‏ Jeremiah 7

Ерэмияа Һүмын хажууда

1– 2– 3Иудын хан түрын улад зоной мүргэхэеэ ерэдэг Эзэнэй Һүмын хаалгын хажууда ошохыемни Эзэн намда захирба. Намайе тэндэ зогсоожо, Өөрынь, Израилиин Бурхан, Түмэн Сэрэгтэ Эзэнэй, иимэ үгэнүүдые соносхохыемни Тэрэ захираа:

– Өөһэдынгөө ажабайдал болон үйлэ хэрэгүүдээ заларуулан заһагты, тиигэбэлтнай, Би таанадые эндээ саашадаашье ажаһуухыетнай зүбшөөхэб. 4«Энэ болбол Эзэнэй үргөө, Эзэнэй үргөө, Эзэнэй үргөө» гэһэн дэмы найдуулһан хуурмаг үгэнүүдтэ бү этигэгты. 5Хэрбээ ажабайдалаа болон үйлэ хэрэгүүдээ үнэхөөр заларуулан заһабалтнай, бэе бэедээ үнэн сэхээр хандадаг болоо һаатнай, 6ерүүл хүниие, үншэн хэнзые, бэлбэһэн эхэнэрые харшалангүй, ямаршье гэм зэмэгүй хүниие энэ орон нютагта алангүй, гай тодхор асардаг ондоо бурхадта мүргэхэеэ болёо һаатнай, 7үбгэ эсэгэнэртэтнай хэтэ мүнхэдөө Минии үршөөһэн энэ газарта, энэ орон нютагта таанадые саашадаашье ажаһуухыетнай үлөөхэб.

8Үзөөрэйгты, таанад худал хуурмагта найдажа байнат, энээнһээ аша үрэ гарахагүй! 9Таанад хулгай хэжэ, алажа, забхайржа, худалаар тангариглажа, Баалда үргэл үргэн, мэдэхэгүй ондоо бурхадта мүргэжэ байгаад, 10энээнэй удаа ерэжэ, Минии нэрээр нэрлэгдэһэн энэ үргөө соо урдамни зогсоод, «Бидэ абарагдаабди!» гэжэ хэлэнэт. Тиигээд эдэ бүхы жэгшүүрилтэ зүйлнүүдые саашадаашье хэжэл байнат. 11Минии нэрээр нэрлэгдэдэг энэ үргөө, танай һанамжаар, дээрмэшэдэй үүр болоо юм гү? Үзөөрэйгты, Би бүхы юумэ хаража байнаб! 12Намайе хүндэлхэ газар болгон түрүүшээр Шилоодо шэлэһэн газартамни ошожо, арад түмэн Израилиимни муу муухай ябадалһаа боложо тэдээндэ юу хэһыемни харыт. 13Би таанадта оло дахин хэлээ һэм, теэд таанад дуулаагүйт, Би таанадые дуудаа һэм, теэд харюусаагүйт. Мүнөө хадаа эдэ бүхы үйлэ хэрэгүүдэйтнай түлөө 14таанадай найдадаг, Минии нэрээр нэрлэгдэдэг үргөөдэ болон таанадта, үбгэ эсэгэнэртэтнай үгэһэн газартаа Би Шилоодо хандаһантайдал адляар хандан, үйлэ хэрэг хэхэб! 15Таанарай аха дүү болохо Эпрааимай бүхы үри һадаһадые гарган хаяһан шэгээрээ Би таанарые Өөрын хажууһаа гарган хаяхаб. Би, Эзэн, энээниие айладхана мүн!

Арад зон Эзэнэй мэдэлһээ гаранхай

16– Ерэмияа, ши хадаа энэ арад түмэнэй түлөө бү зальбара, бү уйла, маани мэгзэм бү үргэ. Намайе бү гуй. Юуб гэхэдэ, Би шамайе дуулахагүйб. 17Иудын хотонуудаар болон Иерусалимай үйлсэнүүдээр юу хэжэ байһыень ши харанагүй гүш? 18Үхибүүдынь түлеэ суглуулжа, эсэгэнэрынь гал носоожо, эхэнэрнүүдынь Тэнгэриин хатанда бообо хэхын тула талха зуурана. Намайе гомдоохын тула тэдэ ондоо бурхадта сэржэм үргэнэ. 19Теэд тэдэ Намайе гомдооно гү? Үгы! Тэдэ өөһэдыгөө бузарлан, өөһэдыгөө гомдохооно.

20Тиимэһээ Би, Эзэн Бурхан, Өөрынгөө бушаганама уур хилэнгые үргөөгэй оршодог энэ газар дээрэ, хүн ба адагуусан дээрэ, талын модод ба газарай үрэ жэмэс дээрэ буулгахам. Гал дүлэн носожо, хэншье тэрэниие унтараажа шадахагүй.

21Израилиин Бурхан, Түмэн Сэрэгтэ Эзэн иигэжэ айладана: Израилиин арад түмэн, таанад түгэс шатаалта үргэл хэдэгта, тиихэдэ үшөө үлэһыень өөһэдөө эдихэдэ хамаагүй үргэл гэдэг байнат. Бултыеньшье эдиит! 22Би таанадай үбгэ эсэгэнэрые Египедэй орон нютагһаа гаргахадаа, түгэс шатаалта үргэл тухай хэлээгүй, захираашьегүй бэлэйб. 23Гансал Минии үгэ дуулажа, Би тэдэнэй Бурхан, тэдэ Минии арад түмэн болохыень, тэдээндэ һайн байхын тула Минии захиһаар ажаһуухыень айладхан захираа һэм. 24Гэбэшье тэдэ Минии үгэ дуулаагүй, анхаралаа хандуулаагүй, харин үсэд, муу сэдьхэлэйнгээ табисуураар ажаһуужа, өөһэдыгөө хойшо татаба. 25Таанадай үбгэ эсэгэнэрэй Египедэй орон нютагһаа гараһан тэрэ үдэрһөө хойшо мүнөө хүрэтэр Би таанадта бүхы зарасанараа – лүндэншэдөө дахин-дахин эльгээжэл байгааб. 26Теэд таанад Минии үгэ дуулаагүйт, шэхээ табяагүйт, үсэрхэжэ, үбгэ эсэгэнэрһээ бүри муу болоот.

27Ерэмияа, эдэ бүхы үгэнүүдые шинии хэлээшье һааш, тэдэ шамайе шагнахагүй. Тэдэниие дуудаашье хадаш, тэдэ шамда харюусахагүй. 28Тиихэдэнь тэдээндэ «Энэ үндэһэн арад Эзэнэй, өөрынгөө Бурханай, үгэ дууланагүй, һургаал абанагүй. Үнэн зүб юумэн хосороо, тэдэнэй аманһаа бэшэ гарахагүй!» гэжэ хэлээрэй.

Бэн-Һинноомой хүндыдэ хэһэн нүгэл

29Иерусалимай улад зон,
үһэеэ тайража хаяад,
нюсэгэн добо толгой дээрэ гашуудан уйлагты.
Юуб гэхэдэ, Би, Эзэн,
энэ үе удамда уурлан хилэнтэжэ,
голожо, орхибоб.

30Иудын улад зон Минии хараһаар байтар муу муухай юумэ үйлэдөө. Минии нэрээр нэрлэгдэдэг үргөө соо тэдэ өөһэдынгөө шүтөөнүүдые табиба. Тиигээд тэрэ үргөө бузарлагдаа. 31Басагад, хүбүүдээ галда шатаахаяа Бэн-Һинноомой хүндыдэ Тоопэт гэжэ нэрэтэй мүргэлэй обоо зохёон тэдэ түхеэрбэ. 32Үзөөрэйгты, Тоопэт бэшэ, Бэн-Һинноомой хүнды бэшэ, харин Хюдалгын хүнды гэжэ энэнь нэрлэгдэхэ үдэрнүүд ерэхэеэ байна. Тоопэдтэ хүдөөлүүлхэ газар дуталдажа эхилхэ. 33Эдэ зоной һэенүүд тэнгэриин шубууд болон газарай арьяатанай эдишэ болохо. Тэдэниие үргөөхэ хүн олдохогүй. 34Энэ газар ханха зайдан болохо. Иудын хотонуудаар болон Иерусалимай үйлсэнүүдээр зугаа нааданай, баяр баясхалангай абяа дууе, түрэ найрай жаргалтай абяа Би таһалдуулхаб!