‏ Jeremiah 48

Моһаабай һандарха тушаа

1Моһааб тушаа Түмэн Сэрэгтэ Эзэн, Израилиин Бурхан иигэжэ айладхаа: Нэбоо хото золгүй, һандаргагдаа.
Кириатааим эшхэбтэр зүйл боложо олзологдоо.
Хэрэм бүхэлэлтэнүүд эшхэбтэр зүйл боложо унаа.
2Моһаабай магтаал солонь буураа.
Дайсан Хэшбоон эзэлэн абаа.
Моһаабай арад түмэниие үгы хэхэ нюуса хэлсээн ябуулагдана.
Мадмээн хото абяа аниргүй болгохо,
сэрэг хойноһоонь дахаад һалахагүй.
3Хоронааһимай зон хашхаралдана:
«Сүйд! Агууехэ сүйд болобо!»
4Моһааб һандаргагдаа,
үхибүүдэйнь хашхаралдаха дуулдана.
5Лүхиидэй үгсүүгээр тэдэ уйлалдан үгсэнэ,
Хоронааһим руу уруудаха замдаа тэдэ зобожо хашхаралдана:
6«Түргөөр! Ами наһаяа абарагты!
Сүл губиин зэрлиг элжэгэн мэтэ гүйгты!»
7«Моһааб, ши өөрынгөө хүсэндэ, баян бардам байһандаа найдадаг бэлэйш.
Теэд мүнөө шишье диилдэхэш.
Хэмоош бурханшни баряанда туугдан ошохо,
тайжанартаяа, санаартадтаяа хамта ошохо.
8Хотошье һандаргагдаха,
нюруу газар, хүндышье хосорхо.
Энэ болбол Би, Эзэн, айладхана мүн!
9Моһаабта дали үгыт,
иигэжэ тэрэ ниидэн тэрьедэхэл.
Хотонуудынь зэлүүд хооһон, хэнэйшье байдаггүй газар болохонь».

10(Эзэнэй хэрэг бүхы сэдьхэлһээ оролдон хэдэггүй зон хараал шэнгээг! Алахаяа тэбшэдэг хэн нэгэн хараал шэнгээг!)

Моһаабай хотонууд һандаргагдаа

11Эзэн айладхана:

– Моһааб хадаа хододоо аюулгүй ажамидардаг байгаа, баряандашье туугдан ошоогүй. Тэрэ һаба соо худхуулдаггүй үзэмэй дараһан архи мэтэ, һабаһаа һабадашье эюулэгдэдэггүй бэлэйл. Тиимэһээл амтаниинь тэрэл зандаа, үнэрынь аятай зохид һэн.

12Зониие эльгээжэ, һабаһаа һабада Моһаабые эюулүүлхэ саг дүтэлжэ байна. Тэдэ һабануудые хооһоруулха, буталха. 13Израилиин улад зоной этигэл найдал болоһон Бэт-Ээлһээ эшэжэ эхилһэндэл, Моһаабай зон Хэмоош бурханһаа эшэжэ эхилхэ. 14Моһаабай арад түмэн,
юундэ таанад зүрхэтэй,
байлдаануудта дүршэһэн зомди гээд хэлэнэбта?
15Моһааб болон хотонуудынь һандаргагдаа,
эгээл бэрхэ залуу зониинь алуулагдаа.
Энэ болбол Би, Түмэн Сэрэгтэ Эзэн, хаан, айладхана мүн!
16Моһаабай хосорхонь ойртоо,
гай тодхор тэрээндэ дүтэлөө.
17Дүтүүр ажаһуудаг арадууд,
тэрэниие хайрлыт,
тэрэниие һайн мэдэхэ улад,
«Тэрэнэй хүсэ шадал һалаа,
алдар солонь буураа!» – гэжэ хэлыт.
18Дибоондо амиды мэндэ ажаһуугшад,
һүр жабхаланта һууриһаа доошоо буугыт,
тооһо шорой соо һуугты,
юуб гэхэдэ, Моһаабые хюдагша хажуудатнай ерээд,
хэрэмүүдыетнай һандаргаахал.
19Ароһээртэ амиды мэндэ байгшад,
харгын хажууда зогсожо,
тэрьедэн гүйжэ байгаашадые
«Юун болооб?» гэжэ асуун байгыт.
20«Моһааб унан һалаа» гэжэ тэдэ харюусаха,
тэрээн тушаа гашуудан байгты,
Моһааб һандаргагдаа гэжэ Арноон голоор соносхогты!

21Шүүбэрилхэ саг тала газар руу –

Холоон, Яаһцаа, Мэпаат хотонуудта буужа ерээ.

22Дибоон, Нэбоо, Бэт-Диблатааһим руу, 23Кириатааим, Бэт-Гамуул болон Бэт-Мэһоон руу, 24Кэриһоот, Боцраа болон Моһаабай холо, ойрын бүхы хотонуудта тэрэ хүрэжэ ерээ. 25Моһаабай тэнхээ тамир һалгаагдаа, хүсэ шадалынь һандаран буураа. Энэ болбол Би, Эзэн, айладхана мүн!

