Job 10 | BxrBBL2024 | STEP | Өөрын амидарал үзэн ядадаг болоһон би гомдолоо Бурханда мэдүүлхэмни.

‏ Job 10

1 Өөрын амидарал үзэн ядадаг болоһон би гомдолоо Бурханда мэдүүлхэмни. 2 «Эзэн минии! Намайе иигэтэр бү гэмныт! Харин юундэ намай үзэн ядаһанаа хэлээд үгыт! 3 Та Өөрөө намайе бүтээһэн аад, иигэжэ үзэн ядахадаа, адагай муу этэгээдүүдэй бахаа ханахые хангажа байхадаа зүб юумэ хэнэ гээшэ гүт? 4 Амитай хүндэ адляар Танай нята харадаггүй, 5 Танай үдэрнүүд мүнхэ бэшэ хүнүүдэй үдэрнүүдтэ адли бэшэ, Танай жэлнүүд хүнэй жэлнүүдһээ ондоо. 6 Та юундэ иитэрээ минии үйлэ үзэжэ бурууемни бэдэрнэт, нүгэлтэй байһыемни элирүүлхэ гэжэ оролдонот? 7 Иихэдээ эгээлэй хүнүүдтэ адляар намда хандахадаа хамагые хаража байдаг Бурхан бэшэ болоно гүт? Буруугүй болохыем Та мэдэнэт. Танай мутарһаа хэн намайе һалгажа шадахаб? Хэншье һалгажа шадахагүй.

8 – 9 Та Өөрөө намайе газар шоройһоо бүтээһэн аад, шорой болгохо гэжэ юундэ хүсэбэт? 10 Та намайе һүн шэнгеэр юулэжэ, ээзгэй шэнги бүрилдүүлжэ, 11 арһа мяхыем суглуулжа, яһа шүрбэһөөр холбоогүй һэн гүт? 12 Танай бэлэглэһэн хайраар би амиды ябанаб. 13 Гэбэшье сэдьхэл соогоо далдалһан бодолыетнай би ойлгоном. 14 Алибаа гэм үйлдэбэлни, Та анхарангүй үнгэрхэ ушаргүйт. 15 Гэмтэй болобол шиидхэл үзэнгүй би гарасалдахагүйб гэжэ мэдэнэм. Гэмтэй болоболни гай гашуудал намда бууха. Гэмгүйшье һаа, толгойгоо үргэжэ зүрхэлхэгүйб. Иигээд оройдоо гэмгүй хүндэ зоболон амасуулха эрхэтэйт. 16 Зобохын ехээр зобожо байхадам, арсалан мэтэ добтолжо, үрсэгэнүүлэн тамалнат. 17 Та намайе дахин дахин гэмнэжэ, уур хилэнсэгтнай улам ехэдэнэ.

18 Тиигэбэл юундэ Та намайе эхын умайһаа түрүүлээ гээшэбта? Хүнэй нюдэндэ харагдахын урда үхэһэмни дээрэ байгаа. 19 Тиигээд оршолонто юртэмсэдэ огто ерээгүй мэтэ эхын хэбэлһээ унамсаараа үхээриин газарта ошохо һэм. 20 Удангүй үхэхэ намайе удаан бү тамалыт. Ойро зуура һэргэжэ, амяа абаха сүлөө олгыт. 21 Хизааргүй харанхы ба гүн һүүдэрэй орон руу ошохымни урда хэшээгыт. 22 Нюдэ балай һүни тэрэнэй хажууда юуншье бэшэ. Эхи захагүй байдал, гүн харанхы тэндэ зонхилно» гэжэ хэлэнэм.