‏ Jeremiah 44

Египедтэ байгааша израильшуудта Эзэнэй айладхал

1Египедэй орон нютагта, Мигдоол, Тахпанхээс, Ноот болон Патроос хотонуудта ажаһуудаг иудей зон тушаа Эзэн намтай хөөрэлдөө бэлэй. 2Түмэн Сэрэгтэ Эзэн, Израилиин Бурхан иигэжэ айладхаа:

– Иерусалим болон Иудын хан түрын хотонуудта Минии татаһан бүхы гай тодхорые таанад хараа-үзөө бэлэйт. Мүнөө болотороо тэдэ хооһон, һандархай, хэншье тэндэ ажаһуунагүй. 3Ямар ушар шалтагаанһааб гэхэдэ, тэдэ зон муу юумэ хээ – элинсэг хулинсагайнгаашье, өөһэдөөшье, үхи хүүгэдэйнгээшье мэдэхэгүй ондоо бурхадта үргэл үргэдэг байгаа. 4Минии үзэн ядадаг иимэ жэгшүүритэй мухай юумэ хэхэһээ хоридог Өөрын албатан лүндэншэдые эльгээжэл таанадта байгааб. 5Теэд таанад үгыем дуулаагүйт, анхаралаа хандуулаагүйт. Ондоо бурхадта үргэл үргэдэг муу заншалаа орхёогүйт. 6Тиимэһээ Би Иудын хан түрын хотонуудта болон Иерусалимай үйлсэнүүдтэ уур хилэнгээ адхажа, тэдэниие шатаагааб. Тэдэ һандарал болон эзэгүй хооһон болоо, мүнөөшье болотор тиимэ байһаар.

7Би, Түмэн Сэрэгтэ Эзэн, Израилиин Бурхан, юундэ иимэ муухай зүйл өөһэдтөө хэнэбта гэжэ таанадһаа асуунаб. Эрэшүүл, эхэнэрнүүдтэ, үхи хүүгэдтэ, нарайшье үхибүүдтэ гай тодхор татажа, иудей зоной дунда нэгэшье хүн бү үлэһэй гэжэ һанана гүт? 8Шүтөөнүүдые хэжэ, Египедэй газар дайдада ондоо бурхадта үргэл үргэжэ, өөһэдыгөө һалгаахатнай гү? Дэлхэйн арадуудай доромжолол болохо, танай нэрые хараал мэтээр дурдадаг болохын тула гү? 9Иудын хан түрын хотонуудта, Иерусалимай үйлсэнүүдтэ өөһэдынгөө элинсэг хулинсагай, хаашуулайнгаа, һамгадайнгаа, өөһэдын хэһэн муу муухай юумэнүүдые таанад мартаа гээшэ гүт? 10Тэдэ мүнөөшье болотор тиигэһээр. Минии та бүгэдэндэ болон үбгэ эсэгэнэртэтнай үгэһэн хуулинуудые сахинагүй, Намһаа айнагүй.

11Тиимэһээ Би, Түмэн Сэрэгтэ Эзэн, Израилиин Бурхан, танһаа буруу хаража, бүхы Иудын хан түрые үгы хэхэб. 12Египедэй орон нютаг руу ошожо ажаһуухаяа һанааша Иудын хан түрын үлэһэн зон Египедэй газар дайдада хосорхо: бага, ехэшье зон дайн дажарта туража үхэхэ. Үзэмжэгүй муухай тэдэ болохо, зон тэдэниие баһаха, нэрыень хараал мэтээр дурдадаг болохо. 13Египедтэ ажаһуугшадые Иерусалимые хэһээһэндэл, дайн дажараар, үлэсхэлэн хооһон байдалаар, үбшэ хабшанаар дайрахаб. 14Египедэй газар дайда руу ерэһэн Иудын хан түрын үлдөөсэ зонһоо хэншье амиды мэндэ үлэхэгүй. Сэдьхэлээрээ тэгүүлжэ байһан түрэл Иудын орон нютагаа хэнииньшье бусахагүй. Гансал нэгэ хэды бодхуулшад амиды үлэхэ.

15Хариин бурхадта һамгадайнгаа үргэл хэдэгые мэдэдэг үбгэдынь, олон тоото эхэнэрнүүд, Египедтэ, Патроосто һуудаг хамаг зон намда иигэжэ хэлэбэ:

16– Эзэнэй нэрэһээ айладхаһан үгэнүүдыетнай шагнахаяа арсанабди. 17Хэлэһэн үгэнүүдээ бэелүүлхэбди. Тэнгэриин хатан бурханда үргэл үргэхэбди, сэржэм үргэхэбди. Иудын орон нютагта болон Иерусалимда байхадаа бидэ, манай үбгэ эсэгэнэр, манай хаан, удамаршаднай тиидэг бэлэйл. Тиихэдэ бидэ эдеэ хоолтой, жаргалтай, хашалгүй ажаһуудаг бэлэйбди. 18Харин Тэнгэриин хатан бурханда үргэл, сэржэм үргэхэеэ болиходоо, юушьегүй болообди, зомнайшье дайн дажарта, үлэсхэлэн хооһон байдалһаа наһа бараа.

19Эхэнэрнүүд хэлэбэ:

– Тэнгэриин хатан бурханай дүрсэтэй бообо болгожо, үргэл, сэржэм үргэжэ байхадамнай манай хэрэгые үбгэднай дэмжэгшэ һэн.

20Иигэжэ хэлэжэ байһан арад зондо би иигээд харюусаа һэм:

21– Иудын хан түрын хото һууринуудта, Иерусалимай үйлсэнүүдтэ таанадай, үбгэ эсэгэнэрэйтнай, хаашуулайтнай, удамаршадайтнай хэжэ байһан үргэл тухай Эзэн мартаа гү, али мэдэнэгүй гэжэ һанаа гүт? 22Тиимэһээл Эзэн танай жэгшүүритэй муухай хэрэгүүдые тэсэжэ ядаа, тиимэһээл газартнай зэлүүд хооһон, үзэмжэгүй муухай болоо. Таанад энээниие мүнөө өөһэдөө хаража байна ха юмта даа. 23Энэ гай тодхор танай гэм зэмэһээ болоо: таанад хариин бурхадта үргэл үргэжэ эхилээт, Эзэнэй үгэ дуулаагүйт, нүгэл урдань хээт.

24Түмэн Сэрэгтэ Эзэнэй, Израилиин Бурханай, Египедэй орон нютагта ажаһуудаг иудей зондо айладхаһые би дамжуулбаб:

25– Таанад болон һамгадтнай Тэнгэриин хатан бурханда үргэл үргэдэг байхабди гэжэ найдуулаа бэлэйт. Үргэл, сэржэм тэрээндэ үргэжэ байхаар хэлээт, тиигээд үгэеэ бэелүүлжэл байнат. Зай, тиижэл байгыт даа! 26Тиимэ хадатнай Би, Эзэн, Өөрынгөө агууехэ нэрээр тангаригланаб: Египедэй орон нютагта ажаһуугша иудейнүүдтэ Минии нэрээр тангариглахыень хориноб! 27Таанадай һайн байха бэшэ, һандаргагдаха тухай Би оролдохоб. Египедэй орон нютагта байгааша таанад, иудейнүүд, бултадаа һалатараа дайн дажарта гү, али үбшэ хабшанһаа хосорхот. 28Гансал үсөөхэн зонтнай амиды мэндэ үлэжэ, Египедһээ Иудын орон нютагаа бусаха. Тэдэ амиды үлөөшэд лэ Минии гү, али тэдэнэй үгын бэелүүлэгдэһые ойлгохо. 29Энэ газар дээрэ таанадые Минии хэһээхэ байһанай, таанадта гай тодхор минии татаха байһанай дүлгэ тэмдэг харуулхаб. 30Хараарайгты даа, Вавилооной хаан Навуходоносорой һабарта Иудын хаан Цэдэкиия гэгшые үгэһэндэл, Би Египедэй хаан фараон Хопраае дайсадтань дамжуулхаб.