Моһааб доромжолуулагдаха

26Эзэн айладхана:

– Моһаабые һогтуулагты, юуб гэхэдэ, тэрэ Минии урдаһаа эсэргүү бодоо. Бөөлжэдэһэн соогоо тэрэ хэбтэг лэ, зоной наадан, шоо үзөөн болохо. 27Моһаабай зон, һанана гүт, таанад Израилиин уладые наада барижа, хулгайшандал адляар тэрээндэ хандан доромжолжо байһанаа?

28Моһаабай арад зон, хото һууринуудаа орхигты! Хабсагайнууд дээрэ байрлагты! Агы нүхэнэй амһар дээрэ уурхайгаа хэдэг гулабхаадал адли байгты! 29Моһаабай бардам зан, үлүү ехэ бардамлалгые, бэеэ ехэ үндэрөөр сэгнэдэг тухайнь дуулаһан байнаб. 30Тэрэнэй угаа дээрэлхүү зан тухай мэдэнэм. Теэд тэдэнэй һаахараан юуншье бэшэ, хооһон юумэн. 31Тиимэһээл Моһаабай зон тушаа гашуудан байхаб, Киир-Хээрэсэй улад тушаа ёолон гэмшэхэб. 32Язээрэй зон тушаа гашуудан уйлаһанһаа үшөө ехээр Сибмаагай зон тушаа уйлахаб. Таанад үзэмэй модоной эшэ мэтэ, Дабһата далайһаа саашаа, Язээр нуур хүрэтэр үргэлжэлдэг бэлэйт. Теэд мүнөө нажарай жэмэстнай, үзэмэй модоной мододтнай һандаргагдаа. 33Моһаабай үрэжэлтэ газарта жаргал, баяр таһалдаба. Үзэмэй жэмэсээр архи дараха хэрэг болюулааб. Үзэмэй архи дараха, баярай абяа гаргаха хэншье үгы.

34Хэшбооной болон Элэалээгэй зон хашхаралдана, оог шашхааень Яаһацта, Цооһарта, Хоронааһимда, Эглаат-Шэлишияада дууламаар. Нимриим горхоншье шэргэшоол! 35Мүргэлэй обоонуудта үргэл хэдэг, өөрын бурхадта уталга ууюулдаг Моһаабай зониие хюдахаб. Энэ болбол Би, Эзэн, айладахана мүн!

36Тиимэһээл Минии зүрхэ сэдьхэл Моһаабай, Киир-Хээрэсэй улад зон тушаа лимбэ мэтэ уйлана. Тэдэнэй олоһон баялигынь алдагдаа. 37Тэдэ бултадаа толгойгоо хюһанхай, һахалаа абанхай. Гашуудан-зобон, гараа элдэбээр отолоо, хүн бүхэниинь таар үмдэнхэй. 38Моһаабай бүхы хушалтанууд дээрэ, үйлсэ талмайнууд дээрэнь гашуудал, уйлаан. Юуб гэхэдэ, Би Моһаабые хаясаанай һаба мэтээр буталан һандаргааб. 39Моһааб һандаргагдаа! Хашхаралдыт! Моһааб доромжолуулагдаа. Тэрэ үндэһэ яһатанай наада энеэдэн болоо. Энэ болбол Би, Эзэн, айладхана мүн!

Моһаабые абарха хэншье байхагүй

40Эзэнэй айладхаһанай ёһоор, ондоо арад түмэн Моһаабта даляа дэбиһэн бүргэд мэтээр добтолон орохо. 41Хотонууд, хэрэмүүд дайсанай хүнэһэн болохо. Тэрэ үдэр Моһаабай сэрэгшэдэй зүрхэ сэдьхэл үхибүү түрэжэ, үбдэжэ байһан эхэнэртэл адли аймхай болохо. 42Моһааб үндэһэ яһатанай дундаһаа үгы хэгдэхэ, юуб гэбэл, тэрэ Минии урдаһаа эсэргүүсэн бодоо. 43Айдаһаа хүрэлгэ, нүхэн, занганууд Моһаабай зониие амадана. 44Айжа тэрьедэһэн хэн нэгэн нүхэн руу унаха, нүхэнһөө гараашье һаа, тэрэ зангада баригдаха. Юуб гэбэл, Эзэн Моһаабай һандаргагдаха саг тодорхойлоо. 45Тэрьедэжэ байгаашад хүсэгүй болоходоо Сиһоон хаанай хэзээ нэгэтэ зонхилжо байһан Хэшбоон хотодо хорохоёо һанаха, теэд гал дүлэн тэндэһээ гаража, Моһаабай хилэ дайдануудые, хадын оройнуудые хайран галдаха. 46Моһааб, ши золгүйш даа! Хэмоош бурханда зальбарагшад һалаба, үхи хүүгэдынь баряанда абтан туугдаба.

47Теэд саашадаа Моһаабые дахин һэргээхэб гэжэ Эзэн найдуулна. Эзэнэй Моһааб тушаа айладхаһан юумэн заабол бэелүүлэгдэхэ.