‏ Jeremiah 9

1Минии толгойн
уһаар дүүрэн байгаа һаань,
минии нюдэдэй
нулимсын булаг болоо һаань,
алагдаһан улад зонойнгоо хойноһоо
үдэр, һүнигүй уйлаха һэм.
2Элһэн сүл губида аяншадай хонохо газар
намда байгаа гээшэ һаань,
өөрын арад түмэнөө орхижо,
тэдэнһээ ошохо байгааб.
Тэдэ бултадаа забхайрагшад,
урбагшадай үүр гээшэл!
3Татаһан һурша ном мэтэ
худал хэлэтэйл тэдэ.
Энэ газар нютагта худал үгэ
үнэн сэхэһээ хүсэтэй болоо.
«Минии арад муу муухай юумэ
хойно хойноһоо үйлэдэнэ,
Намайе Бурхан гэжэ тооногүй», – гээд
Эзэн айладхана.
4Хүн бүхэн хүршэһөө болгоомжолог,
ямаршье аха дүүдээ бү этигэг.
Юуб гэбэл, нэгэ ахань нүгөөдэеэ
ула мүрөөрнь гүрдэнэ,
хүршэнь нүгөө хүршэеэ
худалаар хоблоно.
5Хүн бүхэн хүршэеэ мэхэлжэ,
үнэн сэхэеэ хэлэдэггүй,
худал хэлэхэдээ һурамхи болонхой,
нүгэл хэлгэдэ бүхы хүсэеэ зорюуланхай.
6Харата һанаанай оршон соо ажаһуунат.
Өөһэдөөшье угаа харатайт.
Арад түмэнэйнь Өөрыень буруушааһан тухай
Эзэн айладхаа.
7Тиимэ ушарһаа Түмэн Сэрэгтэ Эзэн
иигэжэ тунхаглаа:
Түмэрэй шанар мэдэхын тула
хайлуулжа шалгадаг гээшэл.
Тэрээндэл адляар Өөрынгөө арадые шалгахам.
Бэшэ ондоо арга үгы.
8Тэдэнэй хэлэн – хорото годли,
тэдэ хододоо худал хэлэдэг.
Хэн нэгэн хүршэтэеэ һайнаар амаараа хөөрэлдэбэшье,
дотороо урьха занга тэрээндэ бэлдэжэ байха юм.
9Иимэ зүйлэйнь түлөө Би
тэдэниие хэһээхэгүй юм гүб?!
Иимэ арад түмэнһөө
үһөөгөө абахагүй юм гүб?!
Энэ болбол Би, Эзэн, айладхаа мүн!
10Уула тухай уйлажа, ори дуун болохоб.
Үргэн талын бэлшээринүүд тухай
гашуудан бархирхаб.
Тэдэ зэлүүд хооһон болоо,
тэрээгүүр хэншье гарахагүй.
Үхэр һүрэгэй мөөрэхэнь дуулданагүй,
огторгойн шубууд, бүхы ан арьяатан
зугадан тэрьедээ.
11Эзэн айладхана:
«Иерусалимые һандарһан шулуун обоо,
сүүбэн шонын үүр болгохоб.
Иудын хотонуудые ажаһуугшадгүй
хооһон болгохоб».

Юундэ энэ орон нютаг хооһорооб?

12Би асуубаб: «Эзэн, юундэ энэ орон нютаг хооһорооб? Хэнэйшье дээгүүрнь гарахын аргагүй болотороо юундэ тэрэ элһэн сүл губи мэтэ хооһорооб? Энээниие ойлгожо шадаха сэсэн мэргэн хүн хэн бэ? Энээниие соносхохо тухай хэндэ Та айладхаһан байнабта?»

13Эзэн харюусаба:

– Ушарынь гэхэдэ, тэрэ арад Минии зааһан хуулиие орхижо, үгыемни дуулабагүй, Минии айладхаһанай ёһоор үйлэ хэрэг ябуулбагүй. 14Харин үсэрхэжэ, үбгэ эсэгэнэрэйнгээ һургаһанай ёһоор Баалда мүргэн-шүтэн байба. 15Тиимэһээ Минии, Түмэн Сэрэгтэ Эзэнэй, Израилиин Бурханай, иимэ арадтай юу хэхые шагнагты: хараарайгты, хорлохын тула тэдэниие үрмэдэһөөр хооллулхаб, һүлһэтэй уһаар ундалуулхаб. 16Би тэдэниие өөһэдыньшье, үбгэ эсэгэнэрэйньшье мэдээгүй үндэһэ яһатанай дунда тараахаб. Тэдэниие дууһан хюдатараа хойноһоонь сэрэг ябуулжал байхаб. 17Түмэн Сэрэгтэ Эзэн иигэжэ айладхана:
Һайса бодожо үзэгты!
Тиигээд хүдөөлгэндэ уйлан дууладаг
эхэнэрнүүдые дуудагты!
Эрхим иимэ дуушадые ерүүлхээр
хүниие эльгээгты.

18Улад зон иигэжэ хэлэбэ:
«Хүдөөлгэнэй гашуудалтай дуу
бидэндэ дуулахаяа
тэдэ яаралтай ерэг,
нюдэнһөөмнай нулимсын дуһалтар,
нюдэнһөө нёлбоһоной
урасхал мэтэ урдатар
дуулаг лэ».
19Сионһоо ори дуун соностоно:
«Аа, бидэнтэй сүйд болоо!
Гутамшаг бузар юумэндэ орообди!
Газар нютагаа орхихо баатай болообди,
манай гэрнүүд һандаргагдаа».
20Би, Ерэмияа, хэлээ һэм:
«Эхэнэрнүүд, Эзэнэй үгые шагнагты!
Тэрэнэй айладхал анхарагты!
Басагадаа шаналан гашуудаха ёһололдо,
хүн бүхэнөө – гашуудалай дуунда һургагты.
21Үхэл сонхоорнай дамжан ороно.
Үйлсэнүүдһээ үхи хүүгэдые,
хотын талмайнуудһаа эдир хүбүүдые
усадхахын тула
үхэл хатал ордонгууд руумнай орожо байна.
22Зоной һэе хүүрнүүд
задагай талмайнууд дээрэ
шэбхэ мэтэ хэбтэхэ,
таряа хадагшын һүүлээр
хэнэйшье суглуулхагүй
таряанай боолтонууд мэтэ.
Эдэ үгэнүүдые минии соносхохые Эзэн захираа».
23Эзэн иигэжэ айладхана:
Мэргэн хүн мэргэн ухаагаараа,
хүсэ шадалтай хүн шадалаараа,
баян хүн эд баялигаараа бү һайрхаг.
24Харин һайрхагша нэгэн
Намайе газар дэлхэй дээрэ
хайра энэрэл, хэрэг шүүбэрилгэ болон
үнэн зүбые үйлэдэгшэ Эзэн мүн
гэжэ ойлгодог, мэдэдэгээрээ һайрхаг лэ.
Энээндэ Би дуратай байхалби.
Энэ болбол Би, Эзэн, айладхана мүн!

25– 26Эзэн иигэжэ тунхаглана: «Египедэй, Иудын, Эдоомой, Аммооной, Моһаабай болон элһэн сүл губида ажаһуудаг, һаншагайнгаа үһэ тайрадаг зониие Минии шүүбэрилхэ саг дүтэлжэ байна. Эдэнэр бэлгэеэ отолуулаагүй. Харин Израилиин улад зон бэлгэеэ отолуулһаншье һаа, энэ ёһололой далда удхые – Намтай хэлсээгээ сахиха гээшые дүүргээгүй».