Jer 43 | BxrBBL2024 | STEP | Эзэн Бурханай үгэнүүдые минии дамжуулан хэлэжэ дүүргэхэдэ,

‏ Jeremiah 43

Ерэмияа Египет руу абаашагдаба

1 Эзэн Бурханай үгэнүүдые минии дамжуулан хэлэжэ дүүргэхэдэ, 2 Һошаяагай хүбүүн Азаария, Карээһаагай хүбүүн Ёханаан болон бусад дээрэлхүү зантай зон намда иигэжэ хэлэбэ:

– Та буруу юумэ хэлэнэт. Египет руу бү ошогты гэжэ Эзэн Бурхамнай танда айладхаагүй. 3 Нэрияагай хүбүүн Баруух Вавилооной мэдэлдэ маанадые оруулхын, тэдэнэй бидэниие алахын гү, али баряанда туун абаашахын тула оролдожо, таниие иигэжэ хэлүүлнэ.

4 Иигэжэ Карээһаагай хүбүүн Ёханааншье, сэрэгэй нэгэшье ноён, нэгэшье хүн Иудын орон нютагта үлэхэ тухай Эзэнэй үгэ дуулахагүй байба. 5 Тиигээд Карээһаагай хүбүүн Ёханаан, сэрэгэй бүхы ноёд хариин оронуудһаа Иуда нютагаа бусажа ерэһэн бүхы иудей зониие – 6 эрэшүүлые, эхэнэрнүүдые, үхи хүүгэдые, хаанай басагадые – дахуулба. Тэдэ Шапаанай аша, Ахикаамай хүбүүн Гэдаалияагай мэдэл доро Набузарадаанай орхиһон бүхы зониие, тэрэ тоодо намайешье, Нэрияагай хүбүүн Баруух гэгшыешье абаа һэн. 7 Тэдэ Эзэнэй үгэ дуулангүй, Египедэй орон нютаг руу зорибо. Тахпанхээс хүрэтэр ябаба.

8 Тэндэ Эзэн намда айладхаба:

9 – Мантан шулуунуудые гартаа абажа, Тахпанхээстэ, фараоной гэрэй үүдэнэй дэргэдэ, зуурамаг шабар ^{▼▼ Эхэ еврей хэлэн дээрэнь ойлгомоор бэшэ, гэбэшье тротуар гээд тухайлхаар ха.} соо хадагала. Иудейнүүдэй хараһаар байтар иимэ юумэ хээрэй. 10 Тиигээд Минии, Түмэн Сэрэгтэ Эзэнэй, Израилиин Бурханай, Өөрынгөө зараса, Вавилооной хаан Навуходоносорые асаржа, хан шэрээень эдэ шулуунууд дээрэ табихаяа байһан тухай, тэрэнэй майхангай эндэ бодхоогдохоёо байһан тушаа зондо дуулга. 11 Навуходоносор ерэжэ, Египедые диилэхэ. Үбшэ хабшанһаа үхэхэ зон үбшэнһөө үхэхэ, баряанда абтаха зон баряанда туугдан ошохо, дайн дажарта алуулха хүн дайнда унаха. 12 Египедэй бурхадай һүмэнүүдые Би гал дүлэндэ шатаахаб. Вавилооной хаан бурхадыень шатааха. Хонишодой бөөһэгүй сэбэр хубсаһа шэлэн үмдэдэгтэл, Вавилооной хаан Египедэй газар дайдые сэбэрлэн, шэлэжэ эдлээд, тэрэнээ илан орхихо. 13 Тэрэ Египедэй газар дайдадахи Бэт-Шээмэшэй шулуун хүшөөнүүдые хэмхэлхэ, Египедэй бурхадай һүмэнүүдые галдан шатааха.