‏ Jeremiah 5

Израилиин хэһээлтэ

1Иерусалимай үйлсэнүүдээр хойшо-урагшаа ябагты!
Тиигээд харан адаглагты!
Үнэн сэхэ, Эзэн Бурханда бэеэ зорюулһан
нэгэшье хүниие олохо ааламта?
Олоо һаатнай, Эзэн Иерусалимые хүлисэхэ һэн.
2Эзэн амиды гэжэ
таанад хэды дахин хэлээшье хадаа
хуурмаг тангариг үргэнэт.
3Оо, Эзэн!
Зоной Танда үнэн сэхэ байхые хүсэнэт.
Танай тэдэниие сохиходо,
тэдэ һэншье гэнэгүй.
Танай тэдэниие хэһээхэдэ,
тэдэ һургаал абахаяа татагалзана.
Тэдэ үсэрхэжэ,
нүгэлөө мэдэрхэһээ арсана.
4Тиихэдэнь би: «Тэдэ ядуу, мунхаг зон.
Юуб гэбэл, тэдэ Эзэнэй
ямар эрилтэ табидагые мэдэнэгүй,
юу хэхыень Бурханай хүсэдэгые ойлгоногүй.
5Удамаршадта ошожо, тэдэнтэй хөөрэлдэхэм.
Тэдэ, сохом, Эзэнэй эрилтэ мэдэдэг,
юу хэхыень Бурханай хүсэдэгые
ойлгодог ёһотой» – гэжэ һанаа һэм.
Теэд тэдэ бултадаа Эзэнэй
эрхэ мэдэл буруушааба,
үгыень дуулахаяа арсаба.
6Тиимэ ушарһаа ойн арсалан тэдэниие алажа,
сүл губиин шоно тэдэниие хюдаха,
ирбэс хотонуудайнь хажууда амадан байха,
хотонуудһаа гараһан хүн бүхэн таһа татуулха.
Юуб гэбэл, тэдэнэй нүгэл ехэ,
Бурханһаа буруу хараха ушарынь олошороо.
7Эзэн иигэжэ айладхана:
Юундэ Би арад зоноо хүлисэхэ юмбиб?
Тэдэ Намайе орхижо,
хуурмаг бурхадаар тангаригладаг болоо.
Минии тэдэниие садатар хооллуулхада,
тэдэ забхайржа,
янхан эхэнэрнүүдэй гэртэ үймэлдэнэ.
8Тарган садхалан моридтол тэдэ инсагаалан,
хүршынгөө һамгантай һальхайралдахаяа дуудан байха юм.
9Энээнэйнь түлөө Би тэдэниие хэһээхэгүй аалби?
Иимэ үндэһэтэнһөө Би үһөөгөө абахагүй юм гүб?
10Үзэмэй таряалан мэтэ арад зон руу
сүйд хэхыень дайсадые эльгээхэб,
гэбэшье бүримүһэн усадхуулхагүйб,
харин мүшэрнүүдыень хухалхые захирхаб,
юуб гэхэдэ, тэдэ Минии арад бэшэ.
11Израилиин болон Иудын улад зон
Намда үнэхөөр урбаа.
Энэ болбол Би, Эзэн, тунхаглана мүн!

Эзэн Израиль болон Иудын зониие һалгаахань

12Израилиин болон Иудын зон Эзэниие буруушаажа, иигэжэ хэлээ: «Тэрэ үгы! Гай гасалан бидэнтэй ушархагүй, дайн дажар, үлэсхэлэн хооһон байдал үзэхэгүйбди».

13Лүндэншэд – хахархай аман, Эзэнэй үгэ мэдэнэгүй гэжэ тэдэ хэлээ. Тиимэһээ гай тодхор намдал, Ерэмияада, бууг лэ гээд тэдэ хэлэнэ.

14Тиимэһээ Түмэн Сэрэгтэ Эзэн Бурхан иигэжэ айладхажа байна: «Ерэмияа, иимэ үгэнүүдые тэдэнэй хэлэһэндэнь Би, хараарай, шинии аманда өөрын үгэнүүдээ гал мэтэ болгохоб. Энэ улад зон түлеэн болохо, удаань тэдэниие гал дүлэн залгин шатааха!»

15Израилиин улад зон, үзөөрэйгты, Эзэн алас холоһоо танда добтолхыень нэгэ үндэһэ яһатаниие асаржа байна. Тэрэ хадаа тэсэмгэй шэрхи ба эртэ урдын үндэһэ яһатан. Тэдэнэй хэлэ мэдэхэгүйт, юу хэлэжэ байһыень ойлгохогүйт. 16Тэдэнэй харбаашадынь бултадаа хүсэтэй, хайра гамгүй аладаг зон. 17Тэдэ ургасыетнай болон хүнэһэ хоолыетнай залгиха, хүбүүд, басагадыетнай алаха, мал адууһыетнай үүсэлхэ, үзэм болон инжирыетнай эдихэ. Танай найдадаг хэрэмүүдыетнай тэдэ дайлан һандаргааха.

18Эзэн иигэжэ тунхаглана:

– Тэдэ үдэрнүүдтэшье Би улад зоноо бүримүһэн усадхахагүйб. 19Тэдэнэй «Юундэ Эзэн Бурхамнай бидэндэ эдэ бүгэдые ушаруулааб?» гэжэ асуухадань, «Намайе, Бурханиие, орхижо, өөһэдын газар нютагта хариин шүтөөнүүдтэ алба хэжэ байһантайгаа адли таанар мүнөө хариин газар нютагта ондоо уладта алба хэхэ болоот» гэжэ Намайе айладхана гээд ши, Ерэмияа, хэлээрэй.

Эзэн арад түмэнөө һэргылбэ

20Яковай уг удамда зарлан тунхаглагты, Иудын хан түрын улад зондо дуулгагты. 21Шагныта, тэнэг, ухаагүй зон! Таанад нюдэтэй байбашье, харадаггүйт, шэхэтэй байбашье, дууладаггүйт. 22Би – Эзэмби. Юундэ Намһаа айнагүйбта? Минии урда юундэ шэшэрнэгүйбта? Би элһэ тэнгис далайда хилэ болгон табяаб. Хэтэ мүнхын тэрэ хизаарые далай гаталхагүй. Долгидынь хэды мушхарбашье, тэрэниие дабажа шадахагүй. Тэдэ хэды шааябашье, хүндэлэн гаража шадахагүй. 23Теэд таанад улад зонта! Таанад үсэд, үгэ дууладаггүйт, Намһаа буруу хаража, холодонот. 24Намһаа айн түбэгшөөхэ тухай бододогшьегүйт. Харин Би намартаа, хабартаа бороо саг соонь эльгээдэгби, жэл бүри таанадта ургасын хаһа үршөөнэб. 25Танай гэм зэмэһээ боложо эдэ бүгэдэ таанадһаа буруу хараба, нүгэлтнай дэмбэрэлтэй һайн юумые танһаа холодуулба.

26Минии арад түмэн соо харатай муу зон бии. Тэдэ шубуу баригшад мэтэ, урьхануудые табидаг. Теэд тэдэ шубуу бэшэ, улад зониие баринал! 27Шубуудаар дүүрэн тор мэтэ тэдэнэй гэр мэхэ гохоор дүүрэн. Тиимэл ушарһаа тэдэ хүсэтэй, баян болоо. 28Тэдэ таргалаа, тоһо өөхөөр ялаганаа. Элдэб муу хэрэгүүдые үйлэдэнэ, буруу шүүбэрилнэ, үншэн хэнзын хэрэгһээ баяжана, ядуу зоной эрхэшье хамгаалнагүй.

29Тиимэһээ Би, Эзэн, тэдэниие хэһээхэб, иимэ арад зонһоо үһөөгөө абахаб. 30Аймшагтай муухай юумэн, жэгшүүритэй зүйл энэ газар дээрэ болоно: 31лүндэншэд хуурмаг абарал буулгана, тэдэнэй туһаар санаартад улад зониие ударидана. Минии арад түмэн энээндэ угаа дуратай байха юм! Харин энээнэй дүүрэжэ, хэһээлтын сагай ерэхэдэ, тэдэ яаха болоноб?