‏ Jeremiah 51

Үшөө Вавилоон тушаа

1Эзэн иигэжэ айладхана:

– Вавилоон руу болон ажаһуугшад руунь Би һандарал асардаг һалхи эльгээхэб. 2Һолоомо һалхитуулһандал адли Вавилооной орон нютаг хюдахыень Би хариин зониие эльгээхэб. Гай тодхорой тохёолдохо тэрэ үдэр тэдэ бүхы талаһаа Вавилоондо добтолжо, газарыень хооһон болгохо. 3Һурша ном татажа харбахаяа байһан, хуягаа үмдэхэеэ байһан сэрэгшые үрдижэ харбагты. Залуу зонииень бү хайрлагты! Бүхы сэрэгыень усадхагты! 4Тэдэ шархатажа, хотынгоо үйлсэнүүдтэ унан наһа бараха. 5Би, Түмэн Сэрэгтэ Эзэн Бурхан, Израиль болон Иудын хан түрын Минии, Израилиин Нангинай, урда оло дахин нүгэл хээшье хадань, орхёо бэшэб. 6Вавилооной орон нютагһаа тэрьедэгты! Өөһэдынгөө ами наһа аршалагты! Вавилооной гэм зэмын түлөө бү хюдуулжа байгты! Би хэһэн хэрэгүүдэйнь хэм соо хэһээлтэ амасуулнаб! 7Бүхы дэлхэйе һогтуулжа байһан, Минии гартахи алтан хундага мэтэ һэн Вавилоон. 8Гэнтэ тэрэ унажа, тэһэ бутаршабал! Тэрээн тушаа гашуудан байгыт! Аргалхаяа эм дом абагты, эдэгэжэ болохо аалам. 9Тэндэ ажаһуугша хариин зон иигэжэ хэлэбэ:

– Бидэ Вавилоониие аргалхаяа һэдээбди, теэд болобогүй. Тэрэниие орхижо, гэртээ хария. Бурхан бии шадал соогоо Вавилоониие хэһээгээ, энээн тушаа бүхы арадууд мэдэнэ.

10Улад зоной иимэ хашхараа дуулааб: «Маанадые зүб гэжэ Эзэн гэршэлээл. Ошожо, Сион дээрэ Эзэн Бурханайнгаа хэһэн хэрэгүүд тушаа зондо соносхоё».

11Эзэн Мидиин хаашуулые дуудаа, юуб гэхэдэ, тэрэ Вавилооной орон нютагые усадхаха гэһэн түсэбтэй. Иимэл аргаар Тэрэ Һүмынгөө түлөө үһөөгөө абаха.

Сэрэгэй ноёд захирба: «Годлинуудаа хурсадагты! Һаадагуудаа дүүргэгты! 12Вавилооной хэрэм хананууд руу добтолжо эхилхэ тухай тэмдэг үгэгты! Харуул бүхэлэгты, манаа табигты! Хүниие отуулагты!»

Вавилооной улад зондо хэхэб гэжэ айладхаһанаа Эзэн бэелүүлбэ гээшэл. 13Орон нютагынь агууехэ гол мүрэнүүдтэй, үнэтэ зүйлнүүдээр баян. Гэбэшье сагынь, амидаралайнь утаһан таһараа. 14Түмэн Сэрэгтэ Эзэн хадаа Вавилоон руу үй түмэн хорхой мэтэ олон зониие добтолуулан асарха, оог шууяа урдаһаань тэдэнэй татаха тухай Өөрөөрөө тангариглаа.

Эзэндэ магтаал дуун

15Эзэн Өөрын хүсэ шадалаар газар дэлхэйе бүтээгээ,
Өөрын мэргэн ухаагаар юртэмсые тогтоогоо,
Өөрын оюун ухаагаар огторгой татаа.
16Абяа гарахадань, тэнгэриин уһан хүржигэнэнэ,
газар дэлхэйн адагһаа Тэрэ үүлэнүүдые хөөрүүлнэ,
аадар бороогой үедэ сахилгаа түхөөнэ,
агуулануудһаа һалхи эльгээнэ.
17Улад зон булта мунхаг, ойлгосо мэдэсэгүй байна.
Шүтөөн бүтээгшэ өөрынгөө нэрэ гутаана,
юуб гэбэл, тэрэнэй шудхамал хүрэгүүд худал хуурмаг, амигүй онгод бшуу.
18Тэдэ юуншье бэшэ, энеэдэ-нааданай зүйл.
Эзэнэй шүүбэрилхэеэ ерэхэдэнь, үгы хэгдэхэ.
19Яковай Бурхан тэдээндэ адли бэшэ!
Тэрэ болбол Хамагые Бүтээгшэ,
Израиль – Тэрэнэй өөрын арад, мэдэлэйнь албатан.
Нэрэ хүндэнь – Түмэн Сэрэгтэ Эзэн мүн.

Эзэнэй шиидам ташуур

20Эзэн иигэжэ айладхана: Вавилоон, таанад Минии шиидам,
дайнай зэбсэг гээшэт.
Үндэһэ яһатаниие сохиходоо,
хаан түрэнүүдые усадхахадаа,
Би таанадые хэрэглэдэг һэм.
21Танаар мори болон тэрэниие унагшые сохидог,
дайшалхы тэргэ болон жолоошыень усадхадаг бэлэйб.
22Эрэ, эмэ хүниие,
хүгшэн, залуу зониие,
хүбүүн, басага таанадыел хэрэглэн аладаг һэм.
23Танаар хонишониие болон хонин һүрэгыень,
таряашан болон хүллэһэн малыень,
удамаршадые болон захирагшадые усадхадаг бэлэйб.

Вавилооной хэһээлтэ

24Эзэн иигэжэ айладхана:

– Сион дээрэ хэһэн бүхы муу бузар хэрэгүүдэйнь түлөө Би танай хараһаар байтар Вавилоондо хэһээлтэ амасуулхаб. 25Вавилоон, ши бүхы орон дэлхэйе усадхажа байгааша хада уула мэтэш. Би, Эзэн, шинии урдаһаа тулахаб. Шамайе абажа, дээрэһээ унагаажа, шатанхай, үнэһэн тоброог болгон орхихоб. 26Һандарал болоһон шулуунуудһааш нэгэшье шулуун дахин гэр барихада хэрэглэгдэхэгүй. Хэтэ мүнхэдөө зэлүүд хооһон газар боложо үлэхэш. Энэ хадаа Би, Эзэн, айладхана мүн!

27Добтолхо тухай тэмдэг үгэгты! Үндэһэ яһатадай бултадаа дуулахаар бүреэ үлеэгты! Вавилооной урдаһаа дайлалдахаар арадуудые зэһүүлэгты! Арараат, Миннии болон Ашхэнааз хаан түрэнүүдые тэрээндэ добтолхыень дуудагты! Байлдаае ударидаха жанжиниие томилогты! Үй түмэн таршаа шумуул мэтээр олон моридые бодхоогты! 28Вавилооной урдаһаа дай үүдхэхыень бүхы үндэһэ яһатаниие зэһүүлэгты! Мидиин хаашуулай, захирагшадайнь, ударидагшадайнь, бүхы орон нютагайнь сэрэгэй хойноһоо эльгээжэ, дуудагты! 29Газар хүдэлжэ, шэшэржэ байна, юуб гэхэдэ, Вавилоониие хэнэйшье ажаһуухагүй, хооһон орон нютаг болгохо гэһэн түсэбөө Эзэн бэелүүлжэ байна. 30Вавилооной сэрэгшэд тулалдахаа болижо, бата хэрэмүүдтээ хоргодон байна. Тэдэ шэн зориггүй, хүсэгүй ядуу болонхой. Хотын бартаанууд һандаргагдаа, гэр байрануудынь галдагдаа. 31Хотын заха бүхэнһөө эзэлэгдэһэн тухай Вавилооной хаанда дуулгахаяа зарлагша нүгөөдэ зарлагшатай мүргэлдэн шахуу гүйлдэжэ байна. 32Гараамшуудыешье дайсан эзэлээ, хэрэмүүдыешье шатаагаа. Вавилооной сэрэгшэд угаа айнхай. 33Халта болоод дайсан тэдэниие хороохо, Вавилооной басаган тээрмэдэ үйрүүлэгдэжэ байһан орооһондол, гэшхэн буталха. Энэ болбол Би, Түмэн Сэрэгтэ Эзэн, Израилиин Бурхан, айладхана мүн!

34Вавилооной хаан Навуходоносор
Иерусалимые залгижа, эдижэ байгаа.
Тэрэ хотые хооһон һаба мэтэ болгоо.
Мангадхай мэтэ тэрэниие залгяа.
Хэрэгтэй юумэеэ абаад,
хэрэггүй юумые хаяба.
35Сионой зон иигэжэ хэлэхэ:
«Маанад тушаа хүсэ хэрэглэһэнэйнгээ
түлөө гансал Вавилоон харюусаха».
Иерусалимай зон иигэжэ хэлэхэ:
«Бидэнэй шуһа урдахуулһанайнгаа
түлөө гансал Вавилоон зэмэтэй!»

Эзэн Израильда туһалха

36Тиимэһээ Эзэн Иерусалимай улад зондо иигэжэ айладхана:

– Би танай хэрэг үмэглэжэ, танай түлөө дайсадһаатнай үһөөгөө абахаб. Би Вавилооной булагые хатаахаб, гол мүрэнүүдыень хуурай болгохоб. 37Вавилоон һандархай шулуунуудай, сүүбэн шононуудай орон нютаг, угаа үзэмжэгүй муухай болохо, хэншье тэндэ байхагүй, эдэ бүгэдые харагша хэн нэгэн ехэ һүрдэхэ. 38Вавилооной арад зон арсалан мэтэ архирха, арсаланай гүлгэд мэтэ хэрхирхэ. 39Хэр ухаагүй хаб? Тэдэнэй халахадань, Би найр хэжэ, баярлуулан хөөрүүлжэ һогтоохоб. Тэдэ нойрсохо, хэзээдэшье һэрихэгүй. 40Би тэдэниие хурьгад мэтэ, хуса болон ямаан мэтэ абажа, үүсэлэгдэхэ газартань абаашахаб. Энэ хадаа Би, Эзэн, айладхаа мүн!

Вавилооной хуби заяан

41Эзэн Вавилоон тушаа иигэжэ айладхал буулгана:

– Бүхы дэлхэйн магтаал мэтэ Шэшаах хото олзологдоо! Үндэһэ яһатанда Вавилоон ямар ехэ айха зүйл болоо гээшэб! 42Тэнгис далай Вавилоон дээгүүр гаража, шааяата долгидоорнь тэрэ хушагдаа. 43Хотонуудынь үзэмжэгүй муухай, хатажа хахарһан, хэнэйшье байдаггүй, дээгүүрнь гарадагшьегүй зэлүүд хооһон газар болоо. 44Вавилооной бурхан Бээлые Би хэһээхэб, залгин абаһан зөөрииень һөөргэнь гаргахые баадхахаб. Үндэһэ яһатад тэрээндэ бэшэ мүргэхэеэ болихо.

Вавилооной хэрэм хананууд унашоол! 45Израилиин улад зон, тэндэһээ тэрьедэгты! Өөһэдынгөө ами наһа Минии шанга уур сухалһаа абарагты! 46Зоригтнай бү мохог, дуулаһан һураг сууһаа боложо айжа бү байгты! Жэл бүри элдэб һураг дуулдажал байгаа ааб даа: дэлхэй дээрэ боложо байһан дайн дажар тушаа, нэгэ хаанай нүгөө хаантай тэмсэжэ байһан тухай. 47Вавилооной шүтөөнүүдые Минии шиидхэхэ саг дүтэлжэ байна. Бүхы орон нютаг эшхэбтэр зүйл болохо, бүхы зониинь алуулагдаха. 48Вавилоониие усадхахаяа хойто зүгһөө арад түмэнэй ерэжэ байхада, газар дэлхэй, огторгойшье баяртайгаар хашхаран байхал. 49Вавилоон хадаа бүхы дэлхэйн арад түмэниие хюдажа байгаа, Израилииншье угаа олон зониие алаа, мүнөө өөрөө алдалан унаха. Энэ болбол Би, Эзэн, айладхана мүн!

Вавилоондо байһан израильшуудта хандалга

50Эзэн Вавилоондо байһан Өөрынгөө арад түмэндэ иигэжэ айладхана:

– Таанад абарагдаат! Мүнөө тиигээд ябагты! Хүлеэжэ бү байгты! Гэрһээ холошье байгаа хадаа Нам, өөрынгөө Эзэн, тушаа һанагты, Иерусалим һанаан бодолдотнай орог лэ. 51Таанад хэлэхэдээ, «бидэ доромжолуулагдаабди, эшээбди, ямаршье хүсэгүй байнабди, юуб гэхэдэ, хариин зон Эзэнэй Һүмэдэ нангин газарнуудые бузарлаа» гэнэт. 52Тиимэһээ Вавилооной шүтөөнүүдые Минии шиидхэхэ саг ерэжэ байна. Шархатаһан зон бүхы орон нютагаар ёололдон байха. 53Вавилооной тэнгэри өөдэ дэгдэжэ, тэндэ бата хэрэмээ баряашье һаань, Би зониие тэрээн руу эльгээжэ, усадхахаб. Энэ хадаа Би, Эзэн, айладхана мүн!

Вавилооной агууехэ һандарал

54Эзэн иигэжэ айладхана: Вавилоонһоо хашхарха абяан,
агууехэ һандаралай абяан дуулдаха.
55Би Вавилоониие хюдажа, бардам абяа дууень замхуулхаб.
Сэрэг шангаар шааяһан долгид мэтэ орон ерэхэ,
шангаар хашхаралдан добтолхо.
56Тэдэ Вавилоониие усадхахаяа ерээ.
Вавилооной сэрэгшэд баригдаха,
һурша номуудынь эбдэгдэхэ.
Би хэһээлтэ амасуулдаг Бурхамби,
Вавилооной муу юумэ хэһэн хэмээрнь тэрээндэ хэһээлтэ амасуулхаб.
57Түшэмэлнүүдыень, сэсэн мэргэшүүлыень,
удамаршадыень, сэрэгшэдыень һогтоохоб.
Тэдэ унтажа, хэтэ мүнхын нойроор нойрсохо, һэрихэгүй.
Энэ хадаа Би, хаан,
Би, Түмэн Сэрэгтэ Эзэн, айладхана мүн!
58Вавилооной үргэн хана хэрэм һуури хүрэтэрөө һандаргагдаха,
үндэр бартаануудынь дууһан шатаха.
Үндэһэ яһатан юуншье бэшэ юумэнэй түлөө ажаллаа,
тэдэнэй оролдолгонууд галда дүрөө.
Энэ хадаа Би, Түмэн Сэрэгтэ Эзэн, айладхана мүн!

Ерэмияа Вавилоон руу мэдээсэл эльгээбэ

59Маһсэяагай аша, Нэрияагай хүбүүн Сэраяа Цэдэкиия хаанай ахамад хангагша байгаа. Цэдэкиия Иудын хан түрые дүрбэдэхи жэлээ зонхилжо байха үедөө Вавилоон руу ошоо һэн. Тэрээнтэй хамта Сэраяа ябалсаа. Сэраяада би зарим зүбшэл заабари үгөө һэм. 60Вавилоонтой тохёолдохо гай тодхорой бүхы хэм хэмжүүр болон бусад юумэ нэгэ хуйламал ном соо бэшээ бэлэйб. 61Тиигээд Сэраяада иигэжэ хэлээб:

– Вавилоондо хүрэхэдөө, ши эндэ бэшээтэй бүхы үгэнүүдэй арад зондо шангаар уншагдахые хинан хараарай. 62Тиигээд иигэжэ зальбараарайт: «Эзэн, Та энэ газарые хүнэйшье, амитанайшье байдаггүй, зэлүүд хооһон хэтэ мүнхэдөө болгохо тухай айладхаа бэлэйт». 63Сэраяа, ши энэ хуйламал номой уншагдажа дүүрэхэдэ, тэрээндэ шулуу уяад, Евфрат мүрэн руу хаяарай. 64Тиигээд иигэжэ хэлээрэй: «Тон иимэ юумэн Вавилоонтой болохо. Тэрэ доройтожо, Эзэнэй асарха гай һандаралай һүүлээр дахин һэргэн бодохогүй».

Ерэмияагай үгэнүүд эндэ түгэсэнэ.