‏ Job 1

Иоовой үнэн шударгые туршалга

1Ууц нютагта Иоов гэжэ хүн ажаһуугаа. Тэрэ нүгэл хилэнсэг гэжэ мэдэхэгүй, үнэн шударга, Бурханда бэшэрэн шүтэдэг, бузар мууһаа огто зайлаха гэжэ оролдодог хүн байгаа. 2Тэрэнэй гэр бүлэдэнь долоон хүбүүн, гурбан басаган түрэһэн юм. 3Зөөри баялигынь гэхэдэ, долоо мянган хонитой, гурба мянган тэмээтэй, табан зуун паар ажалай сартай, табан зуун эмэ элжэгэтэй, олон тоото зарасанартай байгаа. Тэрэ хүн Дурна зүгэй хамагай суутай зоной нэгэн бэлэй.

4Иоовой хүбүүд ээлжээгээр өөр өөрын үдэртэ нэгэнэйнгээ гэртэ сугларжа, найрлан сэнгэдэг, мүн баһа гурбан эгэшэнэрээ эдихэ уухыень уридаг байба. 5Найр сэнгэлэйнь дүүрэхэдэ, Иоов хүүгэдээ дуудажа, арюудхалгын ёһолол бүтээдэг һэн. Мүн үглөөгүүр тэрэ эртэлэн бодожо, хүбүүдэйнгөө тоогоор түгэс шатаалта үргэл асардаг байба. Хүүгэдэйнь хэн нэгэн Эзэниие баһажа, нүгэл хэжэ байгуужаг гэжэ Иоов һанаандаа түбэгшөөдэг һэн.

6Нэгэтэ Бурханай хүбүүдэй Эзэнэй үмэнэ ерэхэдэнь, тэдэнэй дунда эрлиг оролсобо. 7Эзэн тэрээнһээ асууба: «Ши хаанаһаа ерэбэш?». «Газар дэлхэйгээр хэсэжэ ябаһанаа ерээб», – гэбэ эрлиг. 8«Минии зараса Иоовые хараа гүш? Тэрээн шэнги гэм зэмэгүй, үнэн шударга, Бурханда һүгэдэн бэшэрдэг, бузар мууһаа зайладаг хүн дэлхэй дээрэ үгыл», – гэжэ Эзэн айладаба.

9«Нэгэл удхатайгаар Бурханай урда бэшэрдэг юм бэшэ гү? 10Та тэрэниие, орон гэр, зөөри хамагыень хэрэм мэтээр хорёолон хамгаалаа бэшэ аалта? Та тэрэнэй ажал үйлэ үреэн арьбажуулаат, зөөри баялигынь, мал һүрэгынь ехэ боложол байна. 11Харин мутараа һунган эдэ бүгэдынь үгы хэбэлтнай, Таниие хараангүй хайшаа ошохо юм?», – гэжэ эрлиг харюу үгэбэ.

12«Тиигэбэлнь, бүхы байһан юумэниинь шинии гарта орохо болоно. Өөртэнь лэ гар хүрэжэ болохогүй», – гэбэ Эзэн. Тиин эрлиг Эзэнэй хажууһаа зайлан ошобо.

13Нэгэтэ Иоовой хүбүүд, басагадай ехэ ахындаа суглараад, эдижэ уужа байһан нэгэ үдэртэнь 14Иоовто нэгэ хүн ерээд:

– Сарнуудаар газар хахалжа байбабди. Элжэгэдтнай хажуудань бэлшэжэ ябаа. 15Гэнтэ шэбаа угсаатан добтолон ерэжэ, малыешни буляажа, ажалшадыеш һэлмэдэжэ алабал. Гансаараа би амиды гаралсажа, шамда дуулгахаяа яаран ерэбэб, – гэбэ.

16Тиигэжэ хэлэжэ байтарнь, баһа нэгэн ерэжэ хэлэбэ:

– Тэнгэриһээ гэнтэ гал буужа, хонин һүрэгыешни адуулагша хонишодтойш дууһан үрэбхин һалгаа. Би гансаараа амиды үлэжэ, танда хэлэхээ яаран ерэбэб.

17Хэлэжэ дүүрээгүй байтарнь, үшөө нэгэ хүн ерэжэ дуулгаба:

– Халдей угсаатанай дээрмэшэд гурбан тээһээ добтолжо, ажалшадыеш жадаар хадхажа алаад, тэмээнүүдыетнай буляажа абаа. Би гансаараа амиды үлөөб.

18Тэрэниие хэлэжэ дүүргээгүй байтарнь баһа нэгэ хүн ерэжэ мэдүүлбэ:

– Шинии хүбүүд, басагадай ехэ ахынгаа гэртэ үзэмэй дараһан архи уужа, эдеэлжэ байтар, 19сүл губиин саанаһаа ехэ һалхин бодожо, байшанай дүрбэн углуу сохибо. Байшан һандархадаа, бүхы байһан зониие үхэтэр даража унаба. Гансал би амиды гаралсааб.

20Тиихэдэнь Иоов бодожо, гадар хубсаһаяа таһар татажа, толгойнгоо үһэ хайшалуулаад, газарта үбдэглэн мүргэжэ, Эзэндэ хэлэбэ:

21– Би эхын умайһаа нюсэгэн ерээ һэм, энэ дэлхэйһээ тиишээ нюсэгэн бусанаб. Эзэн намда эд зөөри, үри хүүгэдые үгөө бэлэй. Мүнөө һөөргэнь бусаажа абаа. Эдэ бүгэдые хэхэ эрхэтэй Эзэнэй нэрэ алдаршаг!

22Иимэ юумэнэй болоходо Иоов Бурханиие нэгэш үгөөр муушалбагүй, Тэрэнэй урда ямаршье гэм хэбэгүй.