалимай улад зондо Минии уур хилэнгэй адхарһандал адляар таанад дээрэ, Египет ошоо һаатнай, тиимэ Минии уур сухал таанад дээрэ адхарха. Та бүгэдэ үзэмжэгүй муухай юумэн ябахат, зон таанадые наада барижа, нэрыетнай хараалай орондо хэлэдэг болохо. Таанад энэ орон нютагаа бэшэ харахагүйт».

19Би үргэлжэлүүлбэб:

– Иудын орон нютагта үлөөшэ зон, таанадые Египет руу бү ошогты гэжэ Эзэн һэргылнэ. Би таанадта энээн тушаа хэлэжэ байна гээшэб. 20Эзэн Бурханаа таанадай түлөө гуйха тухайм намайе гуйгаа бэлэйт, Тэрэнэй захиралтые бултыень сахин дүүргэхэбди гэжэ хэлээ һэнта. 21Минии мүнөө хэлэхэдэ, таанад Эзэн Бурханайнгаа үгэ дууланагүйт. 22Тиимэл хадаа мэдэжэ байгты: ошохоёо һанаһан газартаа дайн дажарһаа, туража, үбшэлжэ таанад үхэхэт.
Copyright information for BxrBBL2024