‏ Jeremiah 50

Вавилоон һалаа

1Халдейшүүдэй орон нютаг Вавилоон тушаа Эзэнэй намда айладхаһан үгэнүүд энэ: 2Үндэһэ яһатанда һураг суу дуулгагты!
Соносхогты! Дохёо тэмдэг үгэжэ, дуулгагты!
Нюужа бү байгты! Вавилоон һалаа!
Бээл нэрээ хухараа! Мэродаах бурханиинь бута һүрөө!
Вавилооной хүрэгүүд эшхэбтэр зүйл болоо,
шүтөөнүүдынь бута сохигдоо!

3Вавилоон руу добтолжо, зэлүүд хооһон болгохо зорилготойгоор хойто зүгһөө арад түмэн ерэжэ байна. Зон болон ан амитад тэрьедэжэ, хэншье тэндэ ажаһуухагүй.

Израилиин бусалган

4Эзэн иигэжэ айладхана:

– Израилиин улад зоной болон Иудын хан түрын зоной Намайе, Өөрынгөө Бурханиие, бэдэрэн бархиралдаха саг дүтэлжэ байна. 5Тэдэ Сион руу харгы зам һурагшалаад, тэрэ зүг шэгээр ошохо. Намтай тэдэ хэтэ мүнхын хэлсээ баталха, хэзээдэшье тэрэниие эбдэхэгүй. 6Минии арад түмэн төөриһэн хонид мэтэ, нэгэ гүбээһээ нүгөө гүбээ хүрэтэр тэнэн-төөрин ябаа, гэрээшье мартаа, хонишодынь тэдэниие төөрюулээ. 7Тэдэниие ологшо хэн нэгэн залгиха һанаатай бэлэй. Дайсадынь иигэжэ хэлэнэ:

– Бидэ буруу бэшэбди, тэдэ Эзэнэй урда нүгэл хээ. Элинсэг хулинсагынь Эзэндэ найдадаг бэлэй, тиимэһээ тэдэ өөһэдөө Тэрээндэ үнэн сэхэ байха ёһотой байгаа.

8Израилиин арад түмэн, Вавилоонһоо тэрьедэн ошогты! Тэрэ орон нютагһаа гаран ошогты! Эгээл түрүүлэн ошогты! 9Би хойто зүгһөө агууехэ үндэһэ яһатадай бүлэг Вавилоон руу асархаб. Тэдэ добтолжо, илаха, хото олзологдохо, Тэдэнэй годлинууд бэрхэ харбаашанай табиһан годлидол сэхэ, дэмы, миин табигдахагүй. 10Вавилооной орон нютаг дээрмэдүүлэгдэхэ, дээрмэшэд дураараа юумэ абаха. Энэ болбол Би, Эзэн, айладхана мүн!

Вавилооной доройтолго

11Эзэн иигэжэ айладхана:

– Вавилооной улад зон, таанад Минии арад түмэниие тоноот. Жаргажа, налайжа, таряа сохижо байһан үнеэндэл ябабат, азаргадал инсагаалнат. 12Теэд танай өөрын хото ехэ эшхэбтэр байдалда орохо, доромжолуулагдаха. Вавилоон эгээл хүндэгүй, зэлүүд хооһон, хуурай газар болохо. 13Минии уур хилэнсэглэхэдэ, тэндэ хэншье ажаһуухаяа болихо. Вавилоон һандаргагдажа, тэрээн дээгүүр гарагша хүн бүхэн сошон-гайхан үнгэрхэл.

14Харбагшад, Вавилооной урдаһаа тулалдахаяа нэгэн жэгдэ жэрылдэгты. Тэрээн руу харбагты. Тэрэниие бү хайрлагты, юуб гэхэдэ, тэдэ Минии, Эзэнэй, урдаһаа нүгэл үйлэдөө. 15Хотые тойрон дайнай оог хашхараа суряатуулагты! Вавилоон абтаа, тэрэнэй хананууд хамхаран унаа, бута сохигдоо. Би тэрээнһээ үһөөгөө абахам, таанадшье өөһэдтэтнай тэрэнэй хандаһанай хэмээр үһөөгөө абыт. 16Вавилоондо таряа тариха, хуряаха хэрэгые болюулагты, тэндэ ажаһуудаг хариин хүн бүхэн добтолон орохо сэрэгһээ айжа, түрэл орон нютаг руугаа бусаг лэ.

Израиль һөөргөө бусаха

17Эзэн иигэжэ айладхана:

– Израилиин улад зон арсалангуудта намнуулжа тараагдаһан һүрэг мэтэ. Урид тэдээндэ Ассириин хаан добтолон орожо мүлжэдэг һэн, удаань Вавилооной хаан Навуходоносор яһа уһыень хухалаа. 18Тиимэһээ Би, Түмэн Сэрэгтэ Эзэн, Израилиин Бурхан, Навуходоносор хааниие, гүрэн түрыень Ассириин хааниие хэһээһэндэл адляар хэһээхэб. 19Израилиин улад зониие өөрынь газар уһанда бусаахаб. Кармээл уулада болон Башаан газарта ургаһан ургасые тэдэ эдихэ, Эпрааим болон Галаадай уулархаг нютагта ургадаг таряа талхаар тэдэ хооллохо. 20Тэрэ үе сагта Израильда ямаршье нүгэл, Иудын хан түрэдэ ямаршье гэм буруу олдохогүй. Юуб гэхэдэ, амиды мэндэ үлөөһэн зониие Би хүлисэхэб. Энэ болбол Би, Эзэн, айладхана мүн!

Вавилоон тушаа

21Эзэн иигэжэ айладхана:

– Мэратааһим болон Пэкоодой улад зондо добтологты. Алагты, үгы хэгты тэдэниие! Таанадта захирһыем гүйсэд бэелүүлэгты! Энэ болбол Би, Эзэн, айладхана мүн! 22Тулалдаанай абяан дуулдана, агууехэ һандарал болоол! 23Вавилоон – бүхы дэлхэйе мунсадажа байһан алха, өөрөө бутаран һалаба! Тэрэ бүхы үндэһэ яһатанай айха зүйл болобо. 24Вавилоон, ши Минии урдаһаа тулааш, тиигээд Минии шамда гэжэ табиһан зангадам оробош! Энээн тушаа ши тухайлхашьегүй байгааш. 25Буу зэбсэгэйнгээ һан нээжэ, уур сухал дундаа Би тэдэнээ гаргабаб. Ушар гэхэдэ, Вавилооной орон нютагта Минии, Түмэн Сэрэгтэ Эзэн Бурханай, үйлэдэхэ ажал бии юм. 26Бүхы талаһаа тэрээндэ добтолон орогты, талха таряа нөөсэтэй амбаарнуудыень сэлигты! Дээрмэдэһэнээ таряанай обоо мэтээр обоологты! Орон нютагые үгы хэгты! Юушье бү үлөөгты! 27Бүхы сэрэгшэдыень алагты! Мал үүсэлһэндэл, һалгаагты! Вавилооной зондо гасалан зоболонойнь саг буугаа. Хэһээгдэхэ сагынь ерээ!

28Вавилооной орон нютагһаа тэрьедэн гүйжэ, Иерусалим руу ерэгшэдэй абяан дуулдана. Тэдэ Эзэн Бурханаймнай Һүмын түлөө үһөөгөө абаһан тухай дуулгана.

29Вавилооной урдаһаа харбагшадые дуудагты. Хотые тойрон, хэнииешье тэндэһээ амиды мэндэ табингүй тэдэ зогсог лэ! Үйлэдэһыень өөртэнь бусаагты! Ондоо арадуудта ямараар хандаа һэм, тон тиимээр өөртэнь хандагты! Юуб гэбэл, Вавилоон Минии, Израилиин Нангинай, урдаһаа бардамлан үндыгөөл. 30Тиимэһээ бүхы залуу зониинь хотын үйлсэнүүд дээрэ алуулагдаха, бүхы сэрэгшэдынь тэрэ үдэр усадхагдаха. Энэ болбол Би, Эзэн, айладхана мүн!

31Вавилооной улад зон, таанад бардам зантайт. Тиимэһээ Би, Түмэн Сэрэгтэ Эзэн Бурхан, таанадай урдаһаа тулахаб. Таанадые Минии хэһээхэ саг ерэбэ. 32Бардам зантай үндэһэ яһатантнай бүдэрэн унаха, хэншье тэрэниие һэргээжэ-үндылгэжэ шадахагүй.

33Түмэн Сэрэгтэ Эзэн иигэжэ айладхана:

– Израилиин болон Иудын хан түрын улад зон дарлагданхай. Тэдэниие олзологшод бултадаа тэдэниие шанга баринхай, табиха дурагүй. 34Харин тэдэнэй Абарагша хүсэтэй, Түмэн Сэрэгтэ Эзэн гэжэ нэрэ хүндэтэй. Тэрэ хэрэгыень хаража үзэхэ, тиигээд амар амгалан байдал газар дэлхэйдэ асарха, гэбэшье Вавилооной улад зониие хүлгөөхэ.

35Эзэн иигэжэ айладхана: Вавилооной улад зон хосорог лэ!
Ажаһуугшадынь хосорог!
Түшэмэлнүүдынь хосорог,
сэсэн мэргэшүүлынь һалаг лэ!
36Худал айладхал хүргэгшэд хосорог лэ!
Тэдэ мунхаг!
Сэрэгшэдынь хосорог!
Тэдэ аймхай!
37Морид болон дайшалхы тэргэнүүдынь һалаг!
Хүлһэлэн асарһан хариин сэрэгшэдынь хосорог!
Тэдэ угаа һула!
Эрдэни зэндэмэнинь һалаг!
Тоногдог!
38Газар дайдадань ган гасуур болог!
Гол мүрэнүүдынь шэргэг!
Вавилоон орон нютаг хадаа аймшагтай шүтөөнүүдэй газар,
тэдэнь зониие үбэштэй болгоо.

39Тэндэ сүүбэн шононууд хээрын аймшагтай амитадтай хамта байрлаха, муухай, сээртэй шубууд уурхайлха. Зон тэндэ хэзээдэшье байрлахагүй. 40Содом, Гоморро болон хажуудахи хотонуудайнь һандаргаһандал адляар Вавилооншье һандаргагдаха. Хэншье тэндэ хэзээдэшье ажаһуухагүй. Энэ болбол Би, Эзэн, айладхана мүн! 41Харагты, хойто зүгһөө сэрэгэй зон ерэжэ байна,
агууехэ үндэһэтэн,
олон тоото хаашуул
газар дэлхэйн хизаартахи һууриһаа
хүдэлжэ эхилээ.
42Тэдэ һурша ном, жада гартаа адханхай,
хэрзэгы хархис зантай, хайра гамгүй.
Тэдэнэй хашхараан тэнгис далай мэтэ хүнхинэнэ.
Вавилооной басаган, шинии урдаһаа дайлахаяа
тэдэ нэгэ хүн мэтэ жагсан, морёор гүйлгэлдэн ерэжэ байна!
43Вавилооной хаан тэдээн тушаа һураг суу дуулажа,
һал һуушаба.
Түрэжэ байһан эхэнэртэл үбшэндэ,
гай зоболондо тэрэ нэрбэгдэбэ.

44Иорданай шугы шэдхэһээ тунга ногоон бэлшээри руу ошожо байһан арсаландал Би гаража, Вавилооной улад зониие гэнтэ орон нютагһаань тэрьедүүлхэб. Минии шэлэһэн хүн арад түмэниие хүтэлбэрилхэ. Хэн Намтай зэргэсэжэ шадахаб? Хэн Минии урдаһаа тулажа шадахаб? Ямар удамарша урдаһаамни һөөргэдэхэб? 45Вавилооной улад зон тушаа Эзэнэй шиидэһэн, халдейшуудай орон нютагай урдаһаа зохёоһон Тэрэнэй түсэб шагнагты. Бага балшар үхибүүдшье харюуда татагдаха, хотонуудынь хооһорхо. 46«Вавилоон абтаа!» гэһэн оог хашхараанһаа газар доһолон хүдэлхэ, бусад үндэһэ яһатан хашхараа, шууяа дуулаха